ជធានីភ្នំពេញ ៖ ក្រុមគ្រួសាររបស់តារាកំប្លែងនាយវីតាមីនសេបានអះអាងថា អាការៈជំងឺរបស់លោកនឹងដឹងលទ្ធផល នៅថ្ងៃទី២៧ វិច្ឆិកា ខាងមុខនេះ បន្ទាប់ពីក្រុមគ្រូពេទ្យនៅប្រទេសថៃ បានធ្វើការពិនិត្យមើលពីស្ថានភាពជំងឺរបស់លោករួចមក។
អ្នកនាង ប៉េងប៉ោង បានអះអាងថា រហូតមកដល់ពេលនេះ អាការៈជំងឺឪពុករបស់នាងមិនទាន់ដឹងយ៉ាងណានោះទេ គឺត្រូវរង់ចាំនៅថ្ងៃទី២៧ ខាងមុខ ទើបដឹងលទ្ធផល។ ក្រុមគ្រូពេទ្យបានចាប់ផ្តើមពិនិត្យពីជំងឺឪពុករបស់អ្នកនាង បន្ទាប់ពីបានសម្រាកព្យាបាលនៅក្នុងមន្ទីរពេទ្យមួយកន្លែង នាទីក្រុងបាងកក ក្រោយពេលចាកចេញទៅកាន់ទីនោះកាលពីសប្តាហ៍មុន។
បើតាមអ្នកនាង ប៉េង ប៉ោង ទាំងរូបនាង និងលោក វីតាមីនសេ បានបន្តស្នាក់នៅក្នុងប្រទេសថៃនៅឡើយ រហូតចាំទទួលលទ្ធផល ដោយសារតែនាងមិនអាចឲ្យឪពុករបស់ខ្លួនទៅមកច្រើនដងឡើយ ព្រោះអាចបណ្តាលឲ្យមានការហត់នឿយខ្លាំង។
ដោយឡែក ក្នុងពេលដែលតារាកំប្លែង នាយ វិតាមីសេ បាននឹងកំពុងសម្រាកព្យាបាលនៅប្រទេសថៃនោះ អ្នកនាង ប៉េងប៉ោង បានប្រាប់ឲ្យដឹងថា ក្រុមគ្រួសារអ្នកនាងបានទទួលថវិកាឧបត្ថម្ភចំនួន៥,០០០ដុល្លារ ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា កាលពីថ្ងៃទី២០ វិច្ឆិកា នេះ តាមរយៈលោកជំទាវ ម៉ែន នារីសុភ័ក្ត អគ្គលេខាធិការរងទី១ កាកបាទក្រហមកម្ពុជា ។
អ្នកនាងបានចាត់ទុកការជួយឧបត្ថម្ភពីសម្តេចប្រធានកាកបាទក្រហមកម្ពុជា នាពេលនេះ គឺជាការយកចិត្តទុកដាក់ និងអាណិតស្រលាញ់ពីសំណាក់ថ្នាក់ដឹកនាំ ចំពោះប្រជាពលរដ្ឋក្រីក្រខ្វះខាត ចាស់ជរា កុមារកំព្រា មានជំងឺ ជាពិសេសសិល្បករសិល្បការិនីដែលមានទុក្ខ និងមានជំងឺ ដែលសម្តេចប្រធានតែងតែបានធ្វើជាបន្តបន្ទាប់ ៕
