រាជធានីភ្នំពេញ ៖ តារាកំប្លែងកញ្ញានីឡា មិនអាចដឹកដៃគូដណ្តឹងចូលរោងការបានបណ្តាលឱ្យមានព័ត៌មានពីការបែកបាក់ម្តងហើយម្តងទៀត ។ កន្លងមកលេចឮថាគូស្នេហ៍នេះបែកបាក់គ្នាហើយចាស់ទុំសងខាងបានឯកភាព ព្រោះមានជំនឿលើថ្ងៃខែកូនទាំង២មិនត្រូវគ្នា ។
នីឡាដែលបច្ចុប្បន្នហាក់មិនសូវបណ្តើរគូដណ្តឹងទៅណាមកណាជាមួយគ្នានោះអះអាងថា នាង និងគូដណ្តឹងមិនបែកបាក់គ្នាដូចការលេចឮទេ ។ នាងនិយាយថា«បើយោងតាមទំនៀមទម្លាប់ប្រពៃណី ឳពុកម្តាយទាំងសងខាងមានជំនឿលើថ្ងៃខែឆ្នាំណាស់ ហើយពួកយើងមិនល្អចំណុចនេះទើបដំអក់គាំង យូរទៅៗ ។ យ៉ាងណានាងខ្ញុំបានតាំងជំហរហើយថាបើថ្ងៃខែមិនល្អក៏នៅតែជម្នះឱ្យបាន ។ អ្វីដែលចង់បញ្ជាក់គឺផ្តាំទៅមាតាបិតាទាំងសងខាងកុំជឿលើចំណុចបែបនេះពេក ឬពាក្យចចាមអារ៉ាមគ្មាននោះទេ ។ ពួកយើងនៅធម្មតា ហើយស្រឡាញ់គ្នាអាស្រ័យលើចិត្ត ទោះបីជាទៅដល់ណាអត់ភ័យបារម្ភដែរ ហើយកុំតែទើសរឿងថ្ងៃខែឆុងគ្នាការបាត់ហើយ ។ បើតាមគម្រោងប៉ានាងខ្ញុំលោកតាវិចទ័រចង់ឱ្យការចុងឆ្នាំ២០១៨នាងខ្ញុំយល់ព្រមដើម្បីកុំឱ្យមានការលើកឡើងច្រើនដូចជាយករឿងនាងខ្ញុំទៅពាក់ព័ន្ធជាមួយនាយចឺមជាដើម» ។
ដើម្បីបំបាត់ពាក្យលេចឮថា នីឡា និងគូដណ្តឹងបែកបាក់គ្នានោះ លោកតាវិចទ័រជាឪពុកនីឡា ធ្លាប់បានរៀបចំគម្រោងឡើងវិញដើម្បីឲ្យនាងឆាប់បានចូលរោងការ ។ ប៉ុន្តែលោកតាវិចទ័រក៏ខ្វល់ចិត្តដែរនៅពេលដែលលោកយល់ថាស្នេហារបស់កូនទើសត្រង់ថ្ងៃខែមិនសូវត្រូវគ្នាដូច្នេះហើយទើបចាស់ទុំទាំងសងខាង មិនចង់ដាក់គម្រោងរៀបការ គឺបណ្តោយទុកឲ្យកាន់តែ យូរទៅៗ ។ បើទោះជានាំគ្នានិយាយបិទបាំងថាគ្រោងនឹងឱ្យនីឡារៀបការចុងចាំ២០១៨ក៏ដោយ វាទំនងជាមិនប្រាកដទេ ព្រោះចាស់ទុំមានជំនឿលើឆ្នាំខែកូនប្រុសស្រីខុសគ្នា ៕
