ស្លឹកគ្រៃជាក្លិនមួយដែលគេនិយមប្រើនៅកន្លែងស៉្បា ម៉ាស្សាជាដើម ព្រោះវាជួយឲ្យអារម្មណ៍ស្រស់ស្រាយ និងជួយរំសាយស្ត្រេសបាន។ ស្លឹកតយវិញមានក្លិនឈ្ងុយ គេចូលចិត្តប្រើវាដាក់ជាមួយបង្អែមផ្សេងៗ ព្រោះជួយធ្វើឲ្យមានក្លិនកាន់តែល្អ។ អ៊ីចឹងថ្ងៃហ្នឹងសាកមកធ្វើតែទឹកកគល់ស្លឹកគ្រៃ ដាក់ចាហួយស្លឹកតយញ៉ាំម្តងមើល ធានាថាញ៉ាំហើយអារម្មណ៍មិនខាន។
គ្រឿងផ្សំ៖
សម្រាប់តែ៖
- ស្លឹកតយ ៥ ទៅ ៦ សន្លឹក (ត្រូវលាងសម្អាតឲ្យបានស្អាត)
- គល់ស្លឹកគ្រៃ ២ គល់
- ទឹក ១ លីត្រកន្លះ
- ស្ករ ឬទឹកស្ករ តាមចំណូលចិត្ត
សម្រាប់ចាហួយ៖
- ស្លឹកតយ ៦ សន្លឹក
- ទឹក ជិត ១ កែវ
- ម្សៅចាហួយ ១ ស្លាបព្រាកាហ្វេកន្លះ
- ស្ករ ៣ ទៅ ៤ ស្លាបព្រាបាយ
វិធីធ្វើ៖
តែ៖
១. ដាក់ទឹកដាំក្នុងឆ្នាំង បើកភ្លើងឲ្យក្តៅ
២. កួចស្លឹកតយម្តងមួយសន្លឹកៗឲ្យជាប់ ដាក់ចូលក្នុងឆ្នាំង។ ដំគល់ស្លឹកគ្រៃឲ្យបែកតិចៗ រួចកាត់ខ្លីៗដាក់ចូលក្នុងឆ្នាំងដែរ
៣. ដាំរហូតដល់ពុះ ប្រហែល១៥ ទៅ ២០នាទី។ ទឹកនឹងចេញពណ៌បៃតងបន្តិច និងក្លិនប្រហើររបស់ស្លឹកតយ និងគល់ស្លឹកគ្រៃ
៤. ដាក់ស្ករចូលក៏បាន ឬទុកវាចោល ហើយចាំដាក់ទឹកស្ករចូលពេលក្រោយក៏បាន។
ចាហួយ៖
១. កាត់ស្លឹកតយខ្លីៗ ដាក់ចូលក្នុងម៉ាស៊ីនកិន រួចចាក់ទឹកចូល ហើយកិនឲ្យម៉ដ្ឋ រួចត្រងយកកាកចេញ
២. រួចចាក់ម្សៅចាហួយចូល រួចដាក់កូរលើភ្លើងរហូតដល់វាពុះ សឹមបិទភ្លើង រួចលើកចុះ
៣. ចាក់ទឹកចាហួយចូលក្នុងថាស ទុកឲ្យត្រជាក់
៤. ពេលក្លាយជាចាហួយហើយ អាចយកមកកាត់ជារាងជ្រុងតូចៗ (តូចជាងបំពងប៊ឺត)
តែមានហើយ ចាហួយក៏ធ្វើហើយដែរ យើងចាក់តែចូលកែវ (មិនចាំបាច់ទុកដល់ត្រជាក់ទេ) រួចដាក់ទឹកស្ករចូល (បើមិនទាន់ដាក់ស្ករ) តាមចំណូលចិត្ត បន្ទាប់មកដាក់ចាហួយចូល រួចដាក់ទឹកកកចូលបន្ថែម យើងនឹងទទួលបានតែទឹកកកគល់ស្លឹកគ្រៃ ចាហួយស្លឹកតយមួយកែវដែលមានរសជាតិឆ្ងាញ់ ញ៉ាំហើយស្រស់ស្រាយក្នុងចិត្ត និងស្រឡះក្បាលតែម្តង។
