ជិតដល់ម៉ោងបាយថ្ងៃហើយ សម្រាប់ស្ត្រីមេផ្ទះ ប្រសិនមិនទាន់រកនឹកឃើញធ្វើម្ហូបអីពិសាទេ Admin ណែនាំមុខម្ហូបថ្ងៃត្រង់មួយ ដែលជាមុខម្ហូបពេញនិយមខ្លាំងសម្រាប់ញ៊ាំជុំគ្រួសារ នោះគឺខម៉ាំ សម្រាប់មុខម្ហូបនេះ ប្រសិនបើធ្វើត្រូវតាមរូបមន្តវិញ គឺឆ្ងាញ់ខ្លាំង អាចនិយាយបានថា ញ៊ាំបាយមិនដឹងអស់ពីឆ្នាំងទេ? តោះចឹងអាចមើលរូបមន្តនេះ ច្នៃតាមចំណង់ចំណូលចិត្តណា៎។
☑️គ្រឿងផ្សំ
- សាច់ជ្រូក3ជាន់ ហាន់ស្ដើងៗល្មម
- សាច់ជ្រូកចិញ្ច្រាំ ( សាច់សុទ្ធ )
- ត្រីពោ កាត់ជាដុំៗល្មម
- ម៉ាំ ចិញ្ច្រាំអោយម៉ត់
- ត្រប់វែង កាត់ជា4
- ស្ករស ម្សៅស៊ុប អំបិល និង ទឹកអំពិលទុំ
- ខ្ទឹមសចិញ្ច្រាំ រំលីងអោយឈ្ងុយ
- ស្លឹកជីនាងវង
- បន្លែរួមមាន : ព្រលិត ត្រសក់ ផ្កាស្នោ ស្ពៃក្ដោប ជីគ្រប់មុខ និងមានបន្លែច្រើនមុខទៀតតាមចំនូលចិត្ត ។
☑️ វិធីធ្វើ
– ដាក់ទឹកចូលក្នុងឆ្នាំងតិចល្មម ដាំអោយពុះ រួចដាក់មាំុចូល ( អាច់ដាក់មាំុចូលដូចយើងបង់ប្រហុក រួចយកកាកចេញ ដើម្បីកុំអោយដោយឆ្អឹង ) រួចកូរអោយរលាយចូលគ្នាអស់ ហើយដាក់ សាច់ជ្រូក3ជាន់ ស្ករស ម្សៅស៊ុប អំបិល រំងាស់អោយផុយសាច់បន្តិច
– បន្ទាប់មកដាក់ ត្រី សាច់ជ្រូកចិញ្ច្រាំ និង ត្រប់ រួចទុកអោយពុះ ភ្លក់មើលអោយល្មមតាមការនិយមចូលចិត្ត ( ធ្វើអោយរៀងខាប់បន្តិច ) រំងាស់ឆ្អិនហើយ ទើបដាក់ទឹកអំពិលទុំចូល ភ្លក់មើលម្ដងទៀត បើត្រូវម៉ាត់ហើយ ដាក់ខ្ទឹមសបំពង និង ស្លឹកជីនាងវងចូល រួចជាការស្រេច ។
– យកមកទទួលទានជាមួយបន្លែដែលលោកអ្នកបានត្រៀមទុក ៕ ប្រភព: ស្ត្រីមេផ្ទះ
