ថ្ងៃនេះ admin នឹងនាំគ្នាយើងចូលចង្ក្រានធ្វើពងទាចៀនស្អំ ជ្រលក់កាពិបុកបែបថៃ ញ៉ាំឲ្យឆ្ងាញ់មាត់ម្តង។ ព្រោះរាល់ដងធ្លាប់តែធ្វើកាពិបុកធម្មតាញ៉ាំ តែលើកនេះប្លែក មានពងទាចៀនស្អំ ទុកញ៉ាំជាមួយទៀត។ តោះកុំចាំយូរ ទៅធ្វើញ៉ាំទាំងអស់គ្នា៖

គ្រឿងផ្សំកាពិបុក៖

  • កាពិ ២ ស្លាបព្រាបាយ
  • បង្គាក្រៀម ២ ស្លាបព្រាបាយ
  • ម្ទេស ១ ទៅ ២ ស្លាបព្រាបាយ
  • ខ្ទឹមស ២ មើម
  • ត្រប់ពុតញ៉ង ១ ស្លាបព្រាបាយ
  • ស្ករត្នោត ១ ស្លាបព្រាបាយ
  • ទឹកក្រូចឆ្មារ ១ ស្លាបព្រាបាយ
  • ទឹកត្រី ១ ស្លាបព្រាបាយ
  • ទឹកក្តៅឧណ្ហៗ ៣ ស្លាបព្រាបាយ

វិធីធ្វើ៖

១. ដំបូងត្រូវយកកាពិរុំក្នុងស្លឹកចេក ហើយដាក់ចូលក្នុងខ្ទះក្តៅ ដើម្បីឲ្យវាមានក្លិនឆ្ងុញ ឬអាចដាក់អាំងដោយប្រើធ្យូងក៏បានដែរ

២. បន្ទាប់ត្រូវយកបង្គាក្រៀមត្រាំទឹក ដើម្បីឲ្យវាទន់បន្តិច ទើបបុកទៅឆាប់ម៉ដ្ឋ តែមិនចាំបាច់ម៉ដ្ឋពេកទេ។ បន្ទាប់មកត្រូវដាក់ខ្ទឹមសទៅបុកជាមួយគ្នា

៣. រួចហើយដាក់ម្ទេសទៅបុកជាមួយគ្នា បន្ទាប់មកត្រូវដាក់ត្រប់ពុតញ៉ងចូលដែរ បុកឲ្យម៉ដ្ឋបន្តិច សឹមដាក់កាពិចូល ហើយបុកចូលគ្នាឲ្យសព្វ

៤. បន្ទាប់មកត្រូវដាក់ស្ករត្នោត និងទឹកក្រូចឆ្មារចូល បុកចូលគ្នាឲ្យសព្វ ជាការស្រេច។

គ្រឿងផ្សំពងទាចៀន៖

  • ពងទា ៣ ទៅ ៦ គ្រាប់
  • ស្អំ ១៥០ ក្រាម
  • អំបិល ១ ជឹប

វិធីធ្វើ៖

១. លាយគ្រឿងចូលគ្នាឲ្យសព្វ

២. យកខ្ទះដាក់លើភ្លើង ប្រើកម្តៅល្មម។ ចាក់ពងទាចូល រួចមូលវាដូចក្នងរូប តែត្រូវយកគម្របមកគ្រប ដើម្បីឲ្យឆ្អិនទាំងសងខាង

៣. ពេលឆ្អិន គ្រាន់តែកាត់វាជាកង់ៗ ជាការស្រេច។