រាជធានីភ្នំពេញ ៖ តារាសម្ដែង និងពិធីករលោកញ៉ែម សុគន្ធ បានរងរបួសធ្ងន់ ហើយត្រូវគេដឹកបញ្ជូនទៅសង្គ្រោះនៅមន្ទីរពេទ្យ ដោយសារបើករថយន្តជ្រុលទៅបុករបាំងថ្មលើមហាវិថីម៉ៅសេទុង ។ របាំងថ្មបាក់ និងខ្ទាតរបាត់រប៉ាយពេញផ្លូវ ខណៈរថយន្តខូចខាតយ៉ាងដំណំ ។
គ្រោះថ្នាក់នោះកើតឡើងកាលពីវេលាម៉ោង១១ និង៥០នាទីយប់ថ្ងៃទី៥ ខែសីហា ឆ្នាំ២០១៨ នៅចំណុចផ្លូវបំបែកជាបួនលើមហាវិថីម៉ៅសេទុង កែងផ្លូវ១៩៣ ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ។ សាក្សីនៅកន្លែងកើតហេតុថា លោកញ៉ែម សុគន្ធ បានបើករថយន្តម៉ាក Highlander ពាក់ស្លាកលេខ ភ្នំពេញ 2AK-5321 ក្នុងល្បឿនលឿន ហើយមិនដឹងហេតុអ្វី ស្រាប់តែរេចង្កូតទៅបុករះក្បាលទ្រូងផ្លូវយ៉ាងពេញទំហឹង។ លោកញ៉ែម សុគន្ធ រងរបួសធ្ងន់ ដោយបោកផ្ទប់នឹងកញ្ចក់រថយន្ត ខណៈពោងសុវត្ថិភាពផ្ទុះទាំងអស់ និងខូចខាតផ្នែកខាងមុខយ៉ាងដំណំ ។ របាំងថ្មជាច្រើនកង់បានបាក់ខ្ទេច និងខ្ទាតចេញពីជួររប៉ាត់រប៉ាយពេញផ្លូវ ។
សមត្ថកិច្ចមូលដ្ឋានដែលទៅកន្លែងកើតហេតុឲ្យដឹងថាអ្នកបើកបរដែលរងរបួសត្រូវគេបញ្ជូនទៅមន្ទីរពេទ្យ មុនពេលសមត្ថកិច្ចទៅដល់ ។ ប៉ូលិសចរាចរណ៍ក្រុងបានទៅវាស់វែង និងស្ទូចរថយន្តយកទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនដោះស្រាយសំណងខូចខាតទ្រព្យសម្បត្តិរដ្ឋ ។
បើតាមអ្នករត់ម៉ូតូកង់បីដែលឈប់ចតនៅចំណុចនោះឱ្យដឹងថា ក្រោយពេលបុករួច លោកញ៉ែម សុគន្ធ បានបើកទ្វាររថយន្តចេញក្រៅ ហើយហៅរថយន្តមួយគ្រឿងមកទទួលលោកចេញទៅបាត់ បន្សល់ទុកតែរថយន្តរបស់លោកដែលខូចខាតនៅនឹងកន្លែងកើតហេតុ ។
មិនទាន់មានការបំភ្លឺពីលោកញ៉ែម សុគន្ធ ទាក់ទិនគ្រោះថ្នាក់នោះទេ ។ ទន្ទឹមនេះក៏មិនមានប្រភពបញ្ជាក់ពីអាការរបួសរបស់លោកញ៉ែម សុគន្ធ ដែរ ។
កាលពីប៉ុន្មានខែមុនលោកញ៉ែម សុគន្ធ រងការវាយប្រហារពីយុវជនម្នាក់ថាលោកជាមនុស្សស្រលាញ់ភេទដូចគ្នា ហើយរូបគេជាគូស្នេហ៍ដែលលោកក្បត់ចិត្ត ។ ទោះជាយ៉ាងណាក្តី មិនបានប៉ុន្មានផងលោកសុគន្ធ បានភ្ជាប់ពាក្យជាមួយនារីម្នាក់ ៕
