រាជធានីភ្នំពេញ ៖ ក្នុងឆ្នាំ២០១៧ នេះយុវតីស្រស់ស្អាតរបស់កម្ពុជាជាច្រើននាក់បានចាកចេញពីប្រទេសជាបន្តបន្ទាប់ទៅចូលរួមប្រកួតប្រជែងសម្រស់លក្ខណៈអន្តរជាតិ ។
សម្រាប់នារីកំពូលសម្រស់របស់កម្ពុជាម្នាក់ទៀតគឺកញ្ញា ប៊ី សុធារី នឹងតំណាងជាបវរកញ្ញាកម្ពុជា ទៅចូលរួមកម្មវិធីប្រកួតប្រជែងសម្រស់លក្ខណៈអន្តរជាតិមួយទៀត គឺប្រកួត «បវរកញ្ញាចក្កវាទ្ប (Miss Universe International) ២០១៧ ដែលនឹងប្រព្រឹត្តទៅនៅសហរដ្ឋអាមេរិក និងមានការផ្សាយបន្តផ្ទាល់នៅរាត្រីថ្ងៃទី២៦ ខែវិច្ឆិកា ។
យោងតាមគេហទំព័រ (Website) របស់ Miss Universe ឲ្យដឹងថា ការប្រកួតសម្រស់ Miss Universe 2017 គឺជាការរៀបចំឡើងលើកទី៦៦ នៃការប្រកួតប្រជែងសម្រស់អន្តរជាតិ ហើយពិធីករក្នុងកម្មវិធីនេះគឺលោក Steve Harvey ។ អ្វីដែលកាន់តែអស្ចារ្យនោះ កម្មវិធីដែលមាននារីកំពូលសម្រស់ពីបណ្តាប្រទេសនានាលើពិភពលោកនោះនឹងផ្សាយបន្តផ្ទាល់លើកញ្ចក់ទូរទស្សន៍ Fox ។ បវរញ្ញា Iris Mittenaere ដែលជាម្ចាស់មកុដឆ្នាំ២០១៦ កន្លងទៅនឹងបំពាក់មកុដកំពូលសម្រស់ឯកជូនទៅអ្នកស្នងតំណែងថ្មីដែលនឹងប្រកាសនៅយប់ថ្ងៃទី២៦ ខែវិច្ឆិកា ។
ចំពោះនារីកំពូលសម្រស់កម្ពុជា Miss Universe Cambodia វិញ គឺកញ្ញាប៊ី សុធារី ។ កញ្ញាប៊ី សុធារី ដែលមានស្រុកកំណើតនៅរាជធានីភ្នំពេញលើកឡើងថា៖ «នាងខ្ញុំពិតជារំភើបខ្លាំងណាស់ក្នុងការតំណាងឲ្យប្រទេសជាទីស្រឡាញ់របស់នាងខ្ញុំទៅចូលរួមប្រឡងបវរកញ្ញាចក្កវាឡ ។ នាងខ្ញុំនឹងខំប្រឹងប្រែងឲ្យអស់ពីសមត្ថភាពដើម្បីបង្ហាញពីភាពស្រស់ស្អាតពិតរបស់នារីកម្ពុជា ហើយពិភពលោកនឹងដឹងបន្ថែមអំពីប្រទេសរបស់យើង» ។
កញ្ញាឯកកម្ពុជាប៊ី សុធារី នឹងតំណាងឲ្យកម្ពុជាចូលរួមប្រកួតកម្មវិធី «កញ្ញាឯកចក្កវាឡ ២០១៧» ឬ «Miss Universe Internal ២០១៧» ។ នេះបើយោងតាមការប្រកាសលើគេហទំព័រផ្លូវការរបស់ Miss Universe International.
សេចក្តីប្រកាសរបស់ Miss Universe International អមនឹងរូបថតរបស់បវរកញ្ញាឯកកម្ពុជាផងនោះបានសរសេរថា៖ «កញ្ញាប៊ី សុធារី មានកិត្តិយសជាអ្នកតំណាងដំបូងគេនៃប្រទេសកម្ពុជាក្នុងការប្រកួតប្រជែងបវរកញ្ញា Miss Universe។ នាងមានបំណងចង់តំណាងឱ្យប្រទេសកំណើតរបស់នាងនៅលើឆាកអន្តរជាតិ ក៏ដូចជាធ្វើជាគំរូសម្រាប់នារីវ័យក្មេងនៅក្នុងប្រទេសរបស់នាង ។ នៅពេលនាងមានអាយុទើបតែ១៤ ឆ្នាំ បានចាប់ផ្តើមរកប្រាក់ចំណូលផ្ទាល់ខ្លួនក្នុងអាជីពជាតារាម៉ូដែលអាជីព ៕
