បទ «​រាំ​ស្កុប​» របស់​នាង​យូ​រី ត្រូវ​ហា​មចាក់​ផ្សាយ​ដោយសារ​រឿង​មួយ​!

រាជធានី​ភ្នំពេញ​ ៖ បទ​​ចម្រៀង​ថ្មី​មួយ​បទ​របស់​ផលិតកម្ម​សាន់​ដេ ដែល​មាន​ចំណងជើង​ថា «​រាំ​ស្កុប​» ដែល​ច្រៀង​ដោយ​តារា​ស្រី​សិច​ស៊ី នាង​យូ​រី ត្រូវ​បាន​ក្រសួង​ព័ត៌មាន​សរសេរ​លិខិត​ជូន​ទៅ​ម្ចាស់​ស្ថានីយទូរទស្សន៍ ​និង​ទូរទស្សន៍​គ្រប់​ប្រព័ន្ធ និង​ម្ចាស់​ទូរទស្សន៍​អន​ឡាញ​គ្រប់​ប្រភេទ «​បញ្ឈប់​ការ​ចាក់​ផ្សាយ​» ដោយសារ​តែ​វី​ដេ​អូ​បទ​ចម្រៀង​នេះ​ បាន​ប្រើ​ស្លាក​​សញ្ញា (Logo) របស់​មន្ទីរពេទ្យ​កាល់​ម៉ែត ដោយ​គ្មាន​ការ​អនុញ្ញាតិ ។ នេះ​បើ​យោង​តាម​​លិ​ខិ​ច​មួយ​ច្បាប់​របស់​ក្រសួង​ព័ត៌មាន​ចុះ​នៅ​ថ្ងៃ​ទី ៣០ ខែមីនា ​ឆ្នាំ​២០១៨ និង​ចុះ​ហត្ថ​លេខា​ដោយ​រដ្ឋមន្ត្រី​ខៀវ កា​ញា​រី​ទ្ធ ។

ក្នុង​លិខិត​បាន​បញ្ជាក់​ថា ផលិតកម្ម​សាន់​ដេ​បាន​ផលិត​វី​ដេ​អូ​ចម្រៀង​នេះ​ដែល​នៅ​ក្នុង «ឈុត​សម្តែង បទ​ចម្រៀង​នោះ​បាន​ប្រើប្រាស់​ឯកសណ្ឋាន​ដែល​មាន​ស្លាក​សញ្ញា (Logo) របស់​មន្ទីរពេទ្យ​កាល់​ម៉ែត​ដោយ​ពុំ​មានការ​អនុញ្ញាត​ពី​មន្ទីរពេទ្យ​កាល់​ម៉ែត ធ្វើ​ឲ្យ​ប៉ះពាល់​ដល់​កិត្តិយស សេចក្តី​ថ្លៃថ្នូរ​របស់​មន្ទីរពេទ្យ និង​ទឹកចិត្ត​ក្នុង​ការ​បំពេញការងារ​វិជ្ជា​ជីវៈ​របស់​បុគ្គលិក​នៃ​មន្ទីរពេទ្យ​កាល់​ម៉ែត​ទាំងមូល​»​។ លិខិត​របស់​ក្រសួង​ព័ត៌មាន​ដដែល​បាន​បញ្ជាក់​ថា សូម​ឲ្យ​ម្ចាស់​ស្ថានីយ​ទាំងអស់​អនុវត្ត​ឲ្យ​មាន​ប្រសិទ្ធភាព​ចាប់ពី​ថ្ងៃ​ជូន​ដំ​ណឹង​នេះ​តទៅ ៕