ប្រហែល​ជា​ស្គាល់​ហើយ​ នំ​ចាន​ប្រៃ អាហារ​ល្បី​ប្រចាំ​ខេត្ត​កំពត​ ចង់​ញ៉ាំ​ពិបាក​រក​ទិញ​ណាស់​ ព្រោះ​មិន​សូវ​មាន​អ្នក​លក់​ ទាល់​តែ​ទៅ​កំពត​ទើប​បាន​ញ៉ាំ​។​ ឈប់​ពិបាក​ទៀត​ទៅ​ ចាំ​បាច់​ទៅ​ណា​ឆ្ងាយ​ធ្វើ​អី​ ម៉េច​មិន​សាក​រៀន​ធ្វើ​ញ៉ាំ​នៅ​ផ្ទះ​ខ្លួន​ឯង​ទៅ​ ចាំ​ Admin ប្រាប់​រូបមន្ត​និង​គ្រឿង​ផ្សំ​៖​

គ្រឿង​ផ្សំ​ទី​១​៖

  • ម្សៅ​សាយ​ ១ ​កូន​ចាន​ចង្កឹះ
  • ម្សៅ​ឆា​ ២ ស្លាប​ព្រា​បាយ​
  • អំបិល​ កន្លះ​ស្លាប​ព្រា​កាហ្វេ
  • ទឹក​ក្តៅ​ ១ កែវ​កន្លះ
  • ទឹក​ត្រជាក់ ១​ កែវ​កន្លះ

គ្រឿង​ផ្សំ​ទី​២៖

  • ស្លឹក​ខ្ទឹម​ហាន់​ហើយ​ ១ កូន​ចាន​ចង្កឹះ
  • បង្គា​ ១៥ គ្រាប់
  • សាច់​ជ្រូក​ចិញ្ច្រាំ​ ៣ ខាំ
  • ប្រេង​ឆា​ ១ ស្លាប​ព្រា​បាយ
  • ខ្ទឹម​ស​ចិញ្ច្រាំ​ហើយ​ ១ ស្លាប​ព្រា​បាយ
  • ម្សៅ​ស៊ុប​កន្លះ​ស្លាប​ព្រា​បាយ
  • ស្ករ​ កន្លះ​ស្លាប​ព្រា​បាយ
  • អំបិល​ កន្លះ​ស្លាប​ព្រា​កាហ្វេ

របៀប​ធ្វើ១​៖

១. យក​គ្រឿង​ផ្សំ​ទី​១ លាយ​ចូល​គ្នា​ រួច​ចាក់​ទឹក​ត្រជាក់​ចូល​កូរ​ឲ្យ​រលាយ​ម្សៅ​សព្វ​សិន កុំ​ទាន់​ចាក់​ទឹក​ក្តៅ​ (ព្រោះ​ខ្លាច​កក)

២. យក​ទឹក​ក្តៅ​ចាក់​ចូល​ក្នុង​ម្សៅ​ដែល​កូរ​រលាយ​ល្អ​​ ដើម្បី​ឲ្យ​ម្សៅ​ស្វិត

៣. យក​ឡាំង​ឆឹង​ ដាក់​ទឹក​ដាំ​ឲ្យ​ពុះ​ រួច​យក​កូន​ចាន​ទៅ​ចំហុយ​ពី​លើ​ទឹក​ពុះ​ ៥ នាទី​សិន​ សឹម​ចាក់​ម្សៅ​ដែល​លាយ​រួច​ចូល​ក្នុង​កូន​ចាន​ ផ្សេងៗ​ ទុក​ ២៥ នាទី

របៀប​ធ្វើ​ទី​២៖

១. យក​បង្គា​ និង​សាច់​ជ្រូក​ចិញ្ច្រាំ​ចូល​គ្នា​

២. ដាក់​ខ្ទះ​ឲ្យ​ក្តៅ​ ចាក់​ប្រេង​ឆា​ចូល​ ដាក់​ខ្ទឹម​លីង​ឲ្យ​ក្រហម​បន្តិច​ រួច​ចាក់​សាច់​ចូល​ឆា​ឲ្យ​ឆ្អិន​បន្តិច

៣. ដាក់​ស្ករ​ស អំបិល និង​ម្សៅ​ស៊ុប​ចូល​ហើយ​ ត្រូវ​គ្រប់​ទុក​ ២ នាទី​សិន

៤. រួច​ដាក់​ស្លឹក​ខ្ទឹម​ចូល ជា​ការ​ស្រេច​។​

បន្ទាប់​ពី​នំ​ចំ​ហុយ​ម្សៅ​គ្រប់​ ២៥ នាទី​ហើយ​ ត្រូវ​យក​សាច់​ដែល​ឆា​រួច​ទៅ​ដាក់​ពី​លើ​ម្សៅ​នំ​ រួច​គ្រប​វិញ​ប្រហែល​ កន្លះ​នាទី​ រួច​ជា​ស្រេច​។​ នំ​ចាន​ប្រៃ​​ញ៉ាំ​បាន​ហើយ​ អាច​ញ៉ាំ​ជា​មួយ​ទឹក​ត្រឹ​បាញ់​ឆែវ និង​ម្ទេស​ជ្រក់​ ដឹង​តែ​ឆ្ងាញ់​ជាប់​ចិត្ត​ហ្មង​។