ប្រឡូក​សិ​ល្បះ​ជាង​៣០​ឆ្នាំ​លោក នូ ស៊ឹ​ប គ្មាន​សល់​អ្វី​ក្រៅពី​ផ្ញើ​ជីវិត​នៅផ្ទះ​ជួល

រាជធានី​ភ្នំពេញ​៖ តារាចម្រៀង​ជើង​ចាស់​មាន​ទឹកដម​សម្លេង​ស្រទន់​លោក នូ ស៊ឹ​ប បាន​ចាប់ផ្តើម​ប្រឡូក​ក្នុង​វិស័យ​ចម្រៀង​ប្រមាណ​ជា​ជាង​៣០​ឆ្នាំ​មក​ហើយ ប៉ុន្តែ​បើ​និយាយ​ពី​កម្រិតជីវភាព​វិញ​តារាចម្រៀង​រូប​នេះ​ហាក់​មិន​មាន​អ្វី​សេសសល់​ច្រើន​ឡើយ ក្រៅ​តែ​អំពី​ការ​នៅផ្ទះ​ជួល ក្នុង​ជីវភាព​ដ៏​ខ្វះខាត​។

ក្នុង​វ័យ​៧១​ឆ្នាំ​លោក នូ ស៊ឹ​ប កំពុង​តែ​ស្នាក់​នៅផ្ទះ​ជួល​មួយ​កន្លែង​នៅ​មុខ​ពេទ្យរ​ស្ស៊ី​ជាមួយនឹង​ក្មួយ និង​ចៅ​២​នាក់ ដែល​ការ​ស្នាក់​នៅ​របស់​លោក​គឺ​មាន​រយៈពេល​ប្រមាណ​ជាង​១០​ឆ្នាំ​មក​ហើយ បន្ទាប់​ពី​លោក​បាត់បង់​ស្ទើ​តែ​ទាំងស្រុង​នូវ​ការ​សម្តែង​។ ម្ចាស់​បទ «​អនិច្ចា​រ្យ​អ្នកស្រែ​» លោក នូ ស៊ឹ​ប បាន​រៀបរាប់​ថា ក្នុង​ពេល​បច្ចុប្បន្ន​លោក​បាន​បាត់បង់​ឱកាស​ក្នុង​ការ​ច្រៀង​ជា​ច្រើន​ឆ្នាំ​ហើយ ដោយសារ​តែ​គ្មាន​អ្នក​ហៅ បូក​រួម​ជាមួយ​ជំងឺ​ប្រចាំ​កាយ​និង​ភាព​ចាស់ជរា​ផង​នោះ​។


លោក នូ ស៊ឹ​ប ថ្លែង​ទាំង​ទឹកមុខ​ស្រពោន​ថា​៖ «​បើ​ទោះបីជា​រូប​ខ្ញុំ​បាន​ប្រឡូក​ក្នុង​វិស័យ​សិ​ល្បះ​ស្ទើ​ពេញ​មួយ​ជីវិត​ក៏​ពិតមែន ប៉ុន្តែ​រហូត​មក​ដល់​ពេល​នេះ​គឺ​មិន​មាន​អ្វី​ច្រើន​សល់​ជាប់​នៅ​ក្នុង​ខ្លួន​ឡើយ​។ តែ​ខ្ញុំ​កំពុង​តែ​ផ្ញើ​វាសនា​និង​បន្តជីវិត​ដែល​នៅ​សេសសល់​ចុង​ក្រោយ​នេះ​នៅ​ក្នុងផ្ទះ​ជួល ក្រោម​ការ​ជួយ​ឧបត្ថម្ភ​ពី​សប្បុរសជន​នានា​ដែល​បាន​ស្គាល់​និង​អាណិតអាសូរ​ដល់​រូប​ខ្ញុំ​តែ​ប៉ុណ្ណោះ​»​។ បើ​តាម​លោក នូ ស៊ឹ​ប លោក​បាន​មក​នៅផ្ទះ​ជួល​នេះ​ប្រមាណ​ជាង​១០​ឆ្នាំ​មក​ហើយ ដោយ​ក្នុង​មួយ​ខែ​ត្រូវ​ចំណាយ​៥០​ដុល្លារ​សម្រាប់​ថ្លៃ​ជួល ជាមួយនឹង​ការ​បូក​រួម​ថ្លៃ​ទឹក​ថ្លៃ​ភ្លើង​នោះ​គឺ​ជិត​១០០​ដុល្លារ​ក្នុង​មួយ​ខែ​។

លោក​បន្ត​ទាំង​អួល​ដើម​.​ក ថា​សព្វថ្ងៃ​លោក​មិន​អាច​ដើរ​ច្រៀង​បាន​ដូច​មុន​ទៀត​ឡើយ​ហើយ​រាល់​ការ​ចំណាយ​ប្រចាំ​ថ្ងៃនេះ​គឺ​លោក​បាន​មក​ពី​ជួយ​ពី​សប្បុរសជន​នានា និង​ប្រាក់ខែរ​ត្រែ​ត (​ប្រាក់​ចូល​និវត្តន៍​)​ជា​ទាហាន​ប៉ុណ្ណោះ​។ លោក នូ ស៊ឹ​ប បាន​ឲ្យ​ដឹង​ទៀត​ថា លោក​បាន​ចូល​ប្រឡូក​ក្នុង​វិស័យ​សិ​ល្បះ​ចម្រៀង​នេះ​តាំងពី​ជំនាន់​បែក​ខ្មែរក្រហម​មក​ម្លេះ ដោយពេល​នោះ​លោក​មានការ​គាំទ្រ​ខ្លាំង​ដោយសារ​តែ​លោក​ច្រៀង​តែ​បទ​បដិវត្តន៍​។ លុះ​មក​ដល់​សម័យ​ឆ្នាំ​៨០​លោក​បាន​ចូល​បម្រើ​ការងារ​ជា​នាយទាហាន ដែល​បាន ចូល​និវត្តន៍​តាំងពី​ឆ្នាំ​២០០៥ នៅ​ពេល​លោក​ទទួល​បាន​ត្រឹម​សក្តិ​២​ប៉ុណ្ណោះ និង​ទទួល​បាន​ប្រាក់ខែ​៤០​ម៉ឺន​រៀល​ក្នុង​មួយ​ខែ​៕