រាជធានីភ្នំពេញ ៖ តារាចម្រៀងលោកខេមរៈ សិរីមន្ត បានត្រៀមមេធាវីដើម្បីប្តឹងលោក ម៉ៃ សុគន្ធ ដោយសារតែរិះគន់រូបលោកជាបន្តបន្ទាប់កន្លងមក ។ លោកខេមរៈ សិរីមន្ត ចាត់ទុកការរិះគន់ទាំងឡាយលើរូបលោកពីម៉ៃ សុគន្ធ ធ្វើឲ្យប៉ពាល់កិត្តិយស សិទ្ធិ និងផលប្រយោជន៍បុគ្គល ហើយកន្លងមកលោកមិនដែលបានតបតវិញទេ ។
លោកខេមរ សិរីមន្ត បានប្រកាសជាសាធារណៈកាលពីថ្ងៃទី៩ សីហា ២០១៨ ថា លោកបានត្រៀមមេធាវីរួចហើយដើម្បីប្តឹងលោក ម៉ៃ សុគន្ធ ព្រោះនៅតែគឃ្លើនរិះគន់មិនសំចៃមាត់មកលើរូបលោក ។
ការព្រមានប្តឹងពីខេមរៈសិរីមន្ត បានធ្វើឡើងបន្ទាប់ពីលោកម៉ៃ សុគន្ធ បានបង្ហោះសាររិះគន់ជាថ្មី ក្នុងពេលដែលលោកសិរីមន្តបានជិះឧទ្ធម្ភាចក្រទៅចូលរួមសម្ពោធការបើកលក់ដីឡូតិ៍ដែលមានភាគហ៊ុនលោកផងដែរ ។ តារាចម្រៀងដែលពូកែទើសគេគ្រប់រឿងលោក ម៉ៃ សុគន្ធ បានចាត់ទុកសកម្មភាពរបស់លោក ខេមរៈ សិរីមន្ត នាពេលនោះថា ជាអ្នកមានជាន់ថ្មីដែលមានចរិតដូចក្ងោកដែលគិតថាផ្លូវស្រុកខ្មែរជិះឡានលែងកើត ។
លោកម៉ៃ សុគន្ធ បានបង្ហោះសាររិះគន់ថា «ត្រឹមតែទៅលក់ដីនៅម្តុំវាលស្រែមួយរយសោះ ជិះសុទ្ធតែអេលីកូកទែរ(ឧទ្ធម្ភាចក្រ) មើលតែទៅលក់ពេជ្រនៅឌូបៃ ។ ថ្មីជានិច្ចអ្នកមានជាន់ថ្មីជាន់ដីរលាក់ហើយ ឃើញថាឧកញ៉ា ល្បីៗមួយចំនួនធំ ដែលមានរបរបើកលក់ដី ឬបុរី គាត់នៅតែរក្សាជំហរដដែល មិនសម្បើមដូចអ៊ីចឹងសោះ ចម្លែកអីតែអ្នកចម្រៀងយើងបានអ៊ីចឹងគេប្រៀបធៀបទៅនឹងក្ងោកមិនខុសមែន »។
ជាការឆ្លើយតបទៅកាន់រិះគន់ពីលោកម៉ៃ សុគន្ធ បែបនោះលោកខេមរៈ សិរីមន្ត បានបង្ហោះសារតាមហ្វេសប៊ុករបស់លោកថា«មេធាវីរបស់ខ្ញុំបានរៀបចំសំណុំបែបបទរួចអស់ហើយបទល្មើស និងភស្តុតាងមានគ្រប់គ្រាន់អស់ហើយ ពីបទចោទញុះញង់មានជាអាទិ៍ និងបទធ្វើឲ្យប៉ះពាល់សិទ្ធិ និងផលប្រយោជន៍បុគ្គល ។ ខ្ញុំមិនដែលគិតចង់មានបញ្ហាជាមួយបុគ្គលម្នាក់នេះឡើយ តែគាត់ចង់បានបែបនេះ ដូច្នេះទទួលយកអ្វីដែលខ្លួនបានសាងបទល្មើសនេះចុះ»។
ពាក់ព័ន្ធទៅនឹងការត្រៀមប្តឹងពីលោកខេមរៈ សិរីមន្ត នេះកោះសន្តិភាពមិនទាន់អាចស្វែករកការបញ្ជាក់ណាមួយពីតារាចម្រៀងរូបនេះបាននៅឡើយទេ ខណៈពេលបងប្រុសរបស់លោក គឺលោកខេមរៈ ភារុណ បានអះអាងដោយខ្លីថា «សូមចាំមើលទាំងអស់គ្នា»។
ចំណែកតារាចម្រៀងលោកម៉ៃ សុគន្ធ ក៏មិនទាន់មានការឆ្លើយតបណាមួយនៅឡើយដែរនៅពេលមានការសាកសួរកាលពីថ្ងៃទី៩ ខែសីហា ក៏ប៉ុន្តែនៅលើគណនេយ្យហ្វេសប៊ុករបស់លោកបានបញ្ជាក់ដោយខ្លីថា «ដោយក្តីរីករាយស្គាល់ពាក្យប្រយោលទេ ចាស្ទីនកូពី(សម្តៅលើលោក ខេមរៈ សិរីមន្ត) »។
នេះមិនមែនជាលើកទីមួយទេដែលលោក ម៉ៃ សុគន្ធ បានរិះគន់តារាចម្រៀងលោកខេមរៈ សិរីមន្ត ។ កន្លងមកលោកក៏ធ្លាប់រិះគន់ដែរចំពោះការតុបតែងខ្លួនរបស់ខេមរៈ សិរីមន្ត ថាបានចម្លងពីតារាចម្រៀងចាស្ទីន របស់អាមេរិក និងការចេញបទ«រាំក្បាច់ក្ងោក» ក្នុងពេលដែលប្រទេសឡាវបានដាក់បញ្ចូលក្បាច់រាំវង់ជាបេតិភណ្ឌពិភពលោក៕
