គាវស្នូលស្លឹកគូឆាយ ធ្វើហើយយកទៅចៀនក៏បាន ចំហុយក៏បាន រសជាតិម្នាក់ម៉្យាងទេ។​ នេះវិធីធ្វើ ទំនេរៗសាកធ្វើញ៉ាំលេងទៅ៖

គ្រឿងផ្សំ៖

• ស្លឹកគូឆាយ ១០០ក្រាម
• សាច់ (ជ្រូក ឬ មាន់) ១០០ ក្រាម
• ពងមាន់ស្រែ ២គ្រាប់ ប្រសិនប្រេីពងមាន់ កសិកម្ម តែ១គ្រាប់បានហេីយ
• ខ្ទឹម ចិញ្រ្ជាំ ៣កំពឹស
• ម្រេចម៉ដ្ឋ ១ ចឹប ស្ករ ១ ចឹប អំបិល ១ ចឹប ម្ស៉ៅខ្ទឹមអំបិល ១ ចឹប ប្រេងល្ងរកូរ៉េឬជប៉ុន ៣ ដំណក់

វិធីធ្វើ៖

 ១. វៃពងមាន់អោយសព្វល្អ ហេីយដាក់គ្រឿងចូលទាំងអស់លាយចូលគ្នា រួចក៏ខ្ចប់ម្តងមួយៗ រហូតដល់អស់ ចំហុយ ២០ ទៅ ២៥នាទី

២. សម្រាប់ចៀន ប្រហែល ១០ ទៅ ១៥ នាទីប៉ុណ្ណោះ។ ដាក់ប្រេងចូលខ្ទះបន្តិច រៀបគាវលេីខ្ទះ ចាក់ទឹកចូលជិតលិចគាវ គ្របគំរប បេីកភ្លេីងល្មម។

៣. ចៀនដល់ជិតអស់ទឹក សូមចំហរគំរប ដល់ពេលអស់ទឹក បាតនំចាប់ផ្តេីមក្រហមនិងស្រួយ គឺឆ្អិនអាចទទួលបានហេីយ។
ប្រសិនញ៉ាំមិនអស់អាចចំហុយ ហេីយបង្កកទុក ពេលចង់ញ៉ាំយកមកកំដៅ ឬចៀនបាន។

បញ្ជាក់ ៖ សំបកគាវស្រស់ៗ អាចរកបាននៅតាមផ្សារទំនេីប ឬនៅផ្សារម្ហូបជប៉ុន។

នំបញ្ចុកស្រុះជើងជ្រូក ជាម្ហូបរបស់ប្រទេសជិតខាង តែពេញនិយមនៅស្រុកយើងណាស់ ព្រោះវាមានរសជាតិឆ្ងាញ់។គ្រាន់តែមើលរូបហើយ ក៏ចង់ចុចមើលរូបមន្តធ្វើដែរត្រូវអត់? គិតអីយូរ មើលរូបមន្តហើយស៊េវទុក ថ្ងៃណាទំនេរធ្វើញ៉ាំម៉ាផ្ទះហ្មង។

គ្រឿផ្សំ៖

• ជើងជ្រូក ៧០០ ក្រាម
• សាច់ជ្រូកចិញ្ច្រាំ ៣០០ ក្រាម
• ប្រហិតសាច់គោ ៣០០​ ក្រាម ឬប៉ាត់តេ ៣០០ ក្រាម (ដាក់ក៏បាន អត់ក៏បាន តាម​ការចូលចិត្ត)
• បង្គារក្រៀម ២ ស្លាបព្រាបាយ (លាងទឹកឲ្យស្អាត ហើយចិញ្ច្រាំឲ្យម៉ត់)
• ឈាមមាន់ ២​ ឬ ៣ ដុំ (ដាក់តាមការចូលចិត្ត)
• តៅហ៊ូ ៣ដុំ (កាត់ដុំៗ ហើយយកទៅបំពង ឬ ចៀន)​
• សាច់ក្តាមម៉ត់ ១ កែវ (អាចទិញបាននៅតាមផ្សារធម្មតា ឬផ្សារទំនើប អាចមើលតាមរូបខាងក្រោម)
• ប៉េងប៉ោះទុំ ៣ ផ្លែ (កាត់ដុំៗជា ៤ ឬ ៥ដុំ តាមទំហំរបស់ប៉េងប៉ោះ)
• ខ្ទឹមបារាំង ១ ចំហៀង
• ខ្ទឹម ស (ដំ ៥ កំពឹស និង ចិញ្ច្រាំ ៤ កំពិស)
• អំបិល៣ស្លាបព្រាកាហ្វេ ទឹកត្រី៣ស្លាបព្រាបាយ ស្ករស​៣ស្លាបព្រាកាហ្វេ ទឹកប្រេងខ្យងកន្លះស្លាបព្រាបាយ
• ពងមាន់ ២ គ្រាប់
• បន្លែសម្រាប់ល្បោយ ដាក់តាមចូលចិត្ត មានដូចជា​សណ្តែកបណ្តុះ ត្រកួន​ ត្រយ៉ូងចេក ស្លឹកគូឆាយ ជី​
• កាពិ អំពិលទុំ និង ម្ទេសហាន់ សម្រាប់បន្ថែមរសជាតិ
• នំបញ្ចុក​ ២ គីឡូ

វិធីធ្វើ៖

១.​ លាងជើងជ្រូកកោសឲ្យស្អាត ដាក់ឆ្នាំងដាំទឹកឲ្យពុះ រួចស្រុះជើងជ្រូក ​បន្ទាប់មកស្រង់ជើងជ្រូកចេញ​រួចលាងជាមួយទឹកត្រជាក់ម្តងទៀតឲ្យបានស្អាត

២. ដាក់ឆ្នាំងដាំទឹកប្រហែល ៣,៥ ទៅ ៤ លីត្រ។ ទឹកពុះដាក់ជើងជ្រូកចូលរួច បង់អំបិលមួយស្លាបព្រាកាហ្វេ ខ្ទឹមសដំហើយ៥កំពិស និងខ្ទឹមបារាំងចូល។ ដួសពពុះខ្មៅចេញពីទឹកស៊ុបដើម្បីឲ្យទឹកស៊ុបថ្លាល្អ។ រំងាស់ដោយបើកភ្លើងតិចល្មមៗចំនួន ២៥ ទៅ ៣០នាទី

៣. យកសាច់ជ្រូកចិញ្ច្រាំ លាយជាមួយនឹងសាច់ក្តាមម៉ត់ បង្គាក្រៀមដែលចិញ្ច្រាំរួច គោះពងមាន់ពីរគ្រាប់ដាក់ រួចដាក់អំបិលកន្លះស្លាព្រាកាហ្វេ ស្ករស១ស្លាបព្រាកាហ្វេ ទឹកប្រេងខ្យងកន្លះស្លាបព្រាបាយ និងទឹកត្រីកន្លះស្លាបព្រាបាយ រួចកូរចូលគ្នាឲ្យសព្វ ហើយទុកមួយអន្លើ

៤. ដាក់ខ្ទះចាក់ប្រេងឆាបន្តិចចូលឲ្យក្តៅរួចដាក់ខ្ទឹមសលីងឲ្យឈ្ងុយ រួចដាក់ប៉េងប៉ោះចូល ឆាប្រហែល២នាទី រួចហើយចាក់ប៉េងប៉ោះដែលឆារួចចូលក្នុងឆ្នាំងទឹកស៊ុបជើងជ្រូក។

៥. ដាក់ខ្ទះ ចាក់ប្រេងឆាចូលបន្តិច ប្រេងឆាក្តៅចាក់សាច់ជ្រូកចិញ្ច្រាំដែលលាយរួចចូលក្នុងខ្ទះ ឆាវាឲ្យទៅជាដុំៗប្រហែលជា២​ ទៅ ៣នាទី (មិនចាំបាច់ឲ្យឆ្អិនទេ ឆាដើម្បីយកពណ៍ និងក្លិនឈ្ងុយប៉ុណ្ណោះ) រួចចាក់សាច់ដែលឆារួចនោះចូលក្នុងឆ្នាំងស៊ុបជើងជ្រូក

៦. ដាក់ឈាមមាន់ តៅហ៊ូ ប្រហិតសាច់គោ និងប៉ាត់តេ ចូលក្នុងស៊ុប រួចបន្ថែមអំបិល១,៥ស្លាព្រាកាហ្វេ ស្ករស២ស្លាបព្រាកាហ្វេ ទឹកត្រី២,៥ស្លាបព្រាបាយ។ ភ្លក់និងថែមគ្រឿងទៅតាមការចូលចិត្ត។

បញ្ជាក់៖ រូបខាងក្រោមខ្ញុំយកចេញពីអ៊ីនធឺណេតទេ នំបញ្ចុកដែលខ្ញុំធ្វើ ខ្ញុំញុំាអស់ហើយអត់បានថតទេ​។ បងប្អូនអាចដាក់ជើងមាន់បន្ថែមក្នុងស៊ុបក៏បាន។ ខ្ញុំអត់ប្រើប៊ីចេង ឬម្សៅស៊ុបទេ​ បងប្អូនអាចដាក់បានតាមការចូលចិត្ត។ សាច់ក្តាមក្នុងរូបខាងក្រោមប្រើម៉ាកមួយណាក៏បានដែរ។

ស្អែកជាថ្ងៃចុងសប្ដាហ៍យមានគិតថាធ្វើបង្អែមញ៊ាំជុំគ្រួសារអត់ បើមានមិនបាច់គិតអីច្រើនទេធ្វើបង្អែមផ្កានេះហើយ ព្រោះថាការធ្វើមានភាពងាយស្រួល មិនមានគ្រឿងផ្សំច្រើនហើយ លឿនទៀតសម្រាប់ការចម្អិនបង្អែមមួយមុខនេះ។ ចង់ដឹងថារបៀបធ្វើ និងគ្រឿងផ្សំត្រូវមានអ្វីខ្លះកុំភ្លេចមើលនៅខាងក្រោមនេះ។

◀️ គ្រឿងផ្សំដែលត្រូវមាន៖

• ល្ពៅ
• ដំឡូងស្វាយ
• ម្សៅដំណើប
• ម្សៅមី
• ស្ករក្រហម
• ខ្ទិះដូង
• ស្លឹកតយ
• អំបិល

◀️ វីដេអូបង្រៀនពីរបៀបធ្វើ៖

ស្រក់ទឹកមាត់ម្នាក់ឯងមិនសូវទំនង បើបានស្រក់ជុំគ្រួសាររឹតតែឆ្ងាញ់។ ជួបជុំគ្នាកម្មវិធីតិចតួច​នៅផ្ទះ នឹកធ្វើអីញ៉ាំមិនឃើញ ម៉េចមិនសាកធ្វើបង្គាកោះកុងនេះញ៉ាំមើល ចង់ក្លែមក៏ឆ្ងាញ់ដែរ។

គ្រឿងផ្សំ៖

• បង្គា
• ខ្ទឹមស ខ្ទឹមក្រហម ( ចិញ្ច្រាំអោយម៉ត់បន្តិច )
• ម្ទេស ( កុំចិញ្ច្រាំ តែត្រូវយកទៅបុកវិញ កុំអោយម៉ត់ )
• អំបិល ស្ករស ម្សៅស៊ុប ក្រូចឆ្មា ទឹកត្រី ទឹកសូដា
• ទឹកដោះគោខាប់ ជីអង្គាម ជីបន្លា ម្រះ

វិធីធ្វើ៖

១. យកបង្គាមកបកអោយស្អាត ហើយកាត់តាមបណ្ដោយខ្លួនជាពីរ ( កុំអោយដាច់ពីគ្នា ) បន្ទាប់មកយកមករៀបដាក់ចាន ដែលត្រូវទទួលទាន អោយមើ់លទៅស្អាត រួចយកទៅដាក់ក្នុងទូរទឹកកក ទុកអោយត្រជាក់ (ដាក់ទឹកសូដាក៏បាន)
២. ច្របាច់ទឹកក្រូចឆ្មាដាក់ចាន រួចដាក់ខ្ទឹមស ខ្ទឹមក្រហម និងម្ទេស ( ទុកប្រហែល10 នាទី ដើម្បីកុំអោយក្រពុលខ្ទឹម ) ហើយដាក់អំបិល ទឹកត្រី ស្ករស ម្សៅស៊ុប និងទឹកដោះគោខាប់បន្តិច រួចភ្លក់មើលអោយល្មម តាមការចូលចិត្ត ។

៣. ពេលទទួលទាន ទើបយកបង្គាដែលយើងបានក្លាសេទុក យកមកស្រោចទឹកម្ទេសពីលើអោយសព្វ ហើយបន្ថែម ជីអង្គាម ជីបន្លាពីលើតិច លំអរ ម្រះហាន់ស្តើងៗរៀបក្រោមចានដូចរូបរួចជាការស្រេច ៕
មុខម្ហូបនេះត្រូវការប្រើម្ទេសច្រើន អោយហិរខ្លាំង ដើម្បីអោយបង្គាឆ្អិនល្អ

គ្រាន់តែឮថាក្រឡុកដូងទឹកដោះគោស្រស់ ក៏ទំនងបាត់ទៅហើយ។ បើមើលពីរបៀបធ្វើវិញរឹងតែស្រួល ចង់ធ្វើញ៉ាំ គ្មានអីពិបាកទេ ត្រូវការតែគ្រឿងផ្សំពីរបីមុខមក ធ្វើបានហើយ។

គ្រឿងផ្សំ៖

• សាច់ដូង ២៥០ ក្រាម
• ទឹកដោះគោស្រស់ កន្លះកែវ
• ទឹកស្ករ កន្លះកែវ
• អំបិល ១ ជឹប
• ទឹកដូង ២ កែវ
• ទឹកកក ៥០០ ក្រាម

របៀបធ្វើ៖

១. កាប់ដូងយកទឹកដូង បន្ទាប់មកកោសយកសាច់ដូង
២. ដាក់សាច់ដូង ទឹកដោះគោស្រស់ ទឹកស្ករ អំបិល ទឹកដូង ទឹកកក ចូលទៅក្នុងម៉ាសុីនក្រឡុក ហើយក្រឡុកអោយសព្វរួចរាល់ជាការស្រេច។