អ្នកណាក៏ចូលចិត្តញ៉ាំដែរនំពងទា ជាពិសេសពេលសែនម្តងៗ នៅផ្ទះសុទ្ធតែនំពងទាហ្មង។ តែនៅតែចូលចិត្ត បើបានធ្វើញ៉ាំក្តៅៗខ្លួនឯងទៀតកាន់តែឆ្ងាញ់ ព្រោះទិញគេទម្រាំបានញ៉ាំ នំត្រជាក់អស់ លែងសូវទន់បាត់ហើយ។ ឥឡូវមកមើលរូបមន្តធ្វើទាំងអស់គ្នា៖
គ្រឿងផ្សំ៖
- ស៊ុតទា ៤ គ្រាប់
- ស្ករស ៦០ ក្រាម
- អំបិលមួយស្លាព្រាកាហ្វេ
- ម្សៅមី ៦០ ក្រាម
- ទឹកឃ្មុំ ២ ក្រាម
វិធីធ្វើ៖
១. ជាដំបូងត្រូវរំលែកស៊ុតក្រហម និងស៊ុតសជាមុនសិន
២. វាយក្រឡុកស៊ុតសចំនួន ៨៥ ក្រាម ឲ្យឡើងពពុះ បន្ទាប់មកដាក់ស្ករសចូលម្តងបន្តិចៗ ចូលបណ្តើរវាយវាបណ្តើរចំនួន ៦០ ក្រាម វាយរហូតដល់ស្កររលាយអស់មើលទៅសុទ្ធតែពពុះ រួចដាក់ស៊ុតក្រហមចូលម្តងមួយគ្រាប់ឲ្យសព្វចំនួន ៤ គ្រាប់រួចបន្ថែមទឹកឃ្មុំ ២ ក្រាម ចូលច្របល់ឲ្យសព្វ បន្ទាប់មកធ្វើការរែងម្សៅមីចំនួន ៦០ ក្រាមចូល ទៅក្នុងម្សៅ និងអំបិលមួយស្លាព្រាកាហ្វេ បន្ទាប់មកវាយវាឲ្យសព្វ ចូលគ្នាប្រសិនបើរាវអ្នកអាចបន្ថែមម្សៅបន្ថែមទៀតបាន ត្រូវចាំថាវាយវារហូតដល់ខាប់ឡើងស្អិត ហើយពពុះខ្លាំងដោយកូរបណ្តើរអុកម្សៅបណ្តើរទើបនំឡើងល្អ
៣. ប្រើពុម្ពដែកមួយដែលមានរាង ៤ ជ្រុងក្រាលក្រដាស់ស្តើងមួយ បន្ទាប់មកចាក់ម្សៅនំចូលក្នុងពុម្ពក្នុងចម្រិត ៦០% នៃកម្ពស់ពុម្ព បន្ទាប់មកធ្វើការរលាក់វា ២ ទៅ ៣ ដងដាក់កម្តៅក្នុងឡរងចាំរយៈ ៣៥ នាទីក្នុងកំដៅ ១៦០ អង្សា
៤. បន្ទាប់ពីរងចាំរយៈពេល ៣៥ នាទី រួចមកធ្វើការយកនំចេញពីឡយកកាំបិតតូចមួយមក ជាគែមៗ ជុំវិញម្សៅទុកឲ្យវាត្រជាក់ដាក់ផ្កាប់វារលាក់នំចេញជាការស្រេច៕