បើនិយាយពីរឿងធ្វើនំគ្រក់ Admin ជឿជាក់ថាសម្រាប់អ្នកស្រុកស្រែចម្ការ គឺឧស្សាហ៍ធ្វើញ៉ាំណាស់ពេលទំនេរ ព្រោះជាក់ស្ដែង Admin នេះហើយ កាលពីមុនអោយតែទំនេរថ្ងៃឡើងមិនមានការងារធ្វើដឹងតែបបួលបងប្អូន ក្មួយ កិនម្សៅធ្វើញ៉ាំហើយ។ នំគ្រក់ឆ្ងាញ់ក៏ត្រូវពឹងផ្អែកទៅលើទឹកត្រីផងដែរ តោះចង់ចេះធ្វើញ៉ាំទេ មកសាកធ្វើតាមរបៀបខាងក្រោមទាំងអស់គ្នាណា។
គ្រឿងផ្សំនំដែលត្រូវមាន៖
- ម្សៅ (ខ្សាយ) ២០០ ក្រាម
- បាយកក ១ ដុំ
- ស្លឹកខ្ទឹម ៣ ដើមហាន់តូចៗ
- ខ្ទិះដូង (ដើម) ១ចានចង្កឹះ
- ខ្ទិះដូង (ចុង) ១ ចានគោម
- អំបិល ១ ចុងស្លាបព្រាកាហ្វេ
- ប្រេងឆា
របៀបធ្វើនំ៖
- អ្នកត្រូវយក ម្សៅ, ខ្ទិះដូង (ខ្ទិះចុង), បាយកក, អំបិល និងទឹក ដាក់ចូលទៅក្នុងម៉ាស៊ីនក្រឡុកប្រហែលជា ៣ នាទី
- បន្ទាប់ពីដាក់ក្នុងម៉ាស៊ីនក្រឡុករួចហើយ អ្នកត្រូវយកស្លឹកខ្ទឹមមកបន្ថែមពីលើម្សៅ ហើយកូរវាបញ្ចូលស្មានមើលកុំឲ្យរាវពេក
- ដាក់ឆ្នាំងចាក់នំគ្រក់ឲ្យក្តៅលាបប្រេងឆាបន្តិច បន្ទាប់មកដាក់ម្សៅចូលគ្របទុកប្រហែល ៣-៤ នាទី
- នៅពេលដែលនំឆ្អិនម្ខាងត្រូវយកទៅគ្របម្ខាងទៀត
- នៅពេលដែលឆ្អិនទាំងសងខាងរួចជាការស្រេច
គ្រឿងផ្សំធ្វើទឹកជ្រលក់៖
- ទឹកត្រី ១ ស្លាបព្រាបាយ
- ស្ករស ២ ស្លាបព្រាបាយ
- ទឹក ៣ ស្លាបព្រាបាយ
- ទឹកខ្មេះ ១ ស្លាបព្រាបាយ
- ខ្ទឹមស ៥ កំពឹស (ចិញ្ច្រាំម៉ដ្ឋ)
- ម្ទេស(ហាន់រួច)
វិធីធ្វើទឹកជ្រលក់៖
- ដាក់គ្រឿងផ្សំខាងលើចូលក្នុងចានចង្កឹះមួយកូរវាបញ្ចូលគ្នាភ្លក់ និងបន្ថែមគ្រឿងយករសជាតិដែលអ្នកចង់បាន និងអាចពេលដែលញ៉ាំចាំអ្នកបន្ថែមខ្ទិះដូង (ដើម) ចូលក្នុងទឹកជ្រលក់ ដើម្បីអោយកាន់តែឈ្ងុយខ្ទិះដូង៕
