សម្លការី អាចនិយាយបានថាជាមុខម្ហូបដែលមានគ្រឿងផ្សំច្រើន ពិបាកក្នុងការធ្វើ ប៉ុន្តែរសជាតិនៃម្ហូបមួយមុខនេះគឺឆ្ងាញ់មិនធម្មតាទេ ថ្វីត្បិតតែពិបាកក្នុងការស្លរបន្តិចមែន។ តោះ កុំខ្វល់រឿងពិបាក សំខាន់អ្វីក៏ដោយអោយតែឆ្ងាញ់ត្រូវតែរៀនធ្វើអោយចេះ ដើម្បីធ្វើអោយម៉ាក់ប៉ា រឺសំណព្វចិត្តអ្នកទាំងអស់គ្នាបានញ៉ាំបង្ហាញស្នាដៃអោយពួកគាត់ដឹងថាស្នាដៃយើងមិនអន់ទេ។ កុំភ្លេចរៀនធ្វើទាំងអស់គ្នាណា ព្រោះថាគ្រឿងផ្សំ និងវិធីធ្វើ គឺមាននៅខាងក្រោមនេះ។
? គ្រឿងផ្សំដែលត្រូវមាន៖
- សាច់មាន់ ១គីឡូក្រាម (ហាន់ជាដុំ ធំៗល្មម)
- សាច់គោ ៥ខាំ (ហាន់ជាដុំ ធំៗល្មម)
- ខ្ទឹមបារាំង ១ដុំ (ហាន់តូចល្មម)
- ការ៉ុត ១ផ្លែ (ហាន់ជាដុំ)
- ដំឡូងបារាំង ១មើម (ហាន់ជាដុំ)
- គ្រឿងបុក ១កូនចានចង្កិះ (ខ្ទឹមស ខ្ទឹមក្រហម រំដេង ល្មៀត ស្លឹកក្រូច គល់ស្លឹកគ្រៃ)
- ខ្ទិះដូងដើម ១/២ លីត្រ
- ខ្ទិះដូងចុង ១ ១/២ លីត្រ
- សណ្តែកដីលីង ៥០ក្រាម (បុកអោយបែកតិចៗ)
- ទឹកត្រី ៤ស្លាបព្រាបាយ
- អំបិល ១ស្លាបព្រាកាហ្វេ
- ស្ករត្នោត ១ខាំ
- ម្សៅស៊ុប ១ស្លាបព្រាកាហ្វេ
- ម្ទេសក្រៀម ១០ផ្លែ (ត្រាំទឹកអោយរីក ចិញ្រ្ចាំអោយម៉ដ្ដ)
- ផ្កាចាន់ ២ផ្កា (អត់ក៏បាន)
? របៀបធ្វើ
- ដាក់ឆ្នាំងអោយក្តៅ ដាក់ខ្ទិះដើម ១វែក ទុកអោយពុះ រួចដាក់ម្ទេសក្រៀម និងផ្កាចាន់ចូលឆាអោយឡើងពណ៌ក្រហមល្អ ហើយដាក់គ្រឿងបុកចូលឆាអោយឈ្ងុយ (បន្ថែមខ្ទិះបន្តិចកុំអោយខ្លោច)
- ដាក់សាច់ចូល ឆាបីបួនត្រឡប់ រួចដាក់គ្រឿងផ្សំដូចជា ស្ករ អំបិល ទឹកត្រី និងម្សៅស៊ុបចូលឆាអោយសព្វ រំងាស់អោយស្ងួតទឹកដែលចេញពីសាច់។
- ដាក់សណ្តែកដី ការ៉ុត និងដំឡូងបារាំងចូល រួចដាក់ខ្ទិះដូងចូល រំងាស់អោយផុយសាច់ និងដាច់ទឹកបន្តិច ភ្លក្សរសជាតិតាមចំណូលចិត្ត (បើសាបអាចថែមទឹកត្រី) រួចដាក់ខ្ទិះដើមដែលនៅសល់ និងខ្ទឹមបារាំងចូល ទុកមួយពុះរួចជាការស្រេច៕
