ស្រីៗច្បាស់ជាធ្លាប់មានបទពិសោធហើយ ពេលសក់វែងចង់ទៅកាត់ខ្លី ពេលកាត់ខ្លីហើយ ចង់ឲ្យសក់ដុះវែងឲ្យលឿន អ្នកខ្លះនៅទៅទិញសក់មកពាក់ទៀត។ តែស្រីៗគ្នាយើងមិនបាននឹកឃើញដល់អាហារមួយចំនួន ដែលជួយឲ្យសក់ដុះវែងលឿន ហើយថ្ងៃនេះ admin នឹងណែនាំអាហារ ៨ មុខដែលជួយពន្លឿនការដុះសក់បាន៖
១. ត្រីសាលម៉ុន
សាលម៉ុនសម្បូរដោយវីតាមីន D អូមេហ្គា ៣ និងប្រូតេអ៊ីន ជួយឲ្យសក់ដុះបានលឿន និងស្បែកក្បាលមានសុខភាពល្អ។
២. អ៊យស្ទ័រ
មូលហេតុដែលនាំឲ្យសក់ខូច មកពីកង្វះស័ង្កសី។ អ៊យស្ទ័រជាអាហារសម្បូរដោយជាតិស័ង្កសី ជួយឲ្យសក់ដុះបានលឿន និងបន្ថែមសំណើមឲ្យសក់។
៣. គ្រាប់ផ្កាឈូករ័ត្ន
ជាប្រភពវីតាមីន E ជួយការពារសក់ជ្រុះ និងសម្រួលដល់លំហូរឈាមនៅលើស្បែកក្បាល ធ្វើឲ្យសក់ដុះលឿន។
៤. គ្រាប់អាល់មុន
ខ្លាញ់របស់គ្រាប់អាល់មុនជួយបំប៉នសក់ ធ្វើឲ្យសក់ទន់ជាងមុន និងរលោងជាងមុន។
៥. ដំឡូង
ដំឡូងសម្បូរដោយជាតិ Beta-carotene ដែលរាងកាយយើងនឹងបម្លែងវាទៅជាវីតាមីន A វាជួយផលិតខ្លាញ់ ធ្វើឲ្យស្បែកក្បាលមានសុខភាពល្អ ការពារសក់ស្ងួត។
៦. ស្ពៃពុយឡេង
សម្បូរដោយវីតាមីន A និង C ជួយសម្រួលដល់ការផលិតប្រេង ចិញ្ចឹមសក់ និងស្បែកក្បាល។
៧. ផ្លែប៊ឺរ
ផ្លែនេះសម្បូរដោយវីតាមីន B និង E ដែលជួយពង្រឹងសុខភាពស្បែកក្បាល ការពារសក់ជ្រុះ និងសក់បែកចុង។
៨. ម្ទេសប្លោកពណ៌លឿង
បន្លែមួយមុខនេះសម្បូរវីតាមីន C ជាងផ្លែក្រូច ៥ ដង។ វីតាមីន C ជាសារធាតុប្រឆាំងអុកស៊ីតកម្ម ដែលជួយប្រឆាំងភាពចាស់នៃស្បែក ថែមទាំងជួយពង្រឹងសរសៃសក់ ការពារសក់ស្ងួត និងសក់ខូចទៀតផង។