សម្រាប់អ្នករស់នៅក្រោមសម្ពាធសាលាផង កន្លែងធ្វើការផង អាចធ្វើឲ្យយើងមានអារម្មណ៍មិនល្អ ពេលខ្លះចង់កើតជាស្ត្រេសក៏មាន។ បើទុកបែបនេះកាន់តែយូរទៅអាចក្លាយជាស្រេ្តសបាន ត្រូវចាំថាជីវិតមិនមានសប្បាយរហូតទេ អ៊ីចឹងត្រូវរកមើលអាហារណាល្អៗ ឆ្ងាញ់ៗសម្រាប់ខ្លួនឯង។ អាហារ ៦ មុខនេះអាចជួយបានពេលយើងមានអារម្មណ៍មិនល្អ៖
១. កំពុងមានអារម្មណ៍ខឹងនរណាម្នាក់ ត្រូវញ៉ាំតែបៃតង
នៅពេលណាយើងដឹងថា ខ្លួនឯងកំពុងខឹងនរណាម្នាក់ទាំងដែលយើងមិនចង់។ ព្យាយាមទប់អារម្មណ៍ខ្លួនឯងបន្តិច ខណៈពេលនេះអាចញ៉ាំជាតែបៃតង ដើម្បីធ្វើឲ្យចិត្តយើងនឹងនរ ព្រោះតែបៃតង មិនមែនមានតែជាតិកាហ្វេអ៊ីនទេដែលជួយឲ្យយើងស្រស់ស្រាយទេ វាក៏មានផ្ទុកជាតិ theanine ដែលមានសារៈសំខាន់ក្នុងការជួយរំសាយអារម្មណ៍ និងទប់កំហឹងបានដែរ។
២. មានអារម្មណ៍ជ្រួលច្របល់ គួរតែញ៉ាំ ប្រូខូលី
អារម្មណ៍ជ្រួលច្របល់អាចមកពីការព្រួយបារម្ភពីអ្វីមួយ។ នៅពេលដែលមានរឿងអ្វីមួយដែលត្រូវគិតក្នុងចិត្ត វាធ្វើឲ្យយើងសម្រាកមិនបានស្រួលទេ។ បន្លែដែលមានស្លឹកពណ៌បៃតងដូចជាប្រូខូលី ស្ពៃពុយឡេង អាចជួយបាន ព្រោះវាសម្បូរដោយអាស៊ីដហ្វូលិក ដែលអាចកាត់បន្ថយអារម្មណ៍ជ្រួលច្របល់ក្នុងចិត្តយើងបាន។
៣. មានអារម្មណ៍ស្ត្រេស ញ៉ាំសូកូឡាខ្មៅ
អារម្មណ៍នេះប្រហែលជាអ្នកអាននឹងជួបញឹកញាប់ហើយ។ មនុស្សម្នាក់ៗមានវិធីរំសាយស្ត្រេសខុសៗគ្នា តែយើងមានវិធីមួយដែលអាចជួយអ្នកគ្រប់គ្នាបាន ដោយញ៉ាំសូកូឡាខ្មៅ ព្រោះវាមានជាតិកាកាវច្រើន មានជាតិ flavanol ច្រើនអាចកាត់បន្ថយអ័រម៉ូនស្ត្រេសក្នុងរាងកាយបាន។
៤. មានអារម្មណ៍ក្រៀមក្រំ គួរតែញ៉ាំទឹកដោះគោ
នៅពេលរាងកាយខ្វះវីតាមីន D យើងប្រហែលជាមានអារម្មណ៍មិនល្អដូចជាព្រួយបារម្ភច្រើន និងធុញថប់ដោយមិនដឹងមូលហេតុ។ ដូចនេះហើយ អ្វីដែលរាងកាយត្រូវការគឺវីតាមីន Dឲ្យបានគ្រប់គ្រាន់។ ដំណោះស្រាយដ៏ងាយស្រួលគឺញ៉ាំទឹកដោះគោ ដូចនេះរាងកាយនឹងទទួលបានវីតាមីន D គ្រប់គ្រាន់។
៥. មានអារម្មណ៍រសាបរសល់ ញ៉ាំត្រីសាល់ម៉ុន
អារម្មណ៍ព្រួយបារម្ភ អាចបណ្តាលទៅជាស្ត្រេសបាន បើយើងឧស្សាហ៍មានអារម្មណ៍បែបនេះកើតឡើង គួរតែញ៉ាំត្រីសាល់ម៉ុន ព្រោះវាមានអូមេហ្គា ៣ អាចបង្កើត serotonin ដែលជួយអារម្មណ៍ឲ្យនឹងនរ និងកាត់បន្ថយការព្រួយបារម្ភបាន។
៦. ពិបាកផ្ទង់អារម្មណ៍ ញ៉ាំផ្លែប៉ោម
នៅពេលដែលត្រូវផ្តោតអារម្មណ៍ធ្វើការ តែមានអារម្មណ៍មិនស្ងប់ នោះបណ្តាលឲ្យពិបាកផ្ទង់អារម្មណ៍ ដែលធ្វើឲ្យយើងបង្កើតកំហុសបានយ៉ាងងាយ។ យើងអាចរកជំនួយពីធម្មជាតិបាន ដោយការញ៉ាំផ្លែប៉ោម ដើម្បីបន្ថែមវីតាមីន C ដល់រាងកាយ ដើម្បីជួយបង្កើតការផ្ទង់អារម្មណ៍។
