ចូលមើលចំកន្លែងហើយ ចម្លើយនេះអាស្រ័យលើសមត្ថភាពអ្នកដែរ ជាធម្មតាទេដើម្បីជួយសន្សំលុយខ្លះសម្រាប់អ្នកទាំងអស់គ្នា ដែលចង់បានរបស់ញ៊ាំល្អហើយ ធូរថ្លៃយើងរៀងចំណាយជំនាញថ្វីមាត់បន្តិចហើយ តែសម្រាប់ទីតាំងនឹងតិចនិកផ្សេងទៀត ចាំ Admin អ្នកត្រួសត្រាយបង្ហាញប្រាប់ទៅចុះ។
ជាធម្មតាទេបងប្អូនយើង ដែលធ្វើដំណើរទេសចរណ៍ពីបណ្តាខេត្ត ផ្សេងៗ ទៅលេងខេត្តកំពតតែងមានគោលដៅទៅលេងទីណារួចហើយតាមគោលដៅរៀងៗខ្លួន ប៉ុន្តែអ្វីដែលពួកគាត់គ្រប់គ្នាចង់បានមួយទៀតនោះ គឺបានញ៊ាំគ្រឿងសមុទ្រឲ្យបានបបូរ តាមចិត្ត និយាយរួមញ៊ាំរហូតឃើញតាលាន់ហ្មង និងកាន់តែអ៊ែមទៀតនោះ គ្រឿងសមុទ្រស្រស់ៗ និងធម្មជាតិពិតៗ អញ្ចឹងហើយខាងក្រោមនេះជាដំណើរដើមទង់ដើម្បីបានដូចបំណង។
ដំបូងអ្នកត្រូវពិបាកបន្តិចហើយត្រូវក្រោកពីព្រលឹមបន្តិច ព្រោះថាពិភពដើមរបស់គ្រឿងសមុទ្រមុននាំចូលទីផ្សារនានា គឺខាងបងៗ អ្នកនេសាទត្រូវទៅទំលាក់គ្រឿងសមុទ្រដែលរកបាននៅកំពង់ផែ ហើយសម្រាប់ផែនៅទីរួមខេត្តកំពតនោះ គឺមានឈ្មោះថា ផែក្តាម ចុចទីនេះ សម្រាប់ផែនទី នៅជិតក្រុងកំពតដែរទេ ដូច្នេះហើយដើម្បីបង្កភាពងាយស្រួលដល់លោកអ្នកទៀតនោះដើម្បីកុំអោយពិបាក១រឿងទៀតនោះដែលត្រូវគិតទុកជាមុននោះគឺ រឿងក្រោកពីគេងម៉ោង ៤ព្រឹកហើយរៀបចំខ្លួនត្រូវមកដល់ផែក្តាមយ៉ាងហោចណាស់មុនម៉ោង ៥ព្រឹក ដូច្នេះហើយអ្នកគួរគប្បីរកកន្លែងណាដែលនៅជិតទីតាំងផែនោះ ព្រោះថាបើអ្នកទៅយឺតពេលនោះ ខាងឈ្មួញកណ្តាលគេនឹងទិញយកគ្រឿងសមុទ្រល្អៗ អស់ អ្នកគ្មានឪកាសបានរបស់ល្អឡើយ ហើយទូកក៏នឹងចេញពីផែអស់ដែរបើទៅយឺតពេលខ្លាំង។
ដូចបានរៀបរាប់ពីខាងដើមអញ្ចឹងថាអ្នក ត្រូវចេះវិធីសាស្ត្រនិយាយ ដើម្បីគ្រឿងសមុទ្រល្អមកញ៊ាំហើយធូរថ្លៃ និយាយរួមគឺ ពូកែតថ្លៃ និងចេះរាក់ទាក់និយាយចរចារ ផ្សារភ្ជាប់ទំនាក់ទំនងជាមួយបងៗ ខាងទូក ព្រោះគ្រឿងសមុទ្រដែលល្អ ច្បាស់ណាស់ថា បងៗ ខាងទូកនេសាទ ទុកអោយខាងឈ្មួញកណ្តាលជាមុន ព្រោះជាម៉ូយប្រចាំរបស់ពួកគាត់ ដូច្នេះហើយគាត់មិនចង់លក់អោយយើងអ្នកក្រៅនោះទេ បើលក់ទាល់តែតម្លៃលើខាងឈ្មួញកណ្តាលបន្តិចបន្តួចដែរ ដូច្នេះហើយ យើងត្រូវចេះឆ្លៀតឪកាស នៅពេលដែលទូកនេសាទណាដែល ខាងឈ្មួញគេមិនទាន់មកដល់ យើងអាចទៅនិយាយចរចាតថ្លៃពីអ្នកទូកបាន ដោយអោយតម្លៃលើឈ្មួញខ្លះ នោះពួកគាត់នឹងលក់អោយមិនខាន បើតាម Admin ដឹងតម្លៃទូទៅរបស់ក្តាមសេះ អាលេខពីរមានតម្លៃចន្លោះពី ២៥០០០៛ ទៅ ៣០០០០៛ ហើយអាលេខ១ តម្លៃថ្លៃបន្តិចហើយ ៤០០០០៛ ទៅ ៦០០០០៛ ក្នុង១គីឡូ។
វិធីរើសក្តាម អ្នកត្រូវស្គាល់ថាតើក្តាមមួយណាជាក្តាមញី និងមួយណាជាក្តាមឈ្មោល។ ក្តាមញីមានសន្ទះទ្រូងធំ រីឯក្តាមឈ្មោលមានសន្ទះទ្រូងតូច ហើយក្តាមញីជាក្តាមមានពង ដើម្បីដឹងថាក្តាមនោះនៅស្រស់ និងមានសាច់ច្រើនត្រូវសង្កេតដូចខាងក្រោមនេះ។
១. ពណ៌ដង្កៀបក្តាមស្រស់មានពណ៌ស្រស់ភ្លឺចែងចាំងនិងរលើបរលោងនៅលើដង្កៀបរបស់វា រីឯក្តាមចាស់វិញ មានពណ៌រាងស្រអាប់ និងគ្រើមៗ។
២. លក្ខណៈបាតពោះក្តាមក្តាម ដែលមានបាតពោះស្មើ ជាក្តាមស្រស់ បើវាជាក្តាមចាស់ មានក្បាលពោះរាងប៉ោង។
៣. ពណ៌បាតពោះបើមានពណ៌រាងខៀវ និងសំប៉ែត ជាក្តាមស្រស់ បើមានក្បាលពោះប៉ោងពណ៌លឿងៗ ជាក្តាមចាស់។
៤. របៀបមើលសាច់ច្រើនឬតិចត្រូវច្របាច់សន្ទះទ្រូងរបស់វា បើរឹងគឺសម្បូរសាច់ បើទន់ឬផតពុំសូវមានសាច់ទេ៕
បង្គារ ចំណែកឯបង្គារធម្មជាតិវិញ អ្នកត្រូវចាំថារូបរាងវាមិនធំស្មើរទេ គឺតូចធំៗ ហើយមិនស្អាតល្អឡើយ ដូច្នេះហើយបើលោកអ្នកឃើញបង្គារអញ្ចឹងកុំខ្លាចញ៊ាំ ព្រោះថារសជាតិវាជាតិណាស់ រសជាតិអ៊ែមហ្មង បានញ៊ាំភ្លាមៗ ស្រស់ៗទៀតនោះ ដឹងតែពីញ៉ាមហ្មង ហើយលែងចង់ញ៊ាំបង្គារចិញ្ចឹមទៀតហើយ។ ចំណែកតម្លៃវិញ ចាប់ពី ៣០០០០៛ ឡើងទៅដោយ បង្គារលេខ២ តម្លៃ ២៨០០០៛ ទៅ ៣២០០០៛ ហើយបង្គារលេខ១ តម្លៃ ៤០០០០៛ ទៅ ៦០០០០៛ តាមរដូវសំបូរឬមិនសំបូរ។
វិធីរើសបង្គារ
១. ច្របាច់មើលសំបកដងខ្លួនរបស់វា តើរឹងឬអត់ បើរឹងគឺល្អ។
២. មើលក្បាលរបស់វា តើជាប់នឹងដងខ្លួនឬអត់ បើដាច់ពីដងខ្លួន កុំទិញ។
៣. បើព្រុយរបស់វាមិនដាច់ចេញពីក្បាលរបស់វាទេ ឬព្រុយស្វិតល្អមិនរបូតពីខ្លួន ទិញយកចុះមិនខុសបំណងទេ។
និយាយរៀបរាប់ឡើងហូរហែរគ្រាន់អានក៏ហត់ដែរ នៅមានវិធី១ ទៀតដើម្បីកុំអោយហត់ពេកអ្នកអាចជួយទិញផ្ទាល់ពីឈ្មួញកណ្តាលតែម្តង គ្រាន់តែតម្លៃរៀងថ្លៃជាងបន្តិច តែអ្នកមិនសូវពិបាករើសគ្រឿងសមុទ្រនោះទេ ព្រោះអីពួកគាត់អ្នកឈ្មួញកណ្តាលគាត់បានជ្រើសរើសរួចម្តងហើយ ដូច្នេះហើយភាគរយខ្ពស់ដែលអ្នកបានរបស់ល្អមកញ៊ាំ ឬក៏លោកអ្នកអាចទំនាក់ទំនងសួរនាំអ្នកកំពតណាដែលមានស្គាល់លេខឈ្មួញកណ្តាល ក៏បានដើម្បីអោយគេទុកគ្រឿងសមុទ្រអោយយើង វិធីនេះងាយជាងគេ តែត្រូវរកលេខឈ្មួញណាដែលទុកចិត្តដែរ។
តែសម្រាប់ Admin ផ្ទាល់នៅតែណែនាំសម្រាប់ការអនុវត្តន៍អ្វីដែលថ្មី ព្រោះថាទេសភាពនាព្រឹកព្រលឹមនៅកំពង់ផែក្តាមនោះក៏ មិនអន់ដែរ ស្អាតកប់ដែរនឹង ហើយណាមួយទៀតបានស្គាល់ បានឃើញ ពិសេសស្នាមញញឹមអ្នកលក់ម្នាក់នាព្រឹកព្រលឹមផងដែរ។
