ឡើង​គេហដ្ឋាន​ថ្មី​របស់​កូនលោក​អ៊ិត សេដ្ឋា អ្នកសិល្បៈ​អត់​សំបុត្រ​​ក៏​ទៅ​ចូលរួម​ដែរ

រាជធានី​ភ្នំពេញ ៖ ពិធី​ឡើង​គេហដ្ឋាន​ថ្មី​របស់ កូន​ៗ​លោក​អ៊ិត សេដ្ឋា មាន​អ្នកចូលរួម​ច្រើន ធ្វើ​ឲ្យ កូន​ៗ និង​ម្តាយ​របស់​លោក​រំភើប​រីករាយ ។

ពិធី​ឡើង​គេហដ្ឋាន​ថ្មី កាលពី​ល្ងាច​ថ្ងៃ​ទី​២៣ តុលា ឆ្នាំ​២០១៧ ស្តែង​ឲ្យ​ឃើញ​ថា​ ពិធីករ​ដែល​ពោរពេញ​ដោយ​ប្រជាប្រិយភាព​ក្នុង​ស្រទាប់​មហាជន​លោក​អ៊ិត សេដ្ឋា ទោះបី​បាត់បង់​ជីវិត​ទៅ​ហើយ​ក្តី នៅ​តែ​បន្សល់​សេចក្តី​ស្រឡាញ់​រាប់អាន​ចំពោះ​រូប​លោក ។

ផ្ទះ​ថ្មី​របស់ កូន​ៗ​លោក​អ៊ិត សេដ្ឋា ទទួល​បាន​តាម​រយៈ​មូលនិធិ​ស៊ី​ធី​អិន ។ ការ​ទិញ​ផ្តល់​ជូន​នោះ​ជា​ការ​បំពេញ​តាម​បំណង​របស់​លោក​សេដ្ឋា ដែល​ចង់បាន​ផ្ទះ​សមរម្យ​មួយ​ទុក​ឲ្យ​ម្តាយ និង កូន​ៗ​រស់នៅ ចៀស​ផុត​ពី​ការ​ជួល​ផ្ទះ​គេ​ស្នាក់​នៅ ។ ឥឡូវ​បំណង​របស់​លោក​សេដ្ឋា​បាន​សម្រេច ដូច្នេះ​អ្នក​ស្រលាញ់ រាប់អាន​លោក​យល់​ថា​ដួងវិញ្ញាណ​ក្ខ​ន្ឋ​លោក​ពិត​បាន​ស្ងប់ ។

ទោះជា​មាន​ភ្លៀង​ធ្លាក់​ជោកជាំ តែ​នៅ​តែ​មានការ​ចូលរួម​ពី​សិល្បករ​ជា​ច្រើន ជា​ការ​បង្ហាញ​ទឹកចិត្ត​ស្រឡាញ់ រាប់អាន​របស់​ពួក​គេ​ចំពោះ​លោក​អ៊ិត សេដ្ឋា ។ អ្វី​ដែល​គួរ​ឲ្យ​ភ្ញាក់ផ្អើល​ក្នុង​ពិធី​ឡើងផ្ទះ​នេះ គឺ​សិល្បករ​ខ្លះ​មិន​បាន​ទទួល​លិខិត​អញ្ជើញ​ទេ តែ​នៅ​តែ​មិន​ប្រកាន់ ហើយ​ទៅ​ចូលរួម ។ អ្នក​នាង​យុគ ចិន្តា ជា​អ្នក​ខ្នះខ្នែង​ចេញ​មុខ​អញ្ជើញ តាម​រយៈ​ឆាត​ហ្វេ​ស​ប៊ុ​ក​ផង និង​ហៅ​ទូរស័ព្ទ​ផង ។

ក្នុង​ពិធី​ឡើង​គេហដ្ឋាន​នោះ អ្នក​នាង​យុគ ចិន្តា រីករាយ​ណាស់​ចំពោះ​វត្តមាន​ភ្ញៀវ​កិត្តិយស​ជា​ច្រើន​ព្រោះ​លោក​អ៊ិ​ត សេដ្ឋា ជា​ដៃគូ​ពិធីករ​ស្និទ្ធស្នាល​យូរ​ឆ្នាំ​របស់​នាង ។ ទឹកមុខ​សប្បាយ​រីករាយ​របស់​អ្នក​នាង​ចិន្តា បង្ហាញ​ពី​ការ​បាន​បំពេញ​បំណង​ជូន​មិត្ត​រួម​អាជីព ក្រោម​ការ​អាណិត​ស្រឡាញ់​ពី​មហាជន ។

អ្នកសិល្បៈ​ជា​ច្រើន​បាន​បង្ហាញ​ក្តី​អាឡោះអាល័យ​ចំពោះ​លោក​អ៊ិ​ត សេដ្ឋា ដែល​បាន​បាត់បង់​ជីវិត​ទៅ​ដោយ​ជំងឺ ។

លោក​អ៊ិត សេដ្ឋា ស្លាប់​ទៅ​បន្សល់ កូន​ៗ​កំព្រា និង​ម្តាយ​ចាស់​គ្មាន​ទីពឹង ។ ទោះជា​យ៉ាងណា​ក្តី​ក្រោម​ក្តី​អាណិតអាសូរ​របស់​មហាជន ម្តាយ និង កូន​ៗ​របស់​លោក​ទទួល​បាន​ផ្ទះ​ថ្មី​មួយ​ល្វែង​សម្រាប់​ជ្រកកោន ៕