រាជធានីភ្នំពេញ ៖ តារាសម្តែងកញ្ញាពេជ្រ ចរណៃ មានជំងឺដាច់សរសៃប្រឹសបេះដូងឈានដល់ដំណាក់កាលធ្ងន់ ហើយវេជ្ជបណ្ឌិតទាមទារ វះកាត់ ប៉ុន្តែនាងអត់មានលទ្ធភាព ។
កាលពីពេលថ្មីៗកន្លងមក អ្នកស្រីជាម្តាយឱ្យដឹងថា ក្រោយពេលបញ្ជូនកញ្ញាពេជ្រ ចរណៃ ទៅសង្គ្រោះបន្ទាន់ ត្រូវគ្រូពេទ្យបញ្ជាក់ថា មានតែមធ្យោបាយវះកាត់តសរសៃប្រឹសបេះដូងតែមួយគត់ដែលអាចដោះស្រាយបាន ។ ដូច្នេះហើយអ្នកស្រីជាម្តាយសម្រេចចិត្តយកកូនទៅផ្ទះកាលពីយប់ថ្ងៃទី២៧ តុលា ដោយសារតែអត់មានលទ្ធភាពបញ្ជូនទៅវះកាត់តាមការកំណត់ ព្រោះបើវះកាត់ចំណាយប្រាក់ជិត២ម៉ឺនដុល្លារឯណោះ។
អ្នកស្រីសុជាតា ជាម្តាយបញ្ជាក់ថា កញ្ញា ពេជ្រ ចរណៃ មានជំងឺដាច់សរសៃប្រឹសបេះដូងជាយូរមកហើយ ដោយសភាពជំងឺនោះតែងតែធ្វើឱ្យនាងហូរឈាមតាមមាត់ តាមច្រមុះ និងតាមភ្នែកជាដើម នៅពេលប្រព័ន្ធបេះដូងមានដំណើរការបញ្ជូនឈាមទៅកាន់សរីរាង្គ ហើយឈាមទាំងនោះត្រូវធ្លាយ ព្រោះតែដាច់សរសៃប្រឹស ។
កញ្ញាពេជ្រ ចរណៃ គឺជាបង្គោលគ្រួសារហើយពេលនាងឈឺគ្មានលុយបង់ថ្លៃផ្ទះទេពិសេសលុយដើម្បីបន្តការព្យាបាលកុំឱ្យឈាមហូរបញ្ច្រាសតាមមាត់ និងតាមច្រមុះ ។
ក្នុងស្ថានភាពបែបនេះអ្នកស្រីជាម្តាយដាច់ចិត្តប្រកាសសុំជំនួយឧបត្ថម្ភសម្រាប់ការព្យាបាលកញ្ញាពេជ្រ ចរណៃ ។ នៅក្នុងពេលនេះនាងមានសភាពរឹងថ្គាម ញ័រដៃញ័រជើង ដង្ហើមដង្ហក់ និងហូរឈាមតាមមាត់ និងតាមច្រមុះ មិនឈប់ទេ ។
សប្បុរសជន ពិសេសអ្នកសិល្បៈរួមអាជីពដែលចង់ជួយកញ្ញាពេជ្រ ចរណៃ អាចទាក់ទងទៅលេខ០៩៦ ៩២៦ ៧៧៧៧ ៕
