រាជធានីភ្នំពេញ ៖ ទន្ទឹមនឹងមានទេពកោសល្យនៃការសម្តែងកំប្លុកកំប្លែងនោះ តារាកំប្លែងមួយចំនួនធ្វើឲ្យមហាជនផ្ទុះសំណើចផងដែរតាមរយៈរូបរាងធំធាត់របស់ពួកគេ ។ សម្រាប់អ្នកកំប្លែង រូបរាងខុសប្រក្រតីពីធម្មជាតិក៏ជាការទាក់ទាញមួយផ្នែកផងដែរ ។ តារាកំប្លែងដែលមានមាឌធំធាត់ជាងគេនៅកម្ពុជាក៏កំពុងតែមានទីផ្សារខ្ពស់ក្នុងការរកចំណូលពីអាជីពសម្តែងរបស់ពួកគេ ។ តារាកំប្លែងខ្លះមានឱកាសចូលសម្តែងដោយសារតែមានមាឌធំនេះផងដែរ ។
តារាកំប្លែងដែលបានវិវឌ្ឍខ្លួនពីពិធីករ និងចម្រៀងលោកប៊ីអាយជី បានក្លាយជាតារាកំប្លែងដ៏ទាក់ទាញមួយរូបនាពេលបច្ចុប្បន្ន បន្ទាប់ពីតារារូបនេះបានចូលខ្លួនរួមកំប្លែងជាមួយនឹងក្រុមនាយពែកមី ។ ប៊ីអាយជី កំពុងតែមានទីផ្សារខ្ពស់នៅក្នុងអាជីពសិល្បៈទាំងការសម្តែងភាពយន្តខ្នាតធំ និងភាពយន្តភាគ ខណៈពេលដែលតារារូបនេះក៏ជាតារាកំប្លែងមួយដួងផ្តាច់មុខប្រចាំស្ថានីយទូរទស្សន៍CTN ។
តារាកំប្លែងស្រីដែលមានឈាមជ័រឪពុកជាតារាកំប្លែងដូចគ្នាអ្នកនាងប៉េងប៉ោង គឺជាតារាកំប្លែងស្រីដែលមានមាឌធំ និងមានទាក់ទាញផងដែរ ទៅលើមាឌរបស់នាងជាមួយទេពកោសល្យសម្តែង ។ ប៉េងប៉ោង ជាកូនស្រីបង្កើតរបស់នាយវីតាមីនសេ ដែលទើបតែបានទទួលមរណភាពកាលពីពេល ថ្មីៗកន្លងមក ។ នាងក៏ជាតារាកំប្លែងមួយរូបស្ថិតនៅក្នុងក្រុមឪពុករបស់នាងផងដែរ ។ យ៉ាងណាក៏ដោយបន្ទាប់ពីឪពុករបស់នាងបានទទួលមរណភាពនោះ គេមិនទាន់ដឹងថា ប៉េងប៉ោងនឹងចូលរួមសម្តែងនៅក្នុងក្រុមមួយណាច្បាស់លាស់នៅឡើយទេ ប៉ុន្តែទំនងជានាងអាចសម្តែងចល័ត ។
ក្រៅអំពីអាជីពសម្តែងកំប្លែង ប៉េងប៉ោង ក៏មានទីផ្សារខ្ពស់ផងដែរក្នុងការសម្តែងខ្សែភាពយន្តខ្នាតធំ និងរឿងភាគទូរទស្សន៍ ហើយនាងក៏ជាតារាចម្រៀងប្រចាំកងអង្គរក្សសម្តេចតេជោផងដែរ ។
តារាមាឌធំភេទទីបីនាងយេយេ ក៏ជាតារាកំប្លែងដែលកំពុងមានទីផ្សារខ្ពស់ផងដែរនាពេលបច្ចុប្បន្ន ក្នុងពេលដែលតារារូបនេះបានលេចវត្តមានស្ទើរមិនដាច់សូរតាមកញ្ចក់ទូរទស្សន៍ ។ យេយេ បានបង្កើតក្រុមកំប្លែងភេទទីបីរបស់ខ្លួន ដែលបានសម្តែងជាប្រចាំឲ្យស្ថានីយទូរទស្សន៍ខ្មែរប៉ុស្តិ៍លេខ៩រៀងរាល់ចុងសប្តាហ៍ ក្នុងនោះនាងក៏ជាពិធីករមួយរូបក្នុងកម្មវិធីភ្លក់មុខម្ហូបនៅស្ថានីយទូរទស្សន៍បាយ័នផងដែរ។
តារាកំប្លែងដែលកំពុងតែលេចធ្លោម្នាក់ផងដែរនាយធុង បានបង្ហាញខ្លួនចូលរួមសម្តែងជាមួយក្រុមកំប្លែងនាយក្រឹម ក្នុងកម្មវិធីសំណើចចុងសប្តាហ៍របស់ស្ថានីយទូរទស្សន៍បាយ័ន ។ តារាកំប្លែងរូបនេះក៏បានបង្ហាញវត្តមានសម្តែងនៅលើកញ្ចក់ទូរទស្សន៍នានាផងដែរ ជាពិសេសនាយក៏បានចូលរួមក្នុងវង្សតន្ត្រីសប្បុរសធម៌ស្វែងរកប្រាក់សម្រាប់ជួយដល់មន្ទីរពេទ្យគន្ធបុប្ផា ក្មេងកំព្រា និងចាស់ជរាផងដែរ ។
បច្ចុប្បន្ននាយធុង ជាតារាកំប្លែងមួយរូបនៅក្នុងក្រុមកំប្លែងលោកខាត់ ចំរើន ហៅនាយកន្តេះឡង់ និងនាយស្វិត ៕
