ប៉ុន្មានឆ្នាំចុងក្រោយនេះ ទឹកដូងខ្ចីទទួលបានការពេញនិយមយ៉ាងខ្លាំងពីសំណាក់មនុស្សស្ទើរគ្រប់វ័យ ។ វាត្រូវបានគេនិយាយថា មានអត្ថប្រយោជន៍យ៉ាងច្រើនដល់សុខភាពរាប់ចាប់ពី ផ្តល់ជាតិទឹកដែលបាត់បង់ បង្កើនការរំលាយអាហារ និងជួយសម្រកទម្ងន់ជាដើម ។ ដោយមានកាឡូរីត្រឹម៥០ក្នុងមួយពែង ដូច្នេះគេមិនគួរមើលរំលងភេសជ្ជៈបង្កើនថាមពលពីធម្មជាតិនេះទេ ។ ខាងក្រោមនេះជាអត្ថប្រយោជន៍ផ្សេងទៀតដែលបានមកពីការទទួលទានទឹកដូង ៖ ១-ផ្តល់អត្ថប្រយោជន៍ជាអាហារូបត្ថម្ភដល់រាងកាយ ៖ ជាធម្មជាតិរបស់ទឹកដូងគឺមានសារធាតុកាបូអុីដ្រាតក៏ដូចជា សារធាតុស្ករកម្រិតទាបខណៈ សារធាតុខ្លាញ់សេរីគឺមាន ៩៩ភាគរយ ។ វាមានតុល្យភាពធម្មជាតិនៃសូដ្យូម កាល់ស្យូមនិងម៉ាញេស្យូម ។ លើសពីនេះទៀត ទឹកដូងផ្ទុកទៅដោយរ៉ែប៉ូតាស្យូមក្នុងបរិមាណដ៏ធំ ។ ប៉ូតាស្យូមមានប្រសិទ្ធភាពជួយរក្សាឱ្យដំណើរលោតរបស់បេះដូងមានភាពទៀងទាត់និងត្រឹមត្រូវ ហើយក្នុងនាមជាភេសជ្ជៈបំពេញជាតិទឹកដែលបាត់បង់ ទឹកដូងខ្ចីបានជួយឱ្យសាច់ដុំ បណ្តាសរសៃប្រសាទ និងតម្រងនោមមានដំណើរការល្អ ។ យោងតាមទិន្នន័យអាហារូបត្ថម្ភរបស់ក្រសួងកសិកម្មសហរដ្ឋអាមេរិកឱ្យដឹងថា ក្នុងទឹកដូងមួយផ្លែមានផ្ទុកសារធាតុរ៉ែប៉ូតាស្យូមប្រហែលជា៥១៥មីល្លីក្រាមពោលគឺប្រហែល២២ភាគរយ ច្រើនជាងចេកមួយផ្លែដែលមានប៉ូតាស្យូម៤២២មីល្លីក្រាម ។ ២-ជួយពង្រឹងប្រព័ន្ធការពាររាងកាយ ៖ ដោយវត្តមានអាស៊ីតឡូរិចនាំឱ្យការទទួលទានទឹកដូងអាចជួយពង្រឹងប្រព័ន្ធការពាររាងកាយដ្បិតអាស៊ីតឡូរិចមានកម្លាំងប្រឆាំងវីរុស បាក់តេរី និងពពួកផ្សិត ។ ជាមួយលក្ខណសម្បត្តិទាំងនេះនាំឱ្យការទទួលទានទឹកដូងគឺអាចជួយពង្រឹងដល់ប្រព័ន្ធភាពស៊ាំរបស់រាងកាយក៏ដូចការប្រយុទ្ធប្រឆាំងនឹងជំងឺប៉េស និងជំងឺគ្រុនក្តៅ ។ ៣-ជួយបង្គ្រប់ជាតិទឹកដែលបាត់បង់ ៖ ទឹកដូងមានសមត្ថភាពស្ដារឡើងវិញនូវវត្ថុរាវរបស់រាងកាយដែលបាត់បង់ ។ រាប់សតវត្សមកហើយ វាត្រូវបានគេប្រើជាភេសជ្ជៈអូរ៉ាលីតធម្មជាតិ ។ ចូរបំភ្លេចចោលនូវបណ្តាភេសជ្ជៈ ប៉ូវកម្លាំងដែលផ្អែមដោយស្ករ ហើយជំនួសមកវិញនូវទឹកដូងខ្ចីដែលមានគុណប្រយោជន៍ជាអាហារូបត្ថម្ភដល់រាងកាយ ។ វាជាជម្រើសនៃភេសជ្ជៈធម្មជាតិដ៏សមស្របដែលអាចជំនួសបណ្តាភេសជ្ជៈមានកាឡូរីខ្ពស់ ។ ទឹកដូងខ្ចីផ្ទុកទៅដោយសារធាតុស្ករកើតពីធម្មជាតិក្នុងចំនួនមួយដែលរាងកាយងាយស្រួលក្នុងការស្រូបយក ។ អ្នកដែលមានជំងឺរាករូស និងការខ្វះជាតិទឹកអាចផឹកទឹកដូងខ្ចីបានដោយដាក់អំបិលតិចតួច ។ ៤-ការពារប្រឆាំងនឹងការរលាកផ្លូវទឹកនោមៈ ដោយសារតែទឹកដូងគឺជាភេសជ្ជៈដែលបង្កើនការផលិតទឹកនោម ដូច្នេះវាជួយគ្រប់គ្រងលំហូរទឹកនោមដោយបង្កើនការបត់ជើងតូច ។  ដោយមូលហេតុនេះ នាំឱ្យវាក្លាយជាភ្នាក់ងារជួយសម្អាតផ្លូវទឹកនោម ទប់ស្កាត់បាននូវការរលាក ៕ មិនត្រឹមតែអាចជួយរំលាយអាហារនោះទេផ្លែដូងក៏អាចយកមកធ្វើជាទឹកដោះគោផងដែរ ចូលមើលវីដេអូទាំងអស់គ្នា!

មើមខ្ញីជាអាហារមួយប្រភេទដែលមនុស្សនិយមទទួលទានជាយូរលង់មកហើយ។ បើទោះជាមានរសជាតិមិនសូវឆ្ងាញ់ ប៉ុន្តែមើមខ្ញីត្រូវគេដឹងថា ផ្តល់អត្ថប្រយោជន៍ច្រើនយ៉ាងដល់សុខភាព ។ ក្រៅពីសារធាតុរ៉ែម៉ង់កាណែសនិងរ៉ែទង់ដែង វាផ្ទុកទៅដោយវីតាមីនជាច្រើន ហើយដែលអ្វីទាំងអស់នេះមានសារសំខាន់បំផុតសម្រាប់ការបំពេញមុខងាររាងកាយ ។ ខាងក្រោមនេះជាអត្ថប្រយោជន៍ទឹកខ្ញីចំពោះសុខភាពអ្នកប្រើប្រាស់៖

១-ប្រឆាំងនឹងការរលាក ៖ ប្រសិទ្ធភាពមួយក្នុងចំណោមប្រសិទ្ធភាពជាច្រើនរបស់ទឹកខ្ញីគឺវាដើរតួជាភ្នាក់ងារប្រឆាំងនឹងការរលាកជាពិសេសការរលាកសន្លាក់ ។ ការសិក្សាពិសោធតាមបែបវិទ្យាសាស្ត្រមួយបានបង្ហាញថា អ្នកប្រើប្រាស់ទឹកខ្ញីប្រឈមតិចតួចនឹងជំងឺរលាកផ្សេងៗដ្បិតវាផ្ទុកទៅដោយសមាសធាតុប្រឆាំងអុកស៊ីតកម្មដែលអាចជួយបង្កើនលំហូរឈាមថ្មីៗតាមរយៈការកម្ចាត់ចោលសមាសធាតុអាក្រក់ចេញពីរាងកាយ ។ ២-ទប់ស្កាត់មហារីក ៖ មើមខ្ញីមានប្រសិទ្ធភាពសម្លាប់កោសិកាដែលបង្កឱ្យទៅជាជំងឺមហារីក ។ ការសិក្សាមួយបានបង្ហាញថា ពិសាមើមខ្ញីជួយបន្ថយល្បឿនលូតលាស់កោសិកាមហារីកសុដន់ ។ ៣-ទប់ស្កាត់ដំណើរលើសឈាមភ្លាមៗ ៖ ខ្ញីដើរតួនាទីក្នុងនាមជាសារធាតុធ្វើឱ្យឈាមរាវ និងកាត់បន្ថយដំណើរលើសឈាមភ្លាមៗ ។ អ្នកអាចបន្តក់ទឹកឃ្មុំ២-៣តំណក់ដើម្បីសម្រួលដល់រសជាតិ ។ ៤-ជួយជំរុញដល់ការរំលាយអាហារក្នុងរាងកាយ ៖ ពិសាទឹកខ្ញីជួយធ្វើឱ្យល្អប្រសើរដល់ការរំលាយអាហារ ក៏ព្រោះវាជួយបង្កើនល្បឿនចលនាអាហារចេញពីក្រពះទៅកាន់ពោះវៀន ។ បន្ថែមពីលើនេះ វាជួយសម្អាតរាល់សារធាតុពុលទាំងអស់ចេញពីរាងកាយ និងជួយព្យាបាលជំងឺពុលឡាន ។ ៥-កាត់បន្ថយខ្លាញ់កូឡេស្តេរ៉ូល ៖ ទឹកខ្ញីមានប្រសិទ្ធខ្ពស់ក្នុងការកាត់បន្ថយខ្លាញ់កូឡេស្តេរ៉ូល។ វាជួយកម្ចាត់ចោលនូវរាល់វត្ថុដែលរាំងស្ទះលំហូររបស់ឈាមក្នុងសរសៃឈាម។ ៦-ជួយព្យាបាលជំងឺផ្តាសាយ ៖ ខណៈវាផ្ទុកសមាសធាតុប្រឆាំងនឹងវីរុសព្រមទាំងពពួកផ្សិត  ខ្ញីត្រូវបានគេយកទៅធ្វើជាឱសថព្យាបាលជំងឺផ្តាសាយ ការក្អួតចង្អោរ និងគ្រុនក្តៅ ។ *វិធីធ្វើទឹកខ្ញី ៖ ចិតសម្បកនិងហាន់មើមខ្ញីជាដុំតូចៗ ចាក់ទឹកចូលបន្តិចរួចដាក់ក្នុងម៉ាស៊ីនក្រឡុក ។ បន្ទាប់ពីក្រឡុងសព្វ យកវាចេញហើយសង្កត់ពូតត្រងយកទឹកជាការស្រេច ។ ក្នុងករណីពិបាកទទួលទាន អ្នកអាចបន្ថែមស្ករបន្តិច ៕

នៅខាងក្រោមនេះមានវីដេអូបង្ហាញពីរបៀបធ្វើទឹកខ្ញី ជាមួយនិងទឹកក្តៅ សូមទស្សនាទាំងអស់គ្នា!