ការទទួលទានអាហារដែលធ្វើឡើងពីរុក្ខជាតិត្រូវបានគេដឹងជាយូរមកហើយថា មានទំនាក់ទំនងជាមួយនឹងការថយចុះហានិភ័យនៃលក្ខខណ្ឌសុខភាព  ដែលទាក់ទងនឹងរបៀបរស់នៅជាច្រើន។ ការសិក្សារាប់មិនអស់បានបង្ហាញថា ការបង្កើនការទទួលទានអាហារដែលធ្វើឡើងពីរុក្ខជាតិដូចជាតៅហ៊ូ អាចបន្ថយហានិភ័យនៃភាពធាត់ និងការស្លាប់ជារួមជំងឺទឹកនោមផ្អែម និងជំងឺបេះដូង ។ វាក៏ជំរុញឲ្យយើងមានសុខភាពល្អ និងពង្រឹងសុខភាពសក់ បង្កើនថាមពល និងបញ្ចុះទម្ងន់ ។ ការសិក្សាថ្មីៗនេះបានបង្ហាញថា ដោយសារតែតៅហ៊ូមានសារជាតិ Isoflavones ក្នុងកម្រិតមួយខ្ពស់ ដូច្នេះការទទួលទានតៅហ៊ូមានទំនាក់ទំនងទៅនឹងការថយចុះហានិភ័យនៃជំងឺដែលទាក់ទងទៅនឹងការមានអាយុច្រើន និងរបៀបរស់នៅដូចជា ៖ ១-ជំងឺសរសៃឈាមបេះដូង ៖ ការទទួលទានតៅហ៊ូជំនួសឲ្យប្រូតេអីុនសត្វអាចបន្ថយកម្រិតនៃកូឡេស្តេរ៉ុលមិនល្អ (LDL)  វាអាចបន្ថយហានិភ័យនៃការកើតជំងឺក្រិនសរសៃឈាម និងសម្ពាធឈាមខ្ពស់ ។ ២-មហារីកសុដន់និងក្រពេញប្រូស្តាត ៖ សារជាតិ Genistein ដែលជាសារជាតិ Isoflavone មានច្រើនលើសលប់នៅក្នុងសណ្តែកសៀងមានលក្ខណៈសម្បត្តិប្រឆាំងនឹងអុកស៊ីតកម្ម ដែលអាចបញ្ឈប់ការរីកលូតលាស់នៃកោសិកាមហារីក ។ កាលពីមុនមានការយល់ច្រឡំទាក់ទងនឹងសុវត្ថិភាពនៃការទទួលទានសណ្តែកសៀង បន្ទាប់ពីការធ្វើរោគវិនិច្ឆ័យជំងឺមហារីកសុដន់ ។ នេះគឺដោយសារតែរចនាសម្ព័ន្ធគីមីនៃសារជាតិ Isoflavones មានលក្ខណៈស្រដៀងគ្នាទៅនឹងអ័រម៉ូន Estrogen  ។ ទោះជាយ៉ាងណា ការទទួលទានអាហារដែលធ្វើឡើងពីសណ្តែកសៀងក្នុងបរិមាណមធ្យម (តិចជាងពីរដងក្នុងមួយថ្ងៃ) មិនប៉ះពាល់ដល់ការលូតលាស់របស់ដុំសាច់ ឬហានិភ័យនៃជំងឺមហារីកសុដន់របស់ស្ត្រីទេ ។ ប៉ុន្តែការទទួលទានសណ្តែកសៀងទៀងទាត់ប្រហែលជាអាចបន្ថយការកើតមានជំងឺមហារីកសុដន់ ។ ទោះបីជាមិនទាន់មានភ័ស្តុតាងច្រើនគ្រប់គ្រាន់ដើម្បីណែនាំដល់អ្នកមានជំងឺមហារីកសុដន់ទាំងអស់ក្នុងការបរិភោគសណ្តែកសៀង ប៉ុន្តែភ័ស្តុតាងទាំងនោះល្មមគ្រប់គ្រាន់អាចឲ្យអ្នកដែលមានបញ្ហានេះសាកល្បងក្នុងការបរិភោគតៅហ៊ូ ។ ៣-ជំងឺទឹកនោមផ្អែមប្រភេទ២ ៖ អ្នកដែលមានជំងឺទឹកនោមផ្អែមប្រភេទ២ជាញឹកញាប់ជួបប្រទះនឹងបញ្ហាជំងឺតម្រងនោម បណ្តាលឱ្យរាងកាយបញ្ចេញប្រូតេអីុនលើសនៅក្នុងទឹកនោម។ ភ័ស្តុតាងពីការសិក្សាថ្មីមួយបានបង្ហាញថា អ្នកដែលបានទទួលទានជាតិប្រូតេអីុនដែលបានមកពីសណ្តែកសៀងនៅក្នុងរបបអាហារ បានបញ្ចេញប្រូតេអីុនតិចជាងអ្នកដែលបានទទួលទានប្រូតេអីុនមកពីសត្វ ។ អ្នកនិពន្ធនៃការសិក្សានេះបានសន្និដ្ឋានថា ការរកឃើញនេះបានបង្ហាញថា ការទទួលទានប្រូតេអុីនបានមកពីសណ្តែកសៀងធ្វើឱ្យប្រសើរឡើងនូវសញ្ញាសម្គាល់ជាច្រើនដែលអាចមានប្រយោជន៍សម្រាប់អ្នកជំងឺទឹកនោមផ្អែមប្រភេទ ២ ដែលមានបញ្ហាតម្រងនោម ។ ៤-ជំងឺពុកឆ្អឹង ៖ សារជាតិ Isoflavones ដែលមានក្នុងសណ្តែកសៀងអាចកាត់បន្ថយការបាត់បង់ឆ្អឹង និងបង្កើនដង់ស៊ីតេរ៉ែរបស់ឆ្អឹង ក្នុងអំឡុងពេលអស់រដូវ ហើយត្រូវបានគេរាយការណ៍មកថា វាថែមទាំងអាចកាត់បន្ថយរោគសញ្ញានៃការអស់រដូវមួយចំនួនទៀតផង ៕ បើចឹងយើងមកមើលពីរបៀបធ្វើតៅហ៊ូទាំងអស់គ្នា!

ផ្លែប៊័រផ្ទុកសារជាតិ lutein និង zeaxanthin ក្នុងបរិមាណខ្ពស់ដែលពួកវាមានឥទ្ធិពលប្រឆាំងអុកស៊ីតកម្មជួយការពារភ្នែករបស់អ្នកឱ្យកាន់តែមានប្រសិទ្ធភាពនៃការឃើញ និងបញ្ចៀសជំងឺមួយចំនួនទៀត។ ខាងក្រោមនេះជាអត្ថប្រយោជន៍នៃផ្លែប៊័រទាំង៤យ៉ាង ៖ ១-ទប់ស្កាត់ការកើតជំងឺមហារីក ៖ សារធាតុប្រឆាំងអុកស៊ីតកម្មដែលមានក្នុងផ្លែប៊័រមានអត្ថប្រយោជន៍ច្រើនជាងការការពារភ្នែករបស់អ្នក ពួកវាក៏អាចការពារអ្នកពីជំងឺមហារីកមួយចំនួនផងដែរ ។ នៅក្នុងការសិក្សាផ្នែកវេជ្ជសាស្ត្រមួយ សារធាតុចម្រាញ់ពីផ្លែប៊័ររទប់ស្កាត់ការលូតលាស់របស់កោសិកាដែលត្រៀមកើតជំងឺមហារីក ដែលនាំឱ្យកើតជំងឺមហារីកមាត់ និងជំងឺមហារីកក្រពេញប្រូស្តាត ។ អាស៊ីត oleic ដែលមានក្នុងផ្លែប៊័រក៏ជួយការពារប្រឆាំងនឹងជំងឺមហារីកសុដន់ផងដែរ ។ ២-ធ្វើឲ្យប្រសើរឡើងនៃការស្រូបយកសារធាតុចិញ្ចឹម ៖ តាមការស្រាវជ្រាវបានរកឃើញថា រាងកាយរបស់អ្នកបានស្រូបយកសារជាតិចិញ្ចឹមបានល្អជាងមុននៅពេលបរិភោគផ្លែប៊័រ ។ នៅក្នុងការសិក្សាមួយ នៅពេលដែលអ្នកចូលរួមបរិភោគសាឡាត់លាយជាមួយផ្លែប៊័រ រាងកាយរបស់ពួកគេស្រូបយកសារជាតិ carotenoids បានប្រាំដងច្រើនជាងអ្នកដែលមិនបានទទួលទានវា ។ ៣-បន្ថយជាតិកូឡេស្តេរ៉ុល ៖ ផ្លែបឺរមានអាស៊ីត oleic ដែលជាជាតិខ្លាញ់ monounsaturated អាចបន្ថយជាតិកូឡេស្តេរ៉ុល ។ ការសិក្សាមួយដែលបានសិក្សាលើអ្នកមានជាតិកូឡេស្តេរ៉ុលខ្ពស់ បានបង្ហាញថា ការបរិភោគអាហារដែលមានផ្លែប៊័រក្នុងបរិមាណច្រើនអាចបន្ថយកម្រិតកូឡេស្តេរ៉ុលដែលមិនល្អ និងបង្កើនជាតិកូឡេស្តេរ៉ុលល្អ ។ ៤-ការពារសុខភាពបេះដូង ៖ ផ្លែប៊័រសម្បូរទៅដោយសារធាតុចិញ្ចឹមដែលជួយដល់សុខភាពបេះដូង ។ ជាតិប៉ូតាស្យូមក្នុងបរិមាណដ៏ច្រើនក្នុងផ្លែប៊័រអាចរក្សាតុល្យភាពសម្ពាធឈាម និងជួយទប់ស្កាត់ជំងឺបេះដូង និងជំងឺដាច់សរសៃឈាមខួរក្បាល ។ មើលពីរបៀបធ្វើទាំងអស់គ្នា! ប្រភព៖ YouTube Channel Healthy Food Kitchen