រាជធានីភ្នំពេញ ៖ ធ្លាប់តែធ្វើឲ្យទស្សនិកជនសើចសប្បាយនាពេលកន្លងមក ពេលនេះតារាកំប្លែងនាយចឺម បានប្រកាសដកខ្លួនចេញពីក្រុមកំប្លែង បន្ទាប់ពីងាកទៅចាប់អាជីពចម្រៀងហាក់ទទួលបានការគាំទ្រ ។
ការប្រកាសដកខ្លួនរបស់នាយចឺម នាពេលនេះបានធ្វើឡើង បន្ទាប់ពីនាយចាប់ផ្តើមអវត្តមានសម្តែងកំប្លែងជាមួយក្រុមនៅស៊ីធីអ៊ិនក្នុងមួយរយៈពេលចុងក្រោយនេះ ។
អ្នកដឹកនាំកម្មវិធីកម្សាន្ត និងជាអ្នកដឹកនាំក្រុមកំប្លែងនៅស្ថានីយទូរទស្សន៍ស៊ីធីអិនលោកសុវណ្ណ រិទ្ធី ហៅលោកតា វិចទ័រ បានទទួលស្គាល់ពីដំណឹងនៃការចាកចេញពីក្រុមកំប្លែងរបស់នាយចឺមនេះ ។ នាពេល ថ្មីៗកន្លងមកលោកបានលើកឡើងថា ការដកខ្លួនពីក្រុមកំប្លែងពីនាយចឺម នាពេលនេះគឺមិនមែនកើតឡើងដោយសារមានបញ្ហានៅក្នុងក្រុមនោះឡើយ ពោលគឺមួយរយៈនេះនាយរវល់លើការងារចម្រៀងច្រើនជាង ។
បើតាមលោកតាវិចទ័រ រហូតមកដល់ពេលនេះលោកនៅមិនទាន់ទទួលដំណឹងច្បាស់លាស់ណាមួយពីតារាកំប្លែងនាយចឺម នៅឡើយទេ ។
នាយចឺម លើកឡើងកាលពីពេល ថ្មីៗកន្លងមកថា ការចាកចេញពីក្រុមកំប្លែងនាពេលនេះ មិនមែននាយឈប់ទាំងស្រុងឡើយ ប៉ុន្តែដោយសារនាយចង់ពង្រឹងអាជីពចម្រៀងឲ្យបានរឹងមាំក្នុងផលិតកម្មសាន់ដេប៉ុណ្ណោះ ។
នាយមានថ្ងៃនេះដោយសារតែការលេងកំប្លែង ដូច្នេះនាយនឹងមិនភ្លេចកំណើតដើមនោះឡើយ ហើយបើមានឱកាសច្រើននាយនឹងនៅតែចូលរួមលេងកំប្លែងជូនទស្សនិកជនបានទស្សនាដូចមុនដដែល ។
មួយរយៈចុងក្រោយនេះកេរ្តិ៍ឈ្មោះរបស់តារាកំប្លែងដែលវិវឍ្ឍខ្លួនជាតារាចម្រៀងនាយចឺម បានសាងកេរ្តិ៍ឈ្មោះល្បីគួសមតាមរយៈបទចម្រៀងដែលកំពុងតែពេញនិយមពីយុវវ័យក្នុងផលិតកម្មសាន់ដេ ។
ទឹកដមសំឡេងរបស់នាយចឺមត្រូវបានគេវាយតម្លៃថា ល្អជាមួយនឹងបទចម្រៀងដែលត្រូវចិត្តយុវវ័យថែមទៀត ខណៈពេលដែលនាយចឺម ទំនងជាអាចជំនួសតំណែងលោកខេមរៈ សិរីមន្ត ដែលបានចាកចេញពីសាន់ដេ ទៅនៅផលិតកម្មហង្សមាសនោះ ៕
