ចាក់បញ្ចាំងគ្រប់រោងភាពយន្តនៅកម្ពុជារឿង «​មុនដំបូងខ្មែរ​ក្រហមសម្លាប់​ប៉ារបស់ខ្ញុំ»

រោងភាពយន្តលេជេន រៀបចំ​កម្មវិធីសន្និសិទ្ធកាសែត​និងការ​ចាក់បញ្ចាំងពិសេស រឿងមុនដំបូងខ្មែរក្រហមសម្លាប់ប៉ារបស់ខ្ញុំ នៅលេជេន​ទួលគោក នៅថ្ងៃទី៨​ខែកញ្ញាកន្លងទៅនេះ រោងភាពយន្តលេជេនមានកិត្តិយសរៀបចំកម្មវិធីសន្និសិទ្ធកាសែតនិងការ​ចាក់បញ្ចាំងពិសេស រឿងមុនដំបូងខ្មែរក្រហមសម្លាប់ប៉ារបស់ខ្ញុំ ដែលដឹកនាំសម្តែងដោយ អ្នកស្រី Angelina Jolie, ​ជាខ្សែភាពយន្តប្រែសម្រួលចេញពីការចងចាំដ៏ឈឺចាប់របស់អ្នកស្រី អ៊ឹង លួង ដែលជាអ្នកនិពន្ធសៀវភៅ និងសកម្មជនការពារសិទ្ធិមនុស្ស ដែលបានរួចផុតជីវិតពីរបបខ្មែរក្រហមដ៏សាហាវយង់ឃ្នងពីឆ្នាំ ១៩៧៥ ដល់ ឆ្នាំ១៩៧៩។ កម្មវិធីនេះត្រូវបានធ្វើឡើង នៅរោងភាពយន្តលេជេនសាខា​ទួលគោក។

រោងភាពយន្តលេជេន​មានភាពសោមនស្សរីករាយដោយបាន អញ្ជើញតារាសម្តែងធំៗ មួយចំនួនដែលបានសម្តែងនៅក្នុងខ្សែភាពយន្តខ្នាតយក្ស​នេះដូចជា​ អ្នកស្រីស្វែង សុជាតា ដែលសម្តែងជាតួម្តាយ លោក ភឿង កុម្ភៈ ជាតួឳពុក​ លោកផង់ តារាជាតួ ខ្មែរក្រហម និង កញ្ញា យុទ្ធ បូរាមី ជាជំនួយការអ្នកតុបតែង និងកាន់ខាងសំលៀកបំពាក់ក្នុងរឿងនេះ ។​ កម្មវិធីសន្និសិទ្ធកាសែតនេះធ្វើឡើងក្នុងគោលបំណង​មិនត្រឹមតែបង្ហាញដល់អ្នកគាំទ្ររោងភាពយន្តលេជេនអំពីវត្តមានរឿងនេះនឹងត្រូវចាប់បញ្ចាំងនៅក្នុងរោងភាពយន្តលេជេនទាំងបីសាខាប៉ុណ្ណោះនោះទេ ក៏ប៉ុន្តែក៏សង្ឃឹមថារោងភាពយន្តលេជេនបានចូលរួមចំណែកក្នុងការឧទ្ទិសដល់​អ្នក​ដែលបានស្លាប់ និងអ្នកដែលបានរួចផុតពីការស្លាប់ក្រោមរបបខ្មែរក្រហម ជាពិសេសការផ្តោតសំខាន់លើសេចក្ដីស្រឡាញ់និងការលះបង់របស់ក្រុមគ្រួសារខ្មែរ និងឆ្លុះបញ្ចាំងពីភាពស្រស់ស្អាត នៃដួងវិញ្ញាណ និងស្មារតីរឹងមាំរបស់ប្រជាជនខ្មែរ និងវប្បធម៌ខ្មែរ។

​សូមបញ្ជាក់ផងដែរថា រឿងមុនដំបូងខ្មែរក្រហមសម្លាប់ប៉ារបស់ខ្ញុំនឹងចាប់ផ្តើមចាក់បញ្ចាំងនៅរោងភាពយន្តលេជេនទាំងបីទីតាំង​ដូចជា រោងភាពយន្តលេជេនធីឃេ រោងភាពយន្តលេជេនស៊ីធីម៉ល រោងភាពយន្តលេជេនមានជ័យ ចាប់ពីថ្ងៃទី ៨ កញ្ញានេះតទៅ។

តោះចង់ដឹងច្បាស់ថារឿងនេះពិតជាល្អមើលយ៉ាងណានោះ លោក​អ្នក​អាច​កក់​សំបុត្រ​ដោយផ្ទាល់ ឬតាមអនឡាញនៅម៉ោងបញ្ចាំងភាពយន្តដែល​អាចជ្រើស​រើសនៅលើគេហទំព័រ Legend Cinemas: ចុចទីនេះ។

វីដេអូ