នៅប្រទេសអារ៉ាប់អេមីរ៉ាត់ មានគម្រោងថ្មីលើផ្នែកសេវាដឹកជញ្ជូនលើអាកាសដើម្បីបញ្ចៀស ការបើកបរលើផ្លូវដ៏មមាញឹក និងឆ្លងកាត់តំបន់វាលខ្សាច់ទៅកាន់ទីក្រុងដែលមានអគារខ្ពស់កប់ពពក Dubai ។
លោក Mattar Al Tayerប្រធានអាជ្ញាធរសាធារណការក្រុងថ្លែងថា Drone Taxi ដែលអាចដឹកជញ្ជូនមនុស្សបានតែម្នាក់ជាមួយនឹងកាបូបយួរដៃតូចមួយនោះ នឹងអាចចាប់ផ្តើមសេវាថ្មីនេះយ៉ាងលឿនបំផុតនៅត្រឹមខែកក្កដា ខាងមុខ ។ វាជាផ្នែកមួយនៃគម្រោងមហិច្ឆតាបង្កើនបច្ចេកវិទ្យាក្នុងទីក្រុងផងដែរ ។
នៅថ្ងៃសាកល្បងហោះហើរលើកទីមួយនៅក្នុងទីក្រុង Dubai មាន Drone ចំនួន៨គ្រឿងរបស់ក្រុមហ៊ុនចិន Ehang បានហោះហើរឆ្លង់កាត់អគារនិមិត្តរូបទីក្រុង និងជាអគារខ្ពស់លំដាប់ថ្នាក់ពិភពលោក Burj Al Arab ។
លោកMattar ថ្លែងថា Drone ដែលបានឃើញបណ្តែតខ្លួនលើអាកាសនោះ មិនត្រឹមតែជា Drone ជាគំរូប៉ុណ្ណោះទេ តែវាជា Drone ពិតប្រាកដដែលនឹងត្រូវយកមកដាក់ដំណើរការក្នុងទីក្រុង ។
Drone Ehang ១៨៤ អាចហោះហើរបានចម្ងាយ៤៩គីឡូម៉ែត្រ ឬ៣០នាទីសម្រាប់ការសាកថ្មម្តង ។ ចំណែកល្បឿនរបស់វា គឺរត់បាន១៦០,៩គីឡូម៉ែត្រក្នុងមួយម៉ោង ប៉ុន្តែអាជ្ញាធរនិយាយថា គេអនុញ្ញាតឲ្យ Drone រត់ត្រឹមល្បឿន៩៩,៧៧គីឡូម៉ែត្រក្នុងមួយម៉ោងតែប៉ុណ្ណោះ ។
វាអាចដឹកអ្នកដំណើរត្រឹមទម្ងន់៩៩,៧គីឡូក្រាមប៉ុណ្ណោះ ។ នេះបើតាមការផ្សាយពាណិជ្ជកម្មរបស់អាជ្ញាធរសាធារណការនិងគមនាគមន៍ ។
អ្នកដំណើរត្រូវចុចទៅកាន់គោលដៅដែលខ្លួនចង់ទៅមុនពេល Drone ហោះឡើង ។ ក្នុងវីដេអូផ្សព្វផ្សាយរបស់ Drone Ehang ១៨៤នោះ ជា Drone ដែលគ្មានអ្នកបើកបរទេ តែត្រូវបានឃ្លាំមើលពីទីតាំងបញ្ជា ។
ខាងរោងចក្របាននិយាយថា ប្រសិនបើមានកំហុសបច្ចេកវិទ្យាណាមួយ Drone ដឹកអ្នកដំណើរនោះនឹងចុះចតភ្លាមៗនៅកន្លែងដែលមានសុវត្ថិភាពជិតបំផុត ។ លោក Sheikh Mohammed bin Rashid Al Maktoum បានប្រកាសកាលពីឆ្នាំមុនថា នៅឆ្នាំ២០៣០ ខាងមុខការធ្វើដំណើរប្រមាណ២៥% នៅក្នុងទីក្រុងDubai នឹងធ្វើឡើងដោយគ្មានអ្នកបើកបរ ។
ទីក្រុង Dubai បានដាក់ឲ្យដំណើរការនូវប្រព័ន្ធផ្លូវក្រោមដីវែងបំផុតក្នុងពិភពលោកសម្រាប់រថយន្តដែលគ្មានអ្នកបើកបរ និងចាប់ផ្តើមបើកបរសាកល្បងកាលពីឆ្នាំមុនដោយប្រើប្រាស់រថយន្តដែលផលិតដោយក្រុមហ៊ុនបារាំង Eaymile ។ ជាងនេះទៀត អាជ្ញាធរទីក្រុងមួយនេះក៏បានចុះហត្ថលេខាក្នុងការសាងសង់Hyperloop One ពីទីក្រុង Dubai ទៅរដ្ឋធានីAbu Dhabi របស់អារ៉ាប់រួមដែរ ។ Hyperloopគឺជាបំពង់ដែលអាចឲ្យរថយន្តរត់បានល្បឿនលឿនជាងយន្តហោះ ៕