មរណ​ភាពលោក វីតាមីន​សេ ធ្វើ​ឱ្យ​មហាជន​សោកស្តាយ​ពន់​ពេក​

រាជធានី​ភ្នំពេញ ៖ ដំណឹង​នៃ​ការ​ទទួលមរណភាព​របស់​តារា​កំប្លែង​លោក វីតាមីន​សេ ត្រូវ​បាន​គេ​ចែកចាយ​យ៉ាង​ព្រោងព្រាត​ពេញ​បណ្តាញ​សង្គម​ហ្វេ​ស​ប៊ុ​ក​ក្រោយ​មួយ​ថ្ងៃ បន្ទាប់​ពី​តារា​កំប្លែង​រូប​នេះ​បាន​លាចាក​លោក​មិន​ត្រឡប់​ក្រោយ​កាលពី​រាត្រី​ថ្ងៃ​ទី​២៩ ឈាន​ចូល​ថ្ងៃ​ទី​៣០ ខែមីនា ក្នុង​ជន្មា​ន​យុ​៦៩​ឆ្នាំ​។

ប្រធាន​សមាគម​សិល្បករ​អ្នក​នាង ច​ន ច័ន្ទ​ល​ក្ខិ​ណា បាន​បង្ហោះ​សារ​ថា «​នាង​ខ្ញុំ​សូម​សម្តែង​នូវ​សមាន​ទុក្ខ​យ៉ាង​ក្រៀមក្រំ​បំផុត​ជូន​ចំពោះ​អ្នក​បង ប៉េង ប៉ោង និង​ក្រុម​គ្រួសារ ដែល​បាន​បាត់បង់​លោកឪពុក​ជាទី​ស្រលាញ់ និង​ជីតា​ជាទី​គោរព​លោកពូ​វីតាមីន​សេ​ដែល​ទទួលមរណភាព​កាលពី​ម៉ោង​១២​និង​១៥​យប់​រំលង​អធ្រាត្រ​ចូល​ថ្ងៃ​ទី​៣០ មីនា ដោយ​រោគាពាធ ។ នាង​ខ្ញុំ​សូម​បួងសួង​ដល់​ដួង​វិញ្ញាណក្ខន្ធ​របស់​លោកពូ​ទៅ​ប្រតិស្ឋាន​នៅ​ទីកន្លែង​ដ៏​ខ្ពង់ខ្ពស់ ផុត​ចាក​សេចក្តី​ទុក្ខ​ទាំងឡាយ​ទាំងពួង កុំបី​ឃ្លាត​ក្លាយទៅជា​បការៈ​ដទៃ​ឡើយ​នេះ​ជា​ការ​បាត់បង់ វិ​រៈ​សិល្បករ​ដ៏​មាន​តម្លៃ​បំផុត ន​ក្នុង​វិស័យ​សិល្បៈ​ខ្មែរ​»​។

រីឯ​អ្នក​កំប្លែង​រួម​ជំនាន់​លោក សាន ម៉ៅ ក៏​សម្តែង​ការ​ត្កុ​ក​ក្តួល​យ៉ាង​ខ្លាំង​ផង​ដែរ​ចំពោះ​មរណភាព​របស់​លោក វីតាមីន​សេ នា​ពេល​នេះ​។ បើ​ទោះបីជា​លោក​ហាក់​នៅ​មិន​ទាន់​បាន​ស្បើយ​ពី​ជំងឺ​ប្រចាំ​កាយ​ក៏​ដោយ ប៉ុន្តែ​តារា​រូប​នេះ​នៅ​តែ​ឆ្លៀត​ដើម្បី​បាន​ចូលរួម​បុណ្យសព​លោក វីតាមីន​សេ ព្រោះ​ពួក​លោក​មាន​ប្រវត្តិ​ច្រើន​រាប់​មិន​អស់​ជាមួយ​គ្នា​តាំង​ឆ្នាំ​៧៩​មក​។ រីឯ​តារា​កំប្លែង​ភ្នែក​តូច​លោក ជួង ជី ហៅ​កុយ ក៏​សម្តែង​ការ​ត្កុ​ក​ក្តួល​ផង​ដែរ ក្នុង​ពេល​ដែល​លោក​បាន​បាត់បង់​ដៃគូ​សម្តែង​ដែល​ធ្លាប់​មាន​អនុស្សាវរីយ៍​ជាមួយ​គ្នា​ជា​បន្តបន្ទាប់​។

ក្រៅពី​សារ​របស់​តារា​ខាងលើ​នេះ ក៏​មាន​សារ​រំលែក​ទុក្ខ​ជា​ច្រើន​ទៀត​ពី​សំណាក់​សិល្បករ​ផ្សេង​ៗ​ដែល​បាន​បង្ហោះ​យ៉ាង​ព្រោងព្រាត​តាម​បណ្តាញ​សង្គម​ហ្វេ​ស​ប៊ុ​ក​បង្ហាញ​ពី​ភាព​សោកស្តាយ​ចំពោះ​មរណភាព​របស់​លោក វីតាមីន​សេ នា​ពេល​នេះ​។

គួរ​រំលឹក​ថា លោក មៅ សា​មឿ​ន ហៅ​វីតាមីន​សេ បាន​ទទួលមរណភាព​កាលពី​វេលា​ម៉ោង​​១២ និង​១៥​យប់​រំលង​អា​ធ្រា​ត្រ​ចូល​ថ្ងៃ​ទី​៣០ មីនា ដោយ​រោគាពាធ ។ ខណៈ​ពេល​នេះ​សព​របស់​លោក​ត្រូវ​បាន​តម្កល់​ធ្វើបុណ្យ​នៅ​គេហដ្ឋាន ស្ថិត​នៅ​ផ្លូវ​២៧១ ម្ដុំ​ត្រឡោក​បែក ដោយ​កំណត់​ដង្ហែ​ទៅ​វត្ត​មកុដ​បុរី ហៅ​វត្ត​តាំងក្រសាំង ខាងក្រោយ​វត្ត​ទឹកថ្លា នៅ​ថ្ងៃអាទិត្យ ទី​១ មេ​សា ដើម្បី​បូជា​នៅ​វេលា​ម៉ោង​៨​យប់ ៕