នៅ​តាម​ផ្ទះ​មួយ​ៗ​ ភាគ​ច្រើន​ដឹង​តែ​មាន​ស្រ​កួរ​ពង​ទា​ប្រៃ​ទុក​នៅ​ផ្ទះ​មិន​ដាច់​ទេ​។​ ​វា​ងាយ​ស្រួល​ញ៉ាំ​ ជា​ពិសេស​ព្រឹក​ឡើង​ បើ​ញ៉ាំ​ជា​មួយ​បបរ​ក្តៅ​ៗ​ចាប់​ជាតិ​គ្នា​ហ្មង​ ហើយ​សល់​លុយ​បាយ​ព្រឹក​ទៀត​។​ បើ​អ៊ីចឹង​កុំ​ពិបាក​ទៅ​ទិញ​គេ​ច្រើន​ដង​ រៀន​ធ្វើ​ទុក​ញ៉ាំ​ខ្លួន​ឯង​នៅ​ផ្ទះ​ទៅ​ ស្រួល​ធ្វើ​ទេ​ ហើយ​របស់​ធ្វើ​ខ្លួន​ឯង​មាន​អនាម័យ​ជាង​ទិញ​គេ​ទៀត​។​ ថា​មិន​ត្រូវ​ចេះ​ធ្វើ​ហើយ​ លក់​ក៏​បាន​ដែរ​ រក​លុយ​បាន​ទៀត​ឃើញ​អត់​!

របស់​ត្រូវ​មាន​៖

  • ពង​ទា​ឆៅ ១០ គ្រាប់
  • អំបិល ២ ខាំ​កន្លះ
  • ទឹក​ស្អាត​ ១ លីត្រ
  • កែវ​ជ័រ​សម្រាប់​ដាក់​ពង​ទា​ត្រាំ

វិធី​ធ្វើ៖

១. លាង​ពង​ទា​ឲ្យ​បាន​ស្អាត​ បន្ទាប់​មក​ជូត​សំបក​ឲ្យ​ស្ងួត​ រួច​យក​ទៅ​ដាក់​ក្នុង​កែវ​ជ័រ

២. យក​ឆ្នាំ​ដាក់​ទឹក​ និង​ អំបិល​លាយ​ចូល​គ្នា​ ដាំ​ឲ្យ​ពុះ​ រួច​លើក​ចុះ ហើយ​ទុក​ឲ្យ​ទឹក​ត្រជាក់

៣. យក​ទឹក​អំបិល​ដែល​ដាំ​ហើយ​ ចាក់​ចូល​ក្នុង​កែវ​ជ័រ​មាន​ពង​ទា រួច​បិទ​គម្រប​ឲ្យ​ជិត​

៤. រក្សា​ទុក​នៅ​កន្លែង​មាន​សីតុណ្ហភាព​ល្មម​ ចំនួន​ ២១​ ថ្ងៃ​សឹម​​យក​ទៅ​ស្ងោរ​ញ៉ាំ​ តែ​បើ​មិន​ចូល​ចិត្ត​រស​ជាតិ​ប្រៃ​ខ្លាំង​ អាច​ត្រាំ​ត្រឹម ១៤ ទៅ ១៥ ថ្ងៃ​បាន​ហើយ​។​