រាជធានីភ្នំពេញ ៖ គ្រូត្រូវបានចាត់ទុកជា មាតា-បីតា ទី២ ដែលបង្រៀនកូនៗឱ្យមានចំណេះដឹង និងឥរិយាបទល្អក្នុងសង្គមជាតិ។ គ្រូបង្រៀនដើរតួនាទីយ៉ាងសំខាន់ក្នុងការអភិវឌ្ឍន៍ធនធានមនុស្ស ហើយលោកតែងតែមានព្រហ្មវិហារធម៌ចំពោះកូនៗជាពន់ពេក ។
ពិតមែន! បើទោះបីជាមានគ្រូបង្រៀនមួយចំនួនតូច ពេលខ្លះមានកំហុសឆ្គងបន្តិចបន្តួច ក៏មិនដល់ថ្នាក់ត្រូវ បានយកមកជាចងក្រងជាបទចម្រៀង ចំអកឡកឡឺយបែបនោះទេ។ សម្រាប់បទចម្រៀងថ្មីមួយ ដែលមានចំណងជើងថា «គ្រូបង្រៀនស្រវឹងស្រា» កំពុងទទួលរងការរិះគន់យ៉ាងចាស់ដៃ ព្រោះអត្ថន័យហាក់ដូចជាជ្រុលហួសហេតុពេក ។ មតិរិះគន់បាននិយាយថា វាហាក់ដូចជាគាត់ (អ្នកនិពន្ធ) មិនធ្លាប់បានសិក្សារៀនសូត្រ ឬគ្មានគ្រូបង្រៀនគាត់សោះឡើយតាំងពីតូចមក។
បទ «គ្រូបង្រៀនស្រវឹងស្រា» ឡើងកំដៅរិះគន់ក្នុងមជ្ឈដ្ឋានសិស្ស និស្សិត មិនដឹងថាផលិតកម្មថោនមានចេតនាឱ្យបទចម្រៀងមួយនេះផ្ទុះ ក្រោយដឹងថា មួយរយៈនេះចម្រៀងរបស់ខ្លួនស្ងាត់ឬយ៉ាងណាទេ ឬក៏ចង់បង្ហាញជ្រុងមួយរបស់គ្រូៗខ្លះ បានក្រុមហ៊ុននិពន្ធបទចម្រៀង វាយប្រហារគ្រូៗយ៉ាងចាស់ដៃ ទាំងដឹងថា គ្រូបង្រៀនមួយថ្ងៃ គឺស្មើគ្រូមួយជីវិត។
ចម្រៀងនេះគ្រាន់តែចំណងជើង គឺញាក់សាច់ ព្រោះមិនមែនរួមចំណែកជួយសង្គមទេ តែជាគំនិតបំផុសឱ្យសិស្សៗភ្លេចគុណគ្រូទៅវិញទេ ។ ការនិពន្ធបទបែបនេះប៉ះពាល់ខ្លាំងណាស់ដល់ទឹកចិត្តគ្រូបង្រៀនទូទៅដែលពួកគាត់ខំប្រឹងប្រែងបង្រៀនសិស្សអស់ទាំងចិត្ត និងកាយ។
ចង់សួរមួយលោកអ្នកនិពន្ធ តើលោកអាចរាប់ឈ្មោះគ្រូរបស់លោក ដែលបានបង្ហាត់បង្រៀនឱ្យលោកចេះនិពន្ធមកដល់ថ្ងៃនឹងអស់ទេ? មិនបានសងគុណពួកគាត់ សូមកុំរកនឹកចំណុចអាក្រក់១លើ១លានមកធ្វើឱ្យប៉ះពាល់ដល់ទឹកចិត្តគ្រូបង្រៀនទូទាំងប្រទេស។ បើលោកមិនគោរព មិនដឹងគុណគ្រូរបស់លោកកុំបង្វក់កូនខ្មែរ ឱ្យមិនស្គាល់ពីតម្លៃរបស់គ្រូបង្រៀនតាមរយៈបទចម្រៀង។
បទចម្រៀងថ្មីដែលលេចចេញការរិះគន់នេះ ត្រូវបានផលិតកម្មថោនបញ្ចេញកាលពីចុងសប្តាហ៍នេះ នៅលើគេហទំព័រហ្វេសប៊ុករបស់ខ្លួន។ ក្រោយការបញ្ចេញគេឃើញមានការរិះគន់ជាច្រើនថា បទចម្រៀងនេះមានអត្ថន័យបន្ទាបតម្លៃគ្រូបង្រៀនទៅវិញ បើទោះបីជាបទចម្រៀងនេះចង់ឲ្យគ្រូបង្រៀនគោរពតាមក្រមសីលធម៌វិជ្ជាជីវៈក្តី។
អ្នកនិពន្ធសម័យថ្មីបាននិពន្ធបទចម្រៀងមួយបទ ដែលមានចំណងជើងថា «គ្រូបង្រៀនស្រវឹងស្រា» ដែលក្នុងខ្លឹមសារនោះបញ្ជាក់ថា «ឲ្យតែស្រវឹង គ្រូកាចចម្លែក បង្រៀនប្លែកៗខឹងស្រែក ខឹងវាយ» ដែលក្នុងន័យនេះ គឺហាក់ដូចជាមើលស្រាលចំពោះគ្រូបង្រៀនបន្តិចហើយ។
តើក្រសួងអប់រំ យុវជន និងកីឡា, ក្រសួងព័ត៌មាន និងក្រសួងវិចិត្រសិល្បៈ ជាដើមអាចនឹងពិនិត្យមើលថា តើបទចម្រៀង «គ្រូបង្រៀនស្រវឹងស្រា» គួរតែត្រូវបានអនុញ្ញាតឲ្យផ្សព្វផ្សាយឬយ៉ាងណា? តើវាប៉ះពាល់ដល់អារម្មណ៍គ្រូបង្រៀនទូទាំងប្រទេសដែរឬទេ?
