ប្លែកទៀតហើយ! គឺថាមុខម្ហូប បង្អែម ប្លែកៗរាល់ថ្ងៃ ប្រាកដជាចេះធ្វើច្រើនហើយត្រូវអត់ តាំងពីចូលដល់សម័យកូវីដមក។ មានទៅខាតអី ចេះច្រើនអញ្ចឹងល្អណាស់ ថ្ងៃក្រោយចង់ញ៉ាំធ្វើខ្លួនឯង មិនពិបាកទៅទិញគេ។ ឥឡូវថ្ងៃនេះមករៀនធ្វើទឹកត្រឡាចវិញម្តង ព្រោះថាល្អណាស់ចំពោះសុខភាពផឹកទៅធ្វើអោយត្រជាក់ក្នុងរាងកាយ ដែលត្រូវជាមួយអាកាសធាតុក្តៅដូចរាល់ថ្ងៃនេះ។
គ្រឿងផ្សំ៖
- ត្រឡាចចាស់ ២ ទៅ ៣ ផ្លែ
- ស្លឹកតយ ៣ ទៅ ៤ សន្លឹក
- ស្ករស (ប្រើតាមបរិមាណទឹក)
- អំបិល កន្លះស្លាបព្រាកាហ្វេ
វិធីធ្វើ៖
១. កាត់ត្រឡាចជាកង់ធំៗ (មិនចាំបាច់ចិតសំបក) រួចលាងទឹកឲ្យស្អាត
២. បន្ទាប់មកត្រូវយកទៅអាំងឲ្យឡើងពណ៌ក្រហមបន្តិច
៣. ដាក់ស្លឹកតយ ដាំជាមួយទឹកឲ្យពុះរហូតចេញជាតិឈ្ងុយ សឹមដាក់ត្រឡាចចូល រម្ងាស់ប្រហែល ១០ ទៅ ២០ នាទី ចាំស្រង់ត្រឡាចចេញ រួចដាក់ស្ករចូលតាមចំណូលចិត្ត និងដាក់អំបិលចូលជាការស្រេច។ ពេលត្រជាក់អាចញ៉ាំបានហើយ ឬអាចច្រកដាក់ដប យកទៅក្លាសេ ឬអាចដាក់ទឹកកកចូលញ៉ាំតែម្តងកាន់តែឆ្ងាញ់៕
