រាជធានីភ្នំពេញ ៖ កាលពីវេលាម៉ោង១ រសៀល ថ្ងៃទី១២ ធ្នូ ២០១៧ តារាកំប្លែងនាយវីតាមីនសេ ត្រូវបានបញ្ជូនចាកចេញពីប្រទេសកម្ពុជាទៅកាន់មន្ទីរពេទ្យប្រទេសថៃជាថ្មីទៀតហើយ ។ ការចាកចេញលើកនេះមិនមែនទៅពិនិត្យ និងតាមដានសុខភាពដូចមុនទៀតទេ តែជាការចេញទៅចាក់ថ្នាំរំលាយដុំសាច់ក្នុងថ្លើម ដែលការចាក់ថ្នាំនេះធ្វើឲ្យមានការភ័យបារម្ភខណៈដែលសុខភាពរបស់គាត់កាន់តែខ្សោយ ។
ការចាក់ថ្នាំរំលាយដុំសាច់នឹងអាចធ្វើឲ្យមានការប៉ះពាល់ដល់សុខភាពរបស់នាយវីតាមីនសេ ប៉ុន្តែទាំងក្រុមគ្រូពេទ្យ និងគ្រួសារផ្ទាល់អះអាងថា មិនមានជម្រើសណាផ្សេងក្រៅពីនេះឡើយ ។ អ្នកនាងមឿន និមល ហៅប៉េងប៉ោងអះអាងថាជំងឺនាយវីតាមីនសេនឹងដល់ពេលណាត់ជួបតាមការចង់បានរបស់ក្រុមគ្រូពេទ្យ ។ ដូចនេះហើយទើបកាលពីព្រឹកថ្ងៃ១២ ធ្នូ ឆ្នាំ២០១៨ជាថ្ងៃចេញទៅប្រទេសថៃម្តងទៀត ។
ក្នុងទឹកមុខស្រពោនអ្នកនាងប៉េង ប៉ោងនិយាយថា «ម្តងនេះអត់ពិនិត្យមើលដូចមុនឡើយ ។ ជំងឺដុំសាច់ក្នុងថ្លើម ពេទ្យថាអាចព្យាបាលបាន៧០ភាគរយទើបខ្ញុំរួសរាន់អត់ទុកយូរទៀតបាន ។ ថ្ងៃ១៨ធ្នូនឹងចូលពេទ្យធ្វើការហើយ ដោយម្តងនេះសម្រាកមួយអាទិត្យជាងចំណាយ៦ពាន់ដុល្លារជាង ។ បើទោះជាបែបណាពេលនេះលោកប៉ានាងខ្ញុំខ្សោយហត់ សម្រាន្តមិនស្រួលទេ ។ តាំងពីទៅថៃលើកទី១មកអត់បានលេបថ្នាំ១គ្រាប់ឡើយ ។ បើទោះជាស្ថានភាពយូរទៀតមានតែដើរមួយជំហានគិតមួយជំហានហើយសាហ៊ុយធ្វើដំណើរគឺជាការខ្នះខ្នែងពីសប្បុរសជនដែលអាណិតប៉ារបស់នាងខ្ញុំ ។
ពេទ្យថាអាចព្យាបាលបាន៧០% គឺជាក្តីសង្ឃឹមច្រើនណាស់សម្រាប់ក្រុមគ្រួសារនាងខ្ញុំដោយនាងខ្ញុំចង់ឱ្យគាត់រស់មើលស្រុកទេស និងកូនចៅយូរជាងនេះ ។ ប៉ានាងខ្ញុំច្រើននិយាយអ៊ីចឹងរហូតទើបនឹកអាណិតគាត់» ។
ក្នុងសភាពស្លេកស្លាំង ភ័យៗនាយវីតាមីនសេ រៀបរាប់ក្នុងសំឡេង ខ្សាវៗថា«ខ្ញុំសម្រាន្តមិនលក់ទេ និយាយវិញហត់ ឈឺក្នុងសាច់នៃខ្លួននេះណាស់ ។ ខ្ញុំចង់ជាឱ្យស្រាលខ្លួន ប្រាប់តាមត្រង់ខ្ញុំចង់នៅជិតចៅ ចង់នៅរស់៤ទៅ១០ឆ្នាំទៀត មើលប្រទេសជាតិយើងដែលរីកចម្រើននេះជាអ្វីដែលខ្ញុំប្រាថ្នា ។
ខ្ញុំសូមថ្លែងអំណរគុណសប្បុរសជនទាំងអស់ដែលបានជួយខ្ញុំគ្រប់រូបភាព សូមប្រកបដោយភាពសុខសប្បាយ អាយុវែង សុខភាពល្អ» ៕
