បើផ្ទះនៅម្តុំទួលគោក ហើយខ្ជិលជិះទៅរកអីញ៉ាំឆ្ងាយ អាចពិចារណា ៤ កន្លែងនេះបាន។ គេល្បីថាឆ្ងាញ់តៗគ្នាទៀតផង បើមិនសាកមិនដឹងទេ។

ជើងទាហិរទួលគោក

ជើងមាន់ ជើងទាដាក់គ្រឿង រសជាតិហិរៗ លក់ដាច់ណាស់ មួយថ្ងៃ លក់អស់ដល់ទៅ ១៥០គីឡូ អ្នកទិញចាំឡើងត្រៀបត្រា។ ឃើញបែបនេះហើយមិនចូលសាកនឹងគេម៉េចបាន ពេលបានជិះកាត់សាលាបឋមទួលគោកហើយ កុំរំលងណាចូលសាកនឹងគេ ព្រោះថារសជាតិមិនអន់ឡើយ។

លក់ដាច់យ៉ាងនេះ មិនបាច់ឆ្ងល់ថាមកពីមូលហេតុអ្វីនោះទេ គឺច្បាស់ជារឿងរសជាតិឆ្ងាញ់នេះហើយ បានជាម្នាក់ៗឈរចាំទិញបែបនេះនោះ។ ក្រៅពីជើងមាន់ ជើងទា ក៏មានផាក់ឡូវ ត្រីសាបាក់ នំបុ័ងសាច់ ផងដែរ ហើយបើតាមម្ចាស់ហាងលួចខ្សឹបប្រាប់Adminនោះក្នុងមួយថ្ងៃសរុបទាំងអស់គាត់លក់អស់ ១៥០គីឡូឯណោះ មិនមែនលំៗណា។

ជើងទាហិរទួលគោក
លេខទូរសព្ទ៖ 093 969 919 / 093 400 002
ទីតាំង៖ ផ្លូវ៥៦៦ចំហៀងសាលាបឯមទួលគោក ជាប់ក្រសួងសុខាភិបាល

ហាង ម្លិះនំបញ្ចុកសៀមរាប

ព្រោះតែ​ល្បី​ជាមួយ​រសជាតិ​ឆ្ងាញ់​មានការ​គាំទ្រ​បែបនេះ​ហើយ​ ពេលនេះ​ចុងភៅ​ដ៏​ចំណាន​ប្រចាំ​ហាង​ ក៏បាន​បង្កើត​មុខម្ហូប​ថ្មី​សម្រាប់​អតិថិជន​ដែល​មាន​ដូចជា៖ ​បាញ់ឆែវ​ ប្រហិត​ចៀន​ សាច់​ជ្រូក​អាំង​ បុកល្ហុង​ស្លាបមាន់​អាំង​ បុកល្ហុង​ក្ដាមប្រៃ​ បុកល្ហុង​ងាវ​ បុកល្ហុង​ជើងមាន់​ បុកល្ហុង​ខ្យង​ស្រែ​ បុកល្ហុង​បង្គា​រស្រស់​ បុក​ស្វាយខ្ចី​ និង​បុក​ពោត​។ និយាយរួម​ទៅ​ចង់​បុក​អី​ក៏មានដែរ​មិន​អោយ​ខកបំណង​ទេ​ អោយ​តែ​បាន​មកដល់​ហាង​ ហើយ​សំខាន់​គឺថា​រឿង​រសជាតិ​ឆ្ងាញ់​កប់​សារី​ហ្មង​ ស្នាដៃ​ចុងភៅ​មក​ពី​សៀមរាប​ធានា​មិន​អោយ​ខកបំណង​ទេ​ មួយ​មុខ​ណា​ក៏​ឆ្ងាញ់​ដែរ​ គឺថា​មិន​សរសើរ​មិនបាន​តែម្ដង​។

ហាង ម្លិះនំបញ្ចុកសៀមរាប
ទីតាំង៖ ផ្ទះលេខ១៩ ផ្លូវ៥៧៨ សង្កាត់បឹងកក់២ ខណ្ឌទួលគោក ភ្នំពេញ
(ក្រោយក្រសួងសុខាភិបាលប្រហែល ៥០ម៉ែត្រ ជិតផ្ទះសំណាក់ស្រែទុំ)
លេខទូរសព្ទ៖ 017 83 15 16 / 069 87 70 795

ហាង ដារ៉ាអាកោខ្ទិះអង់តែនទួលគោក

និយាយលេងសើចអីទំនងឆ្ងាញ់មែន អាកោខ្ទិះបើកពីឡាំងស៊ឹង ក្តៅៗហុយៗ ក្លិនភាយៗ ទំនងគួរអោយចង់ញ៉ាំណាស់ ហើយមិនត្រឹមតែមានអាកោខ្ទិះមួយមុខនោះទេ គឺមានច្រើនមុខទៀតដូចជា៖ នំល្ពៅបុក ចេកបុក នំចក្កច័នធម្មតា នំចក្កច័នស្លឹកតយ​ សុទ្ធតែទំនងឆ្ងាញ់ទាំងអស់ តម្លៃក៏សមរម្យដែរ។ សម្រាប់អ្នកចង់ទិញញ៉ាំអាចទៅម៉ោង២អីទៅអាចមានហើយ ឬអាចតេកុម្ម៉ង់មុនក៏បានតាមលេខទូរសព្ទ៖ 098 35 54 91 / 078 211 491 ។

ហាង ដារ៉ាអាកោខ្ទិះអង់តែនទួលគោក
លេខទូរសព្ទ៖ 098 35 54 91 / 078 211 491
ទីតាំង៖ ផ្លូវ២៨៩ អង់តែនទួលគោក
(ចាប់បើកពីម៉ោង៨ព្រឹក រហូតដល់ម៉ោង៥កន្លះល្ងាច)

ហាង ផ្ទះយ៉ាំមីម៉ាម៉ា

សាខាថ្មីរបស់ហាង ផ្ទះយាំុមីម៉ាម៉ា​ មានទីតាំងនៅម្ដុំផ្សារទួលគោកក៏មានអាហារជាច្រើនមុខទៀតដូចជា​៖ បុកពោតគ្រឿងសមុទ្រ ស៊ុបមី មីគាវ ស៊ុបជើងមាន់ ស៊ុបតុងយាុំជើងមាន់ឆ្នាំងភ្លើង បុកល្ហុងខ្ចង ស៊ុប និងអាហារជាច្រើនទៀតសុទ្ធតែកប់ហ្មង។ សម្រាប់អ្នកនៅម្ដុំទួលគោក កុំភ្លេចនាំគ្នាទៅសាកផងណា! សាខាទី២ របស់ ហាង ផ្ទះយាំុមីម៉ាម៉ា មាននៅជិតផ្ទះហើយ បើមិនទៅសាកម៉េចបាន?

ហាង ​ ផ្ទះយាំុមីម៉ាម៉ា​ សាខាទី ២
លេខទូរស័ព្ទ ៖ ​​010 93 65 52 / 089 78 66 19
ទីតាង៖ ផ្លួវលេខ 582 ជិតផ្សារទួលគោក សង្កាត់បឹងកក់២ ខណ្ឌទួលគោក

នៅសល់តែប៉ុន្មានថ្ងៃទៀត នឹងដល់ថ្ងៃឈប់សម្រាកបុណ្យអុំទូកប្រពៃណីជាតិខ្មែរយើងហើយ អ្នកខ្លះក៏ទៅដើរលេងតាមបណ្តាខេត្តនានា ចំណែកអ្នកខ្លះទៀតក៏ទៅលេងស្រុកកំណើត ដើម្បីជួបជុំបងប្អូនពុកម៉ែតាមទម្លាប់។ បើជួបជុំគ្នាហើយកុំឲ្យទំនេរមាត់ អាចសាករៀនធ្វើនំកូរដើម្បីញ៉ាំជុំគ្នាបាន ហើយអាចចែកបងប្អូន និងអ្នកជិតខាងបានទៀត។

គ្រឿងផ្ស៖

• ម្សៅខ្សាយ ៣ ខាំ
• ខ្ទិះដូងកំប៉ុងឬខ្ទិះដើមលាយខ្ទិះចុង ៨ ខាំ
• ស្ករស (ចង់លាយស្ករត្នោតក៏បាន) ២ ខាំកន្លះ
• ទឹកស្អាត ៩០០ មីលីលីត្រ
• អំបិល ១ ចឹប
• សណ្តែកលឿង ១ខាំ (លីងអោយឆ្អិនលាងទឹកអោយស្អាតតែហាមត្រាំទឹកយូរព្រោះធ្វើអោយសណ្តែកអត់ស្រួយឆ្ងាញ់)

គ្រឿងធ្វើខ្ទិះសម្រាប់ចាក់ពីលើ៖

• ខ្ទិះកំប៉ុងឬខ្ទិះដើមលាយខ្ទិះចុង ៣ ខាំ
• អំបិល ១ ចឹប
• ស្ករស ១ ចឹប
• ម្សៅឆា (លាយទឹកស្អាតបន្តិច) ២០ ក្រាម

វិធីធ្វើ៖

១. យកឆ្នាំង ១ (គូទក្រាស់) ឬខ្ទះស្ពាន់រឹតតែល្អ ដាក់គ្រឿងផ្សំទាំងអស់ចូលហើយយកទៅកូរអោយដាច់ទឹក (ល្បាយនំអត់ជាប់នៅបាតឆ្នាំង)។បើចង់អោយជ្រាយត្រូវដាក់ទឹកគុណនិង ២ ហើយកូរ (បើកភ្លើងតិចៗ) រហូតដល់ដាច់ទឹក។

២. យកល្បាយនំចាក់ចូលក្នុងថាសឬកណ្តូងស្លឹកចេក។

*ទឹកខ្ទិះសម្រាប់ចាក់ពីលើ: យកខ្ទិះដូងស្ករស និងអំបិលទៅដាំអោយពុះហើយចាក់ម្សៅឆាចូលដាំអោយពុះម្តងទៀតហើយរំងាស់ ១ ទៅ ២នាទី បន្ទាប់មកយកទៅច្រោះយកចាក់លើនំជាការស្រេច។

*នេះនំអាចយកខ្នុរទុំកាត់វែងៗដាក់ជំនួសសណ្តែកលឿងក៏បាន។

*ចង់ចាក់ខ្ទិះពីលើក៏បានអត់ក៏បាន តាមចំណូលចិត្ត។

ប្រភព៖ ឡាយ សុរិយា

អ្នកប្លុកបឹងកេងកង បើឃ្លាន ហើយមិនដឹងទៅញ៉ាំអី អាចមកសាកកន្លែងលក់របស់ឆ្ងាញ់ ៥ កន្លែងនេះបាន មានទាំងប្រហិត នំបញ្ចុក ស៊ុប សាច់គោអាំង ជាដើម។

តូប ស្រីលីនសាច់ស្ងោរផ្សារបឹងកេងកង

អ្នកនិយមដើរផ្សារបឹងកេងកង ប្រហែលជាមិនសូវរំលងតូបប្រហិតស្ងោរ សាច់ស្ងោរនេះទេ ព្រោះថាគ្រាន់តែក្រលេកឃើញគឺទំនងស្រក់ទឹកមាត់បាត់ទៅហើយ ដោយឃើញមានប្រហិត សាច់ស្ងោរ ខួរ និងគ្រឿងក្នុងស្ងោរដោតជាចង្កាក់ដាក់ពេញឆ្នាំងស៊ុបជះក្លិនមកភាយៗ ធ្វើអោយទប់អារម្មណ៍មិនចូលញ៊ាំមិនបានហ្មង។

បើតាមអ្នកលក់ប្រាប់Admin គឺថាក្នុងមួយថ្ងៃគាតលក់អស់ខួរស្ងោរចន្លោះពី៣០ ទៅ៤០គ្រាប់ ចំណែកឯងប្រហិត និងសាច់អស់ចន្លោះពី៣០០ ទៅ៤០០ចង្កាក់ឯណោះ។ មូលហេតុដែលគាត់លក់ដាច់បែបនេះក៏ដោយសារតែប្រហិត សាច់ស្ងោរ ខួរ និងគ្រឿងក្នុងស្ងោររបស់គាត់មានរសជាតិឆ្ងាញ់ស្ងោររំងាស់ជាមួយទឹកស៊ុបយ៉ាងពិសេស បូករួមជាមួយជ្រក់ ទឹកសៀង និងម្ទេសឆាដែលគាត់ធ្វើដោយខ្លួនឯងទៀតគឺរសជាតិកើនថ្វេដងញ៊ាំហើយចង់ញ៊ាំទៀត។

បន្ថែមពីនេះសម្រាប់អ្នកដែលចាប់អារម្មណ៍ចង់ញ៊ាំនៅផ្ទះក៏អាចធ្វើការខលកុម្ម៉ង់បានផងដែរ តាមរយៈលេខទូរសព្ទ 093 34 83 83 ។ ណ្ហើយរបស់ឆ្ងាញ់បែបនេះគួរតែឆ្លៀតទៅសាកអោយស្គាល់រសជាតិហើយ ហើយបើថាខ្ចិលទៅដល់កន្លែងកុម្ម៉ង់យកមកញ៊ាំនៅផ្ទះក៏បាន៕

តូប ស្រីលីនសាច់ស្ងោរផ្សារបឹងកេងកង
លេខទូរសព្ទ៖ 093 34 83 83
ទីតាំង៖ ក្នុងផ្សារបឹងកេងកង (ចូលតាមច្រកទី៣ នៅក្រោយតូបងាវខ្យង ទល់មុខតូបលក់គ្រឿងក្រអូប)

ហាង សាច់គោអាំង ឧត្តមបូទី

ហាង សាច់គោអាំង ឧត្តមបូទី សាច់អាំងពោះគោទឹកប្រហុក ដ៏ចាស់វស្សាលក់តាំងពីឆ្នាំ១៩៨៤ អ្នកម្លុកបឹងកេងកងច្បាស់ជាស្គាល់ព្រោះថាល្បីណាស់ភ្ញៀវពេញៗហាងរាល់ថ្ងៃមិនដែរចេះស្ងាត់ម៉េច ក៏ដោយសារតែរសជាតិដ៏ឈ្ងុយឆ្ងាញ់នៃសាច់អាំង ត្រូវជាតិខ្លាំងជាមួយទឹកប្រហុកប្រចាំហាងបានញ៊ាំច្បាស់ជាជក់មាត់ជីបៗ។

ថ្ងៃណាដែលនឹកចង់ជួបជុំមិត្តភក្តិ ក្រុមគ្រួសារហើយចង់ញ៊ាំសាច់អាំងពោះគោទឹកប្រហុកអីហ្នឹង ណាត់គ្នាមកទីនេះមកធានាថាមិនខកបំណងនោះទេ ព្រោះថាលក់៣៦ឆ្នាំហើយបទពិសោធន៍ និងរសជាតិមិនធម្មតាឯណា។ ក្រៅពីសាច់អាំងពោះគោទឹកប្រហុក ក៏មានសាច់គោងៀត ងៀតក្របី សាច់ក្រកគោ និងមានជាច្រើនមុខទៀតផងដែរ។

ហាង សាច់គោអាំង ឧត្តមបូទី
លេខទូរសព្ទ៖ 010 80 82 80 / 012 89 00 16
ទីតាំង៖ ផ្លូវលេខ២៨៨, ផ្ទះលេខ៤០c សង្កាត់បឹងកេងកង១ ខណ្ឌចំការមន រាជធានីភ្នំពេញ
ផែនទី៖ ចុចទីនេះ
(ចាប់បើកពីម៉ោង៤និង៣០នាទីរសៀល ដល់ម៉ោង៨យប់)

ហាង KAT 70

លឺតែនិយាយរឿងអ្នកសេដ អ្នកចង់កាត់ចិត្ត តិចអ្នកដែរអត់មានបញ្ហាទាំងអស់នេះអត់ហ៊ានមកអីទៅ ត្រូវតែមកណាព្រោះថាហាង KAT 70 មានលក់មុខម្ហូប គ្រឿងក្លែមច្រើនមុខឆ្ងាញ់ៗណាស់ដូចជា៖​ ភ្លាត្រកួនស្រួយ បាយឆាយ៉ាងចូវ បង្គារបំពងខ្ទឹមស ជើងទាញាំ បុកកាត់ចិត្ត ដែលជាម្ហូបជាប់ឈ្មោះប្រចាំហាងដែរនិងពេលបានញ៊ាំជាមួយស្រាកាត់ចិត្ត និងស្រាបៀរកម្ពុជាគឺរសជាតិកើនថ្វេរដង។

បែបនេះកុំភ្លេចណា មិនថាអ្នកចង់កាត់ចិត្ត រឺអ្នកដែលរីករាយទេអោយតែបានមកដល់ ហាង KAT 70 ដឹងតែពេញចិត្តស្ដូកតែម្ដងជាមួយរសជាតិម្ហូបដ៏ឆ្ងាញ់ បរិយាកាសល្អដែលមានចាក់បទភ្លេងកំដរយ៉ាងរ៉ូមែនទិក៕

ហាង KAT 70
លេខទូរសព្ទ៖ 086 76 68 78
ទីតាំង៖ ផ្លូវ២៧៨ សង្កាត់បឹងកេងកង១ ខណ្ឌបឹងកេងកង(ជិតវិមានឯករាជ្យ)
ផែនទី៖ ចុចទីនេះ

ហាង ស៊ុបអណ្ដាតភ្លើង លីវហ្គឺ

បើបានមកដល់ ហាង ស៊ុបអណ្ដាតភ្លើង លីវហ្គឺ ដាច់ខាតមិនអាចរំលងជាមួយស៊ុប ៣ប្រភេទដែលមានដូចជា៖ ស៊ុបមាន់ក្រពះត្រី ស៊ុបអណ្ដាតភ្លើង និងស៊ុបចំហ៊ុយ ដែលជាស៊ុបឆ្ងាញ់ប្រចាំហាងតែម្ដង។ ក្នុងឱកាសអបអរសាទរគំរប់ខួប ៥ឆ្នាំរបស់ហាង ក៏មានប្រម៉ូសិនបញ្ចុះតម្លៃ10% គ្រប់មុខម្ហូបទាំងអស់ដែលមានក្នុងហាង ជាពិសេសសម្រាប់ស៊ុបអណ្ដាតភ្លើង ឈុត ៦នាក់ តម្លៃធម្មតា ២៩.៨​​​$ ចុះមកសល់ម្នាក់ត្រឹមតែ ២៣.៨ដុល្លា តែប៉ុណ្ណោះ។ សម្រាប់ឈុត៦នាក់នេះមានបន្លែសាច់រហូតទៅដល់១២មុខឯណោះមានដូចជា៖ លៀសហូល លៀសសរ បង្គារស្រស់ មាន់ខ្មែរ មឹកបំពង់ សាច់កំភួនជើងគោ ត្រីតុកកែខ្លា ននោង ត្រាវបន្ទះ បណ្ដូលស្ពៃ ពោតបរាំង និងមើមឈូក។ បន្ថែមពីនេះហាងក៏មានការថែមជូនបង្អែមក្រោយញ៉ាំអាហាររួចថែមទៀតផង សម្រាប់ការប្រម៉ូសិននេះមានចាប់ពីខែមីនា រហូតដល់ខែឧសភា ឆ្នាំ២០២០។

ហាង ស៊ុបអណ្ដាតភ្លើង លីវហ្គឺ
លេខទូរសព្ទ៖ 088 666 3886 / 088 66 77 963
ទីតាំង៖ ផ្ទះលេខ៣០ ផ្លូវ៣៦០ សង្កាត់បឹងកេងកងទី១ ខណ្ឌចំការមន រាជធានីភ្នំពេញ រឺ ផែនទី ចុចទីនេះ
(ហាងចាប់បើកពីម៉ោង 9:30ព្រឹកដល់ម៉ោង 2:00រសៀល និងពីម៉ោង 4:30រសៀល ដល់ម៉ោង 10:00យប់)

ហាង នំបញ្ចុកសាច់ចិញ្ច្រាំ

សម្រាប់មីនុយថ្មីក្នុងឱកាសឆ្នាំថ្មីនេះ គឺ មីសួរសាច់មាន់ ដែលក្នុងនោះមានសាច់មាន់ លាយជាមួយឈាមមាន់ និងបង្កើនរសជាតិថែមមួយកម្រិតទៀតជាមួយទឹកត្រីផ្អែមម្ទេស។ នៅពេលដែលជ្រលក់សាច់មាន់ ជាមួយទឹកត្រីផ្អែមម្ទេស គឺថារសជាតិឆ្ងាញ់កប់សារី អាចនិយាយបានថាឆ្ងាញ់ជាងមីនុយចាស់ដែលល្បីប្រចាំហាងក៏ថាបាន។ បើគិតទៅដល់មីនុយចាស់ដែលមាន គុយទាវសាច់ចិញ្ច្រាំ នំបញ្ចុកសាច់ចិញ្ច្រាំ និងខួរក្ដាម វិញគឺថាត្រូវជាតិខ្លាំងណាស់ជាមួយម្ទេសឆាសាតេ ដែលលោកម៉ូយ កញ្ញាម៉ូយច្បាស់ជាដឹងច្បាស់ហើយ ថាឆ្ងាញ់ខ្លាំងកម្រិតណានោះ។

ហាង នំបញ្ចុកសាច់ចិញ្ច្រាំ
លេខទូរសព្ទ៖ 017 447 333
ទីតាំង៖ ផ្ទះលេខ១៧E0 ផ្លូវលេខ ២៨២ សង្កាត់បឹងកេងកងទី១ ខណ្ឌចំការមន រាជធានីភ្នំពេញ

ប្រហិតបាក់សៀក គឺធ្វេីពីសាច់ជ្រូក បៀកជាបន្ទះស្តេីងៗ ទំហំតូចល្មម ដាក់គុយទាវ ស៊ុបមី មីហឹរ ឆ្នាំងភ្លេីង ស៊ុប អាចច្នៃជាអាហារផ្សេងៗតាមចំណង់ចំណូលចិត្តបាន។អាចធ្វើញ៉ាំខ្លួនឯងតាមរូបមន្តខាងក្រោមនេះបាន៖

គ្រឿងផ្សំ៖

• សាច់ជ្រូកស្មាមុខចិញ្ច្រាំ ២ ខាំ
• ម្រេចម៉ដ្ឋ ១ ចឹប (ប្រើម្រេចស)
• អំបិល ១ ចុងស្លាបព្រាបាយ
• ម្សៅស៊ុប ១ ស្លាបព្រាកាហ្វេ
• ស្ករស កន្លះស្លាបព្រាកាហ្វេ
• ខ្ទឹមស ៣ កំពឹស
• ទឹកកក ៥ គ្រាប់ប៉ុនមេដៃ
• ទឹកស្អាត ២ ស្លាបព្រាបាយ
• ម្សៅឆា ១ចុងស្លាបព្រាបាយ

វិធិធ្វើ៖

កិនសាច់ និងគ្រឿងចូលគ្នាទាំងអស់ឲ្យម៉ដ្ឋល្អ និងប្តូរទៅជាពណ៌ផ្កាឈូកស្រាល។

វិធីចម្អិន៖

ដាំទឹកពុះ ដាក់ស្ករស ម្សៅសុប។ យកចានអុីណុកបៀកប្រហិត ស្តេីងៗ នៅមាត់ចាន ហេីយដាក់ចានចូលក្នុងឆ្នាំង ដោយប្រេីភ្លេីងល្មម កុំអោយទឹកចូលក្នុងចាន ។ បិទគ្របឆ្នាំងកុំអោយជិតព្រោះអាចផុល មិនអញ្ចឹងទឹកនឹងចូលចានប្រហិត។ ប្រសិនចំហរគម្របក៏បាន គ្រាន់តែរៀងយូរឆ្អិនជាងផ្អឹបគំរប។ពេលឆ្អិនប្រេីចុងកាំបិតឆ្កឹះចេញជាការស្រេច ហេីយបន្តរបៀករហូតទាល់តែអស់សាច់ប្រហិត។