ភ្នំពេញ៖ កម្មវិធីភាពយន្ត ប្រចាំឆ្នាំ២០១៧ (Movie of The Year 2017) លើកទីពីរដែលជាកម្មវិធី រៀបចំឡើង ដោយរោងភាពយន្ត លេជេន (Legend Cinema) បានបញ្ចប់ ដោយជោគជ័យ ដោយស្វែងរកឃើញ ភាពយន្តលេចធ្លោរ បំផុតប្រចាំឆ្នាំ២០១៧នេះ។ ភាពយន្ត «មុនដំបូងខ្មែរក្រហម សម្លាប់ប៉ារបស់ខ្ញុំ ឬ First They Killed My Father» ត្រូវបានផលិត ដោយកំពូលតារាសម្ដែងលំដាប់ ពិភពលោក អ្នកនាង Angelina Jolie និងបានប្រកាស ចាក់បញ្ចាំងកាលពី អំឡុងខែកញ្ញាកន្លងទៅ។ មុនទទួលបានជ័យលាភី ខាងលើរឿង «មុនដំបូងខ្មែរក្រហម សម្លាប់ប៉ារបស់ខ្ញុំ» បានជ្រើសរើស ខ្សែភាពយន្តមួយ ក្នុងចំណោមភាពយន្ត ចំនួន១០រឿង ទាំងរឿងជាតិ និងអន្តរជាតិ ដែលរកប្រាក់ចំណូល បានច្រើនជាងគេ ប្រចាំឆ្នាំ២០១៧ នៅរោងភាពយន្ត លេជេន មកដាក់ប្រកួតប្រជែងគ្នា។ ការបោះឆ្នោត មាន២ដំណាក់កាល ធំៗដែលដំណាក់កាល ទី១ ពានរង្វាន់ខ្សែភាពយន្តខ្មែរ ប្រចាំឆ្នាំ២០១៧ ចាប់ពីថ្ងៃទី១៥ រហូតដល់់ ថ្ងៃទី២០ ខែធ្នូ ឆ្នាំ២០១៧។ រីឯដំណាក់កាលទី២ ពានរង្វាន់ខ្សែភាពយន្ត ប្រចាំឆ្នាំ២០១៧ ចាប់ពីថ្ងៃទី២១ រហូតដល់់ ថ្ងៃទី២៦ ខែធ្នូ ឆ្នាំ២០១៧។

លោក ឈាង ឆដាភ័ក្រ ប្រធានការិយាល័យ ពិនិត្យខ្លឹមសាររូបភាព និងចំណាត់ថ្នាក់ភាពយន្ត បានថ្លែងកោតសរសើរ ចំពោះកម្មវិធីភាពយន្ត ប្រចាំឆ្នាំ២០១៧ (Movie of The Year 2017) លើកទីពីរ ដែលឆ្លុះបញ្ចាំង ពីការយកចិត្ត ទុកដាក់និងលើកកម្ពស់ វិស័យភាពយន្ត នៅក្នុងស្រុក។ សម្រាប់ការសុំទិដ្ឋាការ ក្នុងការផលិតភាពយន្ត ក្នុងឆ្នាំនេះ មានចំនួនច្រើន ជាងឆ្នាំមុន ទាំងភាពយន្តខ្នាតធំ និងភាពយន្តភាគ ក្នុងនោះក៏មានភាពយន្ត ដែលផលិតដោយឧហ្សាហកម្ម ភាពយន្តបរទេស ជាច្រើនផងដែរ។ លោករំពឹងដែរថា ព្រឹត្តិការណ៍នេះ នឹងកើតមានជារៀងរាល់ឆ្នាំ ដើម្បីចូលរួមចំណែក លើកកម្ពស់វិស័យ ភាពយន្តខ្មែរ ឲ្យកាន់តែមានគុណភាព ប្រកបដោយភាព ប្រកួតប្រជែង។

តំណាងរោងភាពយន្ត លេជេន អ្នកស្រី គីវ ឆវ៉េត បានថ្លែងថា នេះគឺជាលើកទី២ហើយ ដែលរោងភាពយន្ត លេជេន រៀបចំព្រឹត្តិការណ៍បែបនេះឡើង គឺក្នុងគោលបំណង ចូលរួមលើកស្ទួយ វិស័យភាពយន្ត នៅកម្ពុជា ហើយវាក៏នឹងក្លាយ ជាព្រឹត្តិការជួបជុំ សិល្បករ ផលិតករ និងអ្នកពាក់ព័ន្ធ វិស័យភាពយន្ត ផងដែរ។ ពីមួយថ្ងៃទៅមួយថ្ងៃ គុណភាពនៃការផលិត ភាពយន្តខ្មែរ កាន់តែមានការវិវឌ្ឍន៍ ឈានឡើងជាបន្តបន្ទាប់គួរឲ្យកត់សម្គាល់។ ព្រឹត្តិការណ៍ពិសេសបែបនេះ នឹងបន្តរៀបចំ ឲ្យមាននៅចុងឆ្នាំក្រោយ បន្តទៀតដែលនឹងមានអ្វី កាន់តែពិសេស ជាងឆ្នាំនេះទៀត។

រោងភាពយន្ត លេជេន ក៏សូមថ្លែងអំណរគុណយ៉ាងជ្រាលជ្រៅ ដល់ម្ចាស់ឧបត្ថម្ភកម្មវិធី ដូចជាក្រុមហ៊ុននាំចូល និងចែកចាយភាពយន្ត WML , ផលិតកម្ម Kongchak Pictures, អេអាយអេ (ខេមបូឌៀ) ឡាយហ៍ អ៊ិនសូរេន (AIA), Uber, និងអ្នកសហការឧបត្ថម្ភដោយ KOI Cafe´, Joma Cafe´Bakery Cambodia, Rotiman Cafe, Jaikon TV, myBurgerLap និងបណ្ដាអ្នកឧបត្ថម្ភផ្សេងៗទៀត៕

(ភ្នំពេញ)៖ រោងភាពយន្ត​លេជេន (Legend Cinema) ដែលជារោងភាពយន្តទំនើបដំបូងគេបង្អស់នៅក្នុងប្រទេសកម្ពុជា នឹងកំពុងតែទទួលបានការគាំទ្រខ្លាំង ពីសំណាក់ទស្សនិកជន នឹងរៀបចំព្រឹត្តិការណ៍​ដ៏ធំមួយ គឺព្រឹត្តិការណ៍​ភាពយន្តប្រចាំឆ្នាំ២០១៧ (Movie of The Year 2017) ជាលើកទីពីរ ក្នុងគោលបំណងបន្តការចូលរួមលើកស្ទួយ វិស័យភាពយន្តនៅកម្ពុជា។​ ព្រឹត្តិការណ៍ភាពយន្តប្រចាំឆ្នាំ​២០១៧ (Movie of The Year 2017) នេះ នឹងត្រូវប្រារព្ធឡើង នៅរោងភាពយន្តលេជេន ទួលគោក ក្នុងបរិវេណផ្សារទំនើប TK Avenue ចាប់ពីម៉ោង​៤៖០០នាទីរសៀល​តទៅ។ កម្មវិធីនេះ នឹងមានអ្នកចូលរួម ពីសំណាក់សិល្បករ  ផលិតករ ប្រមាណជាង៣០០នាក់។ ​ក្រៅពីការបង្កើតបរិយាកាស ក្នុងការទំនាក់ទំនងរវាង អ្នកពាក់ព័ន្ធនៅក្នុង វិស័យភាពយន្តនៅកម្ពុជា រោងភាពយន្តក៏មានគោលបំណងដ៏ធំមួយ ក្នុងការចូលរួមលើកកម្ពស់ ការផ្សព្វផ្សាយវិស័យខ្សែភាពយន្ត នៅកម្ពុជាផងដែរ។​

អ្វីដែលកាន់តែពិសេសសម្រាប់កម្មវិធីនេះគឺ ក៏មានការចូលរួមពីសំណាក់ តារាចម្រៀងល្បីៗ ពីផលិតកម្មរស្មីហង្សមាស លោក ឆន សុវណ្ណរាជ និងក្រុមរាំ 4Nix សម័យទំនើបល្បីៗផ្សេងៗទៀត ​ដើម្បីអោយកម្មវិធីកាន់តែមានភាពអធិកអធម និងសប្បាយរីករាយ​។​ លោក ព្រំ បញ្ញាវ័ន្ត តំណាងផ្នែកទីផ្សារ របស់រោងភាពយន្តលេជេន បានថ្លែងឲ្យដឹងថា ក្រុមហ៊ុន និងផលិតកម្មធំៗចំនួន ៣ នឹងត្រូវបានអញ្ជើញឲ្យចូលរួម ក្រោយពីខ្សែភាពយន្តរបស់ពួកគេ បានក្លាយជាខ្សែភាពយន្តដ៏ល្បីពេញនិយមប្រចាំឆ្នាំ និង​រកប្រាក់ចំណូលបានខ្ពស់ច្រើនជាងគេ ដូចជា ក្រុមហ៊ុននាំចូលនិង ចែកចាយភាពយន្ត​ WML, ផលិតកម្ម LD Picture និងផលិតកម្ម Kongchak Pictures ជាដើម។ ​ផលិតករ និងក្រុមហ៊ុនទាំងអស់ នឹងមានឱកាស បង្ហាញពីគម្រោងក្នុងការផលិត និងការត្រៀមដាក់បញ្ចាំងខ្សែភាពយន្តថ្មីៗ របស់ពួកគេនាពេលអនាគត ក្នុងឱកាសនេះ​។

លោក​ ព្រំ បញ្ញាវ័ន្ត បានថ្លែងបន្តឲ្យដឹងទៀតថា នៅក្នុងនោះយើងបានជ្រើសរើសខ្សែភាពយន្តចំនួន១០រឿង ទាំងរឿងជាតិ និងអន្តរជាតិ ដែលរកប្រាក់ចំណូលបានច្រើនជាងគេប្រចាំឆ្នាំ២០១៧នៅរោងភាពយន្តលេជេន មកដាក់ប្រកួតប្រជែងគ្នា ដើម្បីស្វែងរករឿងដែលល្អជាងគេ តាមរយៈការបោះឆ្នោតពីសំណាក់ប្រិយមិត្ត នៅលើគ្រប់គេហទំព័ររបស់រោងភាពយន្តលេជេន។ ការបោះឆ្នោតមាន២ដំណាក់កាលធំៗ:

• ដំណាក់កាលទី១: ពានរង្វាន់ខ្សែភាពយន្តខ្មែរប្រចាំឆ្នាំ២០១៧ ចាប់ពីថ្ងៃទី១៥ រហូតដល់់ ថ្ងៃទី២០ ខែធ្នូ ឆ្នាំ២០១៧។
• ដំណាក់កាលទី២:​ ពានរង្វាន់ខ្សែភាពយន្តប្រចាំឆ្នាំ២០១៧ ចាប់ពីថ្ងៃទី២១ រហូតដល់់ ថ្ងៃទី២៦ ខែធ្នូ ឆ្នាំ២០១៧។

លទ្ធផលបន្ទាប់ពីការបោះឆ្នោតនេះ នឹងត្រូវបានយកមកប្រកាសនៅអំឡុងនៃកម្មវិធី ខ្សែភាពយន្តប្រចាំឆ្នាំ ២០១៧ ជាមួយនឹងពានរង្វាន់ និងលិខិតសរសើរ ពីរោងភាពយន្តលេជេនដោយផ្ទាល់​ហើយសម្រាប់ផលិតករដ៏ទៃៗទៀតដែលមិនបានទទួលជ័យលាភីនៅយប់នោះក៏ទទួលបាននៅលិខិតសរសើរផងដែរ សម្រាប់ខ្សែភាពយន្តដែលមានប្រជាប្រិយភាពជាងគេប្រចាំឆ្នាំ២០១៧ ក្នុងចំណោមខ្សែភាពយន្តជាច្រើនរឿងដែលបានចាក់បញ្ចាំងនៅរោងភាពយន្តលេជេន ចាប់ពីដើមខែមករា រហូតដល់ ពាក់កណ្តាលខែវិច្ឆិកា ឆ្នាំ២០១៧។ ដើម្បីបន្តការលើកតម្កើងបន្ថែមទៀតនៅខ្សែភាពយន្តខ្មែរ សម្រាប់រឿងខ្មែរដែលឈ្នះពានរង្វាន់ខ្សែភាពយន្តខ្មែរឆ្នើម នៅអំឡុងនៃកម្មវិធីនឹងត្រូវបានយកមកបញ្ចាំងឡើងវិញសម្រាប់ភ្ញៀវកិត្តិយសដែលអញ្ជើញមកចូលរួមក្នុងរាត្រីនៃកម្មវិធីផងដែរ។

ជាចុងក្រោយ រោងភាពយន្តមានសេចក្តីថ្លែងអំណរគុណយ៉ាងខ្លាំងដល់ម្ចាស់ឧបត្ថម្ភធំពី ក្រុមហ៊ុននាំចូលនិង ចែកចាយភាពយន្ត​​ WML ផលិតកម្ម Kongchak Pictures អេអាយអេ (ខេមបូឌៀ) ឡាយហ៏​ អ៊ិនសូរេន (​AIA)​, Uber, សហការឧបត្ថម្ភដោយ KOI Café​, Joma Café Bakery Cambodia និងបណ្តាឧបត្ថម្ភផ្សេងៗទៀត។