ក្រុមហ៊ុន Apple ទើបតែបានបង្ហាញនូវម៉ូដែលកម្មវិធីថ្មីសម្រាប់នាឡិកា។ កម្មវិធីថ្មីដំណើរការដោយប្រព័ន្ធ WatchOS 3.2 ។ ម៉ូដែលកម្មវិធីថ្មីនោះនឹងធ្វើឲ្យអ្នកប្រើប្រាស់នាឡិកា Apple Watch ទទួលបាននូវកម្មវិធី ថ្មីៗជាច្រើន ។ ប៉ុន្តែក្រុមហ៊ុន Apple មិនទាន់ប្រាប់ឲ្យច្បាស់ថា ពេលណាម៉ូដែលកម្មវិធី WatchOS 3.2 នឹងអាចដំឡើង (Update) នៅលើនាឡិការបស់ក្រុមហ៊ុនខ្លួននៅឡើយទេ ។
ចំណុចពិសេសរបស់ម៉ូដែលកម្មវិធីថ្មីនោះគឺ Theater Mode ឬកម្មវិធីរោងភាពយន្ត និងមានសមត្ថភាពឲ្យ Apps ផ្សេងធ្វើការជាមួយ Siri នៅលើ Apple Watch ។ កម្មវិធី Theater Mode អាចឲ្យអ្នកបិទសំឡេងបានឆាប់រហ័សលើ Apple Watch ហើយអ្នកគ្រាន់តែលើកដៃអ្នកឡើងនោះ អេក្រង់ Apple Watch របស់អ្នកមិនលោតពន្លឺនោះទេ។ ប៉ុន្តែអ្នកនៅតែទទួលបានសញ្ញាប្រាប់ដំណឹង ឬរំញ័រនៅកដៃរបស់អ្នកដើម្បីអាចមើលសញ្ញាប្រាប់ដំណឹងជាអ្វីអ្នកត្រូវចុចនៅលើអេក្រង់ Apple Watch ឬចុចនៅលើប៊ូតុងលើនាឡិកាអ្នក ។
សម្រាប់ជំនួយ Siri នៅលើនាឡិការបស់អ្នកអាចជួយអ្នកជាច្រើនដូចជា កក់សំបុត្រធ្វើដំណើរនានា ផ្ញើសារនានា ឬលុបចោលការផ្ញើសារ ឬការចំណាយ ផ្សេងៗ ។ កម្មវិធី Apps ផ្សេងៗដែលអាចដំណើរការជាមួយ Siri នៅលើ Apple Watch រួមមានកម្មវិធី Apps សម្រាប់ហាត់ប្រាណ ការហៅចេញ និង Apps សម្រាប់រុករករូបថត ផ្សេងៗ ។ ម៉ូដែលកម្មវិធីថ្មីរបស់ Apple សម្រាប់ទូរស័ព្ទ ឬ Ipad ដែលមានឈ្មោះថា iOS 10.3 នឹងដាក់ឲ្យដំណើរការនាពេល ឆាប់ៗ ៕