ម៉ោះបបួលគ្នាធាត់ ចាប់អាវីដៗហ្នឹងចប់ ចាំសម្រកវិញក៏បានដែរ។ បើជ្រុលជានៅផ្ទះហើយ ឆ្លាតពេលធ្វើញ៉ាំឲ្យឆ្ងាញ់ៗ ឆ្អែតៗ ហ្មងទៅ កុំគិតច្រើន។ សាកធ្វើទឹកជ្រលក់ ២ មុខនេះញ៉ាំជាមួយងាវស្រុះមើល ឆ្ងាញ់សាហាវណាស់ណា។
គ្រឿងផ្សំ៖
- ងាវ ១គីឡូ
- នំបញ្ចុក (តាមចំណូលចិត្ត)
- បន្លែអន្លក់មាន ត្រសក់ សាលាដ ស្លឹកម្លូ ស្ពៃបូកគោ ជីរគ្រប់មុខ…(តាមចំណូលចិត្ត)
សម្រាប់ទឹកត្រីបុក៖
- ខ្ទឹមស ១០-១៥គ្រាប់
- ម្ទេស ១៥-២០គ្រាប់
- ស្ករ ១ស្លាបព្រាបាយ
- ទឹកក្រូចឆ្មារ ៥-៦ស្លាបព្រាបាយ
- ទឹកត្រី ៣ស្លាបព្រាបាយ
សម្រាប់ទឹកអំពិលទុំ៖
- ទឹកធម្មតា ១កូនចានកន្លះ
- ទឹកអំពិលទុំ ១កូនចាន
- ទឹកត្រី ៣ស្លាបព្រាបាយ
- ស្ករ ២ស្លាបព្រាបាយ
- សណ្តែកដីលីង ២ស្លាបព្រាបាយ បុក ឬកិនឲ្យម៉ត់បន្តិច។
វិធីធ្វើ៖
១. ងាវលាងទឹកឲ្យស្អាត រួចយកទៅដាក់ស្រុះទឹកក្តៅ ហើយស្រង់ដាក់ត្រាំទឹកធម្មតា
២.ធ្វើទឹកត្រីបុកហឹរ យកខ្ទឹមស ម្ទេស ស្ករ ទឹកត្រី ទឹកក្រូចឆ្មារ ដាក់ចូលគ្នាបុក ឬកិនឲ្យសព្វចូលគ្នា រួចដួសដាក់ចាន
៣.ធ្វើទឹកអំពិលទុំ យកខ្ទះដាក់ទឹក ទឹកអំពិលទុំ ទឹកត្រី ស្ករចូល កូរចូលគ្នាឲ្យសព្វ រួចដាក់សណ្តែកដីលីងចូល ច្របល់ចូលគ្នា រួចដួសដាក់ចាន
៤.រៀបចំអន្លក់ នំបញ្ចុក ងាវ និងទឹកជ្រលក់ដាក់ចាន ហូបផ្ទាប់ចូលគ្នា ឆ្ងាញ់អស់ទាស់៕
