រាជធានីភ្នំពេញ ៖ មុនពេលក្លាយជាកញ្ញាឯកកម្ពុជា (Miss Cambodia) កញ្ញារឿន ស៊ីណាត ធ្លាប់ឆ្លងកាត់ជីវិតតស៊ូមិនចាញ់បុគ្គលតស៊ូក្នុងវិថីជីវិតផ្សេងទៀតទេ ។ កញ្ញាស៊ីណាតបានព្យាយាមតស៊ូរស់នៅជាមួយភាពលំបាកជាច្រើនទម្រាំមានពេលនេះ ។
កញ្ញាឯកកម្ពុជារឿង ស៊ីណាត មានកម្ពស់១,៦៨ម៉ែត្រ ជាអ្នកស្រុកព្រែកពោធិ៍ ខេត្តកំពង់ចាម ។ សព្វថ្ងៃនាងកំពុងសិក្សាថ្នាក់ទី១២នៅវិទ្យាល័យទួលទំពូង។ កាលពីពេល ថ្មីៗកន្លងមករឿន ស៊ីណាតឱ្យដឹងថា តាំងពីជាប់កញ្ញាឯកមកនាងប្លែកខុសពីមុន ដោយសារតែនាងជាក្មេងស្រីស្រុកស្រែម្នាក់ ហើយបែរជាមានគេស្គាល់ច្រើន ។
កញ្ញារឿង ស៊ីណាត ត្រៀមខ្លួនទៅចូលរួមប្រឡងសម្រស់នៅលើឆាកអន្តរជាតិ នាពេល ឆាប់ ឆាប់ៗខាងមុខ ។ នាងនឹងធ្វើខ្លួនជាស្ត្រីខ្មែរម្នាក់ទៅបញ្ចេញភាពក្លាហាននៅលើឆាកពិភពលោក ។ «អ្វីដែលនាងខ្ញុំប្រាថ្នា គឺចង់គ្រងឈុត«អប្សរា»នៅលើឆាកធំលំដាប់ពិភពលោក ដែលបង្ហាញឲ្យឃើញពីភាពទន់ល្លន់ តែរឹងមាំមិនចុះញ៉មរបស់នារីខ្មែរ និងជាដួងព្រលឹងរបស់នារីខ្មែរ» ។
កញ្ញារឿន ស៊ីណាត ចង់ធ្វើជាពិធីការិនីជាជំហានដំបូងក្រោយពេលជាប់កញ្ញាឯកកម្ពុជា ដោយនាងមានប្រវត្តិធ្លាប់គ្រងការងារជាពិធីការិនីនៅវិទ្យុABCកាលពី២ឆ្នាំមុន ។ នាងនិយាយថាពីមុននាងជាពិធីការិនីនៅវិទ្យុអេប៊ីស៊ីដូច្នេះហើយទើបចង់ក្លាយជាពិធីការិនីល្បីឈ្មោះនៅលើកញ្ចក់ទូរទស្សន៍ម្តង ។ ក្រៅពីនេះនាងចង់សម្តែងភាពយន្ត នៅពេលនាងផុតកិច្ចសន្យាជាមួយក្រុមហ៊ុនដែលនាងក្លាយជាកញ្ញាឯក ។ បើទោះជានាងជាប់កិច្ចសន្យាជាមួយក្រុមហ៊ុនមែន តែជឿជាក់ថានាងមិនបាក់ប្រជាប្រិយភាពទេ ព្រោះក្រុមហ៊ុនបានបំពេញបំណងនាងជាច្រើន ដោយបើកផ្លូវឲ្យនាងក្នុងវិថីសិល្បៈ ។
ចាប់តាំងពីកញ្ញារឿន ស៊ីណាត ជាប់ជាកញ្ញាឯកកម្ពុជាមក នាងបានបង្ហាញវត្តមានក្នុងសង្គមជាច្រើន ដូចជាការដាំដើមឈើ ការសួរសុខទុក្ខកុមាររស់នៅតាមអង្គការមួយចំនួន ដើម្បីជាគំរូមុននឹងទៅចូលរួមប្រឡងសម្រស់លំដាប់ថ្នាក់ពិភពលោក ៕
